សិស្ស សាលា បែ​ល​ធី​១​ក្រុម រាំ​ត្រាប់​តាម បទ «​ស្រលាញ់​អ្វីដែល​ខ្មែរ​មាន​» ទទួល ការ​កោត​សរសើរ​ខ្លាំង លើ​បណ្ដាញ​សង្គម

​បទ​ចម្រៀង​ដ៏​អស្ចារ្យ «​ស្រលាញ់​អ្វីដែល​ខ្មែរ​មាន​» ត្រូវបាន​មហាជន​ជាច្រើន លាន់មាត់​យ៉ាង​ភ្ញាក់ផ្អើល​ថា​ ​មិន​ត្រឹម​តែមាន​អត្ថន័យ​ល្អ ប៉ុណ្ណោះ​ទេ ប៉ុន្តែ​បទ​ចម្រៀង​មួយ​បទ​នេះ ក៏បាន​រំលេច​នូវ​រូបភាព​វប្បធម៌​ ​អរិយធម៌​ល្អៗ​ ​របស់​ខ្មែរ​ជាច្រើន​ថែមទៀត​។ មិន​ត្រឹមតែ​ទទួលបាន​ការគាំទ្រ​ខ្លាំង​ពី​មហាជន​ប៉ុណ្ណោះ​ទេ បច្ចុប្បន្ន​បទ​នេះ ក៏​កំពុង​ក្លាយជា​បទ​ចម្រៀង​ដ៏​ពេញនិយម ដែល​សិស្សសាលា​ស្ទើ​ទូទាំងប្រទេស​យកទៅ​ហាត់​រាំ​ត្រៀម​សម្រាប់​ថ្ងៃ​ចូលឆ្នាំថ្មី ប្រ​ណៃ​ជាតិ​ខាងមុខនេះ ថែមទៀត​។​

​ជាក់ស្តែង នៅមុននេះ​បន្តិច សិស្សានុសិស្ស​នៅ​សាលា ប៊ែ​ល​ធី អន្តរជាតិ ជាច្រើន​អ្នក ក៏បាន​ជ្រើស​រើសយក​ប​ទ​«​ស្រលាញ់​អ្វីដែល​ខ្មែរ​មាន​» ដែល​ស្នាដៃ​ប្រវត្តិសាស្ត្រ​របស់​ផលិតកម្ម Galaxy Navatra ទៅ​ហាត់​រាំ​ជុំគ្នា ដើម្បី​ត្រៀម​សម្រាប់​ឱកាស​បុណ្យចូលឆ្នាំថ្មី​ខាងមុខ​។ តាមរយៈ​វីដេអូ​របស់​សិស្សសាលា​នេះ ក៏​ទទួល​បានការ​កោត​ស​សើរ​ពី​អ្នកប្រើប្រាស់​បណ្តាញ​សង្គម​ហ្វេ​ស​ប៊ុ​ក​ជាច្រើន ពី​សមត្ថភាព​រាំ​របស់​ពួកគេ ថា​មាន​ភាពស្រស់ស្អាត និង​រស់​រវើក​ផងដែរ​។​

​សកម្មភាព​ជ្រើស​រើសយក បទ «​ស្រលាញ់​អ្វីដែល​ខ្មែរ​មាន​» ពី​សំណាក់​សិស្សានុសិស្ស ទៅ​សម​ត្រៀម​ចូលឆ្នាំថ្មី មិនមែន​មានតែ​សាលា​អន្តរជាតិ ប៊ែ​ល​ធី អន្តរជាតិ នេះ​មួយ​ប៉ុណ្ណោះ​ទេ ពោលគឺ​គេ​សង្កេតឃើញ​ស្ទើ​តែ​ទូទាំងប្រទេស​កម្ពុជា​ទៅហើយ ដែល​បាន​ពេញចិត្ត​ជ្រើស​រើសយក​បទ​ចម្រៀង​ដ៏​ផ្ទុះ​កក្រើក​មួយ​បទ​នេះ ទៅ​រាំ​ជា​ក្រុម​នៅតាម​សាលារៀន​របស់​ពួកគេ​។​

​ក្រៅពី​សិស្សានុសិស្ស​យក​ចម្រៀង​មួយ​បទ​នេះ ទៅ​ហាត់​ត្រៀម​រាំ​ចូលឆ្នាំ​ហើយ​នោះ បទ​នេះ គេ​ក៏​សង្កេតឃើញ​មាន​បណ្តារ​អ្នកសិល្បៈ​ជាច្រើន​ទៀត​រាំ​តាម​ចង្វាក់​បទ​នេះ​ផងដែរ​។ មិនតែប៉ុណ្ណោះ បទ​នេះ ក៏ត្រូវ​បាន​ស្ត្រី​ជនជាតិ​ថៃ​ម្នាក់ យកទៅ Reaction និង​សរសើរ​មិន​ដាច់​ពី​មាត់ ទាំង​ប្លង់​ថត និង​ការបញ្ចូល​ជាមួយ​វប្បធម៌ ប្រពៃណី ក្បាច់គុណ​ល្បុក្កតោ ក៏ដូចជា​ប្រាសាទ​នានា ដែល​បង្ហាញ​ពី​អរិយ្យធម៌​ដ៏​មានតម្លៃ​របស់​ខ្មែរ​ថែមទៀត ។​

​សូម​រម្លឹក​ដែរ​ថា នា​ប៉ុន្មាន​ថ្ងៃ​ចុង​ក្រោយនេះ បន្ទាប់ពី​ផលិតកម្ម Galaxy Navatra បាន​បញ្ចេញ trailer បទ​«​ស្រលាញ់​អ្វីដែល​ខ្មែរ​មាន​» រួចមក ឃើញថា​បទ​ចម្រៀង​មួយ​បទ​នេះ គឺ​បានធ្វើឱ្យ​អ្នកទស្សនា​ព្រឺ​សម្បុរ ហើយ​ពិត​ជាមាន​មោទកភាព ដែល​កើត​មកជា​ជនជាតិខ្មែរ ម្យ៉ាងវិញទៀត​សមិទ្ធផល​ដ៏​កម្រ​នេះ គឺជា​សមិទ្ធផល​របស់​យើងទាំងអស់គ្នា ដែល​សិល្បៈ​រស់​ក្រោម​ម្លប់​នៃ​សន្តិភាព និង​ការអភិវឌ្ឍន៍ ។​

​បើតាម​ការ​ឱ្យដឹងពី​ផលិតកម្ម Galaxy Navatra ធ្លាប់បាន​ឱ្យដឹងថា បទ​នេះ ផលិតឡើង​ក្នុង​គោល បំណង អម​ព្រឹត្តិការណ៍​កីឡា​អាស៊ីអាគ្នេយ៍ ដែល​កម្ពុជា​ជា​ម្ចាស់ផ្ទះ​បទ «​ស្រឡាញ់​អ្វីដែល​ខ្មែរ​មាន​» ជា​ស្នាដៃ​ប្រវត្តិសាស្ត្រ​របស់​ផលិតកម្ម Galaxy Navatra ដែលមាន​កំពូល​តារាចម្រៀង ៤ ដួង ច្រៀង​រួមគ្នា​​គឺ​កំពូល​តារាចម្រៀង​ ​ឧកញ៉ា​ ​ព្រាប​ ​សុវត្ថិ កំពូល​តារាចម្រៀង​ ​ឧកញ៉ា​ ​ខេមរៈ​ ​សិរីមន្ត​ ​កំពូល​តារាចម្រៀង​ ​លោក​ ​ខេ​ម​ ​និង​កំពូល​តារាចម្រៀង​ស្រី​ ​កញ្ញា​ ​តន់​ ​ចន្ទ​សី​ម៉ា​ ៕