កុំឆ្ងល់! បើ​ឃើញសាឡង់​​កណ្តាល​​ទន្លេមុខជ្រោយ​ចង្វា អាជ្ញាធរ​ចេញ​មក​បញ្ជាក់ហើយ

សកម្មភាពបូមស្តារយកដីភក់ល្បាប់ កំពុងធ្វើឡើងនៅទីតាំងដីដុះមាត់​ទន្លេជ្រោយ​ចង្វា ជិត​សណ្ឋា​​គារសុខា ដើម្បីបើកមុខទឹកឲ្យហូរចូលទៅក្នុងទន្លេសាប។

គម្រោង​ស្តារ នឹងបើកមុខទឹក ក្រោមការអនុវត្តរបស់រដ្ឋបាលរាជធានីភ្នំពេញ តាមការស្នើសុំរបស់ក្រសួងកសិកម្ម រុក្ខា ប្រមាញ់ និង នេសាទ ដើម្បីនាំជីវៈចម្រុះចូលទៅក្នុងទន្លេសាប។

លោក ឃួង ស្រេង អភិបាលរាជធានីភ្នំពេញ បានប្រាប់កម្ពុជាថ្មីថា សកម្មភាពសាឡង់បូមនៅទីតាំងទន្លេចតុមុខ ជិតសណ្ឋាគារសុខា គឺជាគម្រោងស្តារដីកោះ ដើម្បីបើកមុខទឹកឲ្យទឹកហូរខ្លាំងចូលទៅទន្លេសាប ដើម្បីនាំជីវៈចម្រុះ ចូលទៅក្នុងទន្លេសាប។

លោក ឃួង ស្រេង ប្រាប់ថា ដីកោះនេះពីមុនមកគឺអណ្តែតឡើង នៅពេលដែលកោះដុះកាន់តែខ្លាំង ហើយជីវៈចម្រុះជាច្រើន ដូចជាត្រី បង្កង និងប្រភេទសត្វផ្សេងៗទៀត មានស្ថានភាពខ្សោះខ្សោយនៅបឹងទន្លេសាប ដោយសារទឹកមិនហូរចូលទៅ ដូច្នេះបានជាក្រសួងកសិកម្ម ប្រគល់ឲ្យសាលារាជធានីភ្នំពេញ បូមផ្តាច់យកភក់ ដីដែលស្ទះមុខទឹក ធ្វើយ៉ាងណាឲ្យមានមុខទឹកហូរចូលទៅក្នុងទន្លេសាបបានខ្លាំង ដើម្បីនាំជីវៈចម្រុះចូលទៅក្នុងរដូវត្រីពង។

លោក ឃួង ស្រេងបន្តថា “ យើងស្តារតែមួយកន្លែងទេ ដែលនៅជាប់និងប្រឡាយចតុមុខ នៅពេល​ខែប្រាំង គឺយើងឃើញស្រមោលកោះ ដុះឡើង ហើយនៅផ្នែកខាងក្រោម មានការពិបាកបូមបន្តិច​ដោយត្រូវប្រើក្រចាប់ ដើម្បីចាប់យកដីរឹងៗដែលហូរចូលរៀងរាល់ថ្ងៃ”។

បើតាមលោក ឃួង ស្រេង ការស្តារនេះមិនកំណត់ពេលបញ្ចប់ទេ ដោយសារតែដីភក់ល្បាប់នៅតែបន្តហូរចូលទៅក្នុងដីកោះដែលដុះនេះជារៀងរាល់ឆ្នាំ៕

អត្ថបទ៖ ឡេង ដេត