ម្ចាស់អាជីវកម្មគេចវេសមិនចុះបញ្ជី បសស ឱ្យបុគ្គលិកនឹងរងពិន័យ ៨០ម៉ឺនរៀលក្នុងម្នាក់

ម្ចាស់អាជីវកម្មទាំងអស់ ដែលប្រើប្រាស់បុគ្គលិក ឬកម្មករ ចាប់ពីម្នាក់ឡើងទៅ ត្រូវតែមានកាតព្វ​កិច្ចចុះបញ្ជីរបប​សន្តិសុខសង្គម បសស។ ផ្ទុយទៅវិញ ប្រសិនបើក្រុមហ៊ុន សហគ្រាស ដែលប្រើប្រាស់បុគ្គលិក តែមិនព្រមចុះបញ្ជីនៅ បសស តើត្រូវរងពិន័យដូចម្តេច?

លោក​ សុក បូរ៉ា ប្រធាននាយកដ្ឋាតាវកាលិកនៃរបបសន្តិសុខសង្គម បសស បានឱ្យដឹងថា ក្នុងរណីដែល បសស រកជើញថា ម្ចាស់អាជីវកម្ម មិនបានចុះបញ្ជី, បសស នឹងប្រើប្រាស់យន្តការចុះធ្វើអធិការកិច្ច។ ក្រោយចុះអធិការ​កិច្ចហើយ ក្រុមហ៊ុន ឬសហគ្រាស នៅតែមិនព្រមចុះបញ្ជីទៀត នោះ បស ស នឹងធ្វើការផាកពិន័យ។

លោក សុក បូរ៉ា បានគូសបញ្ជាក់ថា ចំពោះការផាកពិន័យនេះ ក្នុងបុគ្គលិក ឬកម្មករម្នាក់ ត្រូវផាក ៨០ម៉ឺនរៀល ស្មើនឹង ២០០ដុល្លារ។ ការផាកពិន័យនេះ គឺម្ចាស់ក្រុមហ៊ុនជាអ្នករ៉ាប់រងទាំងស្រុង។ ប្រធាននាយកដ្ឋាតាវកាលិកនៃរបបសន្តិសុខ​សង្គម បានពន្យល់ដូច្នេះថា បើក្រុមហ៊ុនមួយប្រើប្រាស់បុគ្គលិក ១០នាក់ ដោយមិនបានចុះបញ្ជីនៅ បសស គឺត្រូវយក​ចំនួនមនុស្ស ១០នាក់នេះ គុណនឹង ៨០ម៉ឺនរៀល ស្មើនឹង ៨លានរៀល បង់ឱ្យ បសស។ លោក សុក បូរ៉ា សង្កត់ធ្ងន់ថា ពិន័យរួច កាតព្វកិច្ចចុះបញ្ជីនៅ បសស នៅតែបន្តធ្វើដដែល។

លើសពីនេះទៀត លោក សុក បូរ៉ា បានលើកជាឧទាហរណ៍ថា ប្រសិនបើសហគ្រាសមួយបានចុះបញ្ជីនៅ បសស ហើយ ដោយមានបុគ្គលិក ២០នាក់ តែចុះបញ្ជីត្រឹមតែ ៥នាក់ លាក់ទុក ១៥នាក់។ លោកថា ករណីនេះ បើសិនជា បសស ស្រាវជ្រាវតាមរយៈពាក្យបណ្តឹង ឬរកឃើញតាមយន្តការអធិការកិច្ច បសស នឹងធ្វើការផាកពិន័យម្ចាស់​អាជីវកម្មនូវបុគ្គលិក ១៥នាក់ដែលមិនបានចុះបញ្ជី គុណនឹង ៨០ម៉ឺនរៀល។

នៅពេល បសស ពិន័យអន្តរកាលហើយ  ក្រុមហ៊ុននៅតែមិនព្រមចុះបញ្ជីទៀត បសស នឹងកសាងសំណុំរឿងប្តឹង​ទៅតុលាការ​តាមរយៈបណ្តឹងអាជ្ញា។

សូមបញ្ជាក់ថា លោក សុក បូរ៉ា លើកឡើងបែបនេះ នៅក្នុងវេទិកាពិភាក្សាក្រោមប្រធានបទ«អត្ថប្រយោជន៍ បសស សម្រាប់ប្រជាពលរដ្ឋ និងអ្នកសារព័ត៌មាន ធ្វើឡើងនៅថ្ងៃទី ២១ មិថុនា ឆ្នាំ ២០២៣ នៅរាជធានីភ្នំពេញ៕