ព័ត៌មានជាតិ

អ្នកនាំពាក្យ ៖ ការផ្សាយព័ត៌មានមិនពិត ហើយមិនកែតម្រូវ ជាទង្វើដែលប្រាស់ចាកពីក្រមសីលធម៌វិជ្ជាជីវៈ

បានផុស

១ year មុន

នៅ

ថ្ងៃអង្គារ ២១ មីនា ២០២៣

ដោយ

មន្ត្រីជាន់ខ្ពស់ក្រសួងព័ត៌មាន លើកឡើងថា ការផ្សព្វផ្សាយព័ត៌មានមិនពិត ហើយមិនព្រមកែតម្រូវ គឺជាទង្វើដែលប្រាស់ចាកពីក្រមសីលធម៌វិជ្ជាជីវៈ ខណៈដែលជិត ៣ខែ ឆ្នាំ ២០២៣នេះ មានអង្គភាពសារព័ត៌មានចំនួន ៥ហើយ ត្រូវបានក្រសួងព័ត៌មាន សម្រេចលុបអាជ្ញាបណ្ណ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន មានប្រសាសន៍ប្រាប់កម្ពុជាថ្មី នៅថ្ងៃទី ២១ ខែមីនានេះថា ការដែលក្រសួងព័ត៌មាន សម្រេចលុបអាជ្ញាបណ្ណអង្គភាពសារព័ត៌មានទាំងនោះ ដោយសារតែសារព័ត៌មានទាំងនោះ បានផ្សព្វផ្សាយព័ត៌មានមិនពិត ខ្វះការផ្ទៀងផ្ទាត់ព័ត៌មានឲ្យបានត្រឹមត្រូវ និងគ្រប់ជ្រុងជ្រោយពីភាគីដែលពាក់ព័ន្ធ។

ម្យ៉ាងទៀត អង្គភាពសារព័ត៌មានទាំងនោះ មិនព្រមទទួលស្គាល់កំហុស និងមិនព្រមធ្វើការកែតម្រូវខ្លឹមសារព័ត៌មាន ដែលខ្លួនបានផ្សាយខុស និងអង្គភាពសារព័ត៌មានខ្លះ ត្រូវបានរកឃើញបន្ថែមផងដែរ ថាសារព័ត៌មាននោះ បានទទួលផលប្រយោជន៍ផ្សេងៗ ដើម្បីជាថ្នូរនឹងការផ្សព្វផ្សាយព័ត៌មាន ឬមិនផ្សព្វផ្សាយព័ត៌មានជាដើម។

លោក មាស សុភ័ណ្ឌ បានបញ្ជាក់ថា «ការផ្សាយព័ត៌មានមិនពិត មិនកែតម្រូវ និងទទួលយកផលប្រយោជន៍ជាថ្នូរនឹងការផ្សាយ ឬមិនផ្សាយព័ត៌មាន ជាទង្វើដែលប្រាស់ចាកពីក្រមសីលធម៌វិជ្ជាជីវៈសារព័ត៌មាន និងច្បាប់ដែលមានជាធរមាន»។

បើតាមមន្ត្រីជាន់ខ្ពស់ក្រសួងព័ត៌មានរូបនេះ អង្គភាពសារព័ត៌មាន និងអ្នកសារព័ត៌មាន ត្រូវគោរពឲ្យបានត្រឹមត្រូវតាមច្បាប់ និងលិខិតបទដ្ឋានគតិយុត្តិដែលមានជាធរមាន ព្រមទាំងគោរពឲ្យបានហ្មត់ចត់នូវក្រមសីលធម៌វិជ្ជាជីវៈសារព័ត៌មាន និងមានការទទួលខុសត្រូវខ្ពស់ ចំពោះការបំពេញតួនាទីភារកិច្ចរបស់ខ្លួនជាអ្នកប្រកបវិជ្ជាជីវៈមួយ។

ជាមួយគ្នានេះ ក៏ត្រូវចង់ចាំនូវអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺ៖ “អ្នកសារព័ត៌មាន កុំបំពានសិទ្ធិអ្នកដទៃ កុំបំភ្លៃការពិត”។ និង “អ្នកសារព័ត៌មានត្រូវផ្សាយព័ត៌មានពិត កុំប្រឌិតកំហុសដាក់អ្នកដទៃ”៕

អត្ថបទ៖ ឃួន សុភ័ក្រ