ក្រសួងការបរទេសកម្ពុជា នឹងពិភាក្សាជាមួយ NGOs អន្តរជាតិ លើច្បាប់ស្តីពីគណនេយ្យ និងសវនកម្ម 

ក្រសួងការបរទេស និងសហប្រតិបត្តិការអន្តរជាតិនឹងជួបពិភាក្សាពិគ្រោះយោបល់​ជាមួយអង្គការ​មិនមែនរដ្ឋាភិបាលបរទេស ពាក់ព័ន្ធទៅលើច្បាប់ស្ដីពីគណនេយ្យ និងសវនកម្ម។ នេះបើតាមសេចក្ដីប្រកាសរបស់ក្រសួងការបរទេស កាលពីថ្ងៃទី២៩ ខែមេសា ឆ្នាំ២០២៣។

សេចក្ដីប្រកាសនេះ បានឲ្យដឹងដូច្នេះថា«ក្រសួងការបរទេស និងសហប្រតិបត្តិការអន្តរជាតិកម្ពុជានឹងរៀបចំកិច្ចប្រជុំ​ពិគ្រោះយោបល់​លើកទី៣ រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស ក្រោមប្រធានបទ៖ ការពង្រឹងអនុវត្តច្បាប់ស្តីពីគណនេយ្យ និងសវនកម្ម»។ កិច្ចពិគ្រោះយោបល់នេះនឹងប្រព្រឹត្តទៅនៅថ្ងៃទី៣ ខែឧសភា ឆ្នាំ ២០២៣ នាទីស្តីការក្រសួងការបរទេស ក្រោមវត្តមានបើករបស់លោកឧបនាយករដ្ឋមន្ត្រី ប្រាក់ សុខុន ប្រមុខការទូតកម្ពុជា។  

ក្រសួងការបរទេសកម្ពុជា បានបញ្ជាក់ថា វេទិកានេះមានគោលបំណងលើកកម្ពស់បន្ថែមទៀតនូវការយល់ដឹង និងពង្រឹងការអនុវត្តច្បាប់ស្តីពីគណនេយ្យ និងសវនកម្ម ព្រមទាំងកាតព្វកិច្ចពាក់ព័ន្ធក្នុងចំណោមអង្គការមិនមែន​រដ្ឋាភិបាលបរទេស ។ ទន្ទឹមនេះ កាតព្វកិច្ចទាំងនោះ  រួមមាន៖ ការរាយការណ៍គណនេយ្យ ​ការរៀបចំរបាយការណ៍​ហិរញ្ញវត្ថុអនុលោមតាមបទដ្ឋានគណនេយ្យកម្ពុជា និងការធ្វើសវនកម្មឯករាជ្យលើរបាយការណ៍​ដែលកាតព្វកិច្ចទាំងអស់​នេះរួមចំណែកដល់ទំនួលខុសត្រូវ តម្លាភាព និងស័ក្តិសិទ្ធភាពរបស់​អង្គការមិនស្វែងរក​ប្រាក់ចំណេញ៕