ព័ត៌មានជាតិ

កាលវ័យ ១៩ ឆ្នាំខកខានបំណង ៦០ ឆ្នាំក្រោយ លោកតា ហ៊ិន ផាន ទស្សនាស៊ីហ្គេមបានសម្រេច

បានផុស

៣ years មុន

នៅ

ថ្ងៃព្រហស្បតិ៍ ១៨ ឧសភា ២០២៣

ដោយ

លោកតា ហ៊ិន ផាន មានព្រះជន្ម ៨៣ឆ្នាំ បានបង្ហាញពីស្នាមញញឹម បំណងប្រាថ្នា និងភាពសប្បាយរីករាយ ដែលអាចមកចូលរួមបិទព្រឹត្តិការណ៍កីឡាស៊ីហ្គេម ឆ្នាំ២០២៣ ជាលើកដំបូងនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងព្រឹត្តិការណ៍កីឡាអាស៊ីអាគ្នេយ៍លើកទី ៣២ ដែលកម្ពុជាធ្វើជាម្ចាស់ផ្ទះនិងបានទន្ទឹងរង់ចាំអស់រយៈពេល ៦៤ ឆ្នាំ បានបិទបញ្ចប់ជាផ្លូវការនាយប់ថ្ងៃទី១៧ ខែឧសភា ឆ្នាំ២០២៣ ដែលបានរៀបចំឡើងនៅពហុកីឡាដ្ឋានមរតកតេជោ ក្រោមផ្ទាំងទស្សនីយភាពជាច្រើន ព្រមទាំងចូលរួមពីសំណាក់ភ្ញៀវជាតិ-អន្តរជាតិយ៉ាងច្រើនកុះករ។

ផ្តល់បទសម្ភាសដល់ «កម្ពុជាថ្មី» លោកតា ហ៊ិន ផាន បានឱ្យដឹងថា ព្រឹត្តិការណ៍កីឡាស៊ីហ្គេមនេះបានកើតមានតាំងលោកតានៅមានវ័យ ១៩ ឆ្នាំមកម៉្លេះ។ រហូតមកដល់ពេលនេះ ដោយសារប្រទេសជាតិរស់ក្រោមម្លប់នៃសន្តិភាព ទើបលោកតាអាចសម្រេចបំណងប្រាថ្នា អាចចូលរួមនៅក្នុងព្រឹត្តិការណ៍មួយនេះបាន។

លោកតា ហ៊ិន ផាន បានមានប្រសាសន៍ថា «ខ្ញុំចង់មកទស្សនាព្រឹត្តិការណ៍ស៊ីហ្គេមតាំងពីខ្ញុំមានអាយុ ១៩ ឆ្នាំមក ហើយរហូតមកដល់ពេលនេះ ខ្ញុំមានវ័យ ៨៣ ឆ្នាំ។ បន្ទាប់ពីទន្ទឹងរងចាំអស់រយៈពេល ៦៤ ឆ្នាំ មកទល់ពេលនេះ ទើបខ្ញុំអាចបានមកទស្សនាផ្ទាល់ ខ្ញុំពិតជាសប្បាយ រីករាយខ្លាំងបំផុត។ ម្យ៉ាងវិញទៀត បើទោះបីជាខ្ញុំមិនចេះលេងកីឡាផ្សេងៗ តែខ្ញុំគ្រាន់តែមានចិត្តស្រលាញ់ និងគាំទ្រផ្នែកកីឡាទាំងអស់នេះផងដែរ»។

ជាមួយគ្នានេះ លោកតា ហ៊ិន ផាន បន្តទៀតថា មុនពេលឈានមកដល់នៃការរៀបចំព្រឹត្តិការណ៍កីឡាស៊ីហ្គេមនៅកម្ពុជា លោកតាតែងតែតាមដានទស្សនា គាំទ្រនៅរាល់ការផ្សាយបន្តផ្ទាល់ឬការប្រកួតនានា។ លោកតា ហ៊ិន ផាន ក៏បានអរគុណទៅដល់រាជរដ្ឋាភិបាលកម្ពុជា ដែលខិតខំរៀបចំព្រឹត្តិការណ៍កីឡាស៊ីហ្គេមនេះឡើងបានយ៉ាងល្អប្រសើរ។ លោកតាសង្ឃឹមថា កម្ពុជានឹងអាចរៀបចំព្រឹត្តិការណ៍នេះឡើងម្តងទៀត៕

Related Topics:Featured កីឡាស៊ីហ្គេម

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា