កម្ពុជា ចែករំលែកភាពរីកចម្រើនការអនុវត្តរបបសន្តិសុខសង្គមដល់សមាគមសន្តិសុខសង្គមអាស៊ាន 

គណៈប្រតិភូ ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានចែករំលែកឧត្តមានុវត្តន៍ពាក់ព័ន្ធទៅនឹងវឌ្ឍនភាព នៃការអនុវត្តរបបសន្តិសុខសង្គម និងការអភិវឌ្ឍប្រព័ន្ធឌីជីថល ប.ស.ស. កម្ពុជាដល់សមាគសន្តិសុខសង្គមអាស៊ាន(ASSA)។ ការចែករំលែក ដោយសារការអនុវត្តរបបសន្តិសង្គមនៅកម្ពុជា មានភាពរីកចម្រើនគួរឱ្យកត់សម្គាល់ និងទទួលបានការគាំទ្រពីប្រជាពលរដ្ឋទូទាំងប្រទេស។

ការចែករំលែកនេះ បានធ្វើឡើងកាលពីថ្ងៃទី ៤ ខែ វិច្ឆិកា ឆ្នាំ២០២៥ នៅក្នុងសិក្ខាសាលាចែករំលែកឧត្តមានុវត្តន៍ ក្រោមប្រធានបទស្ដីពី វឌ្ឍនភាពរួម៖ កំណែទម្រង់បរិវត្តកម្មដើម្បីធានាអនាគតសម្រាប់ទាំងអស់គ្នា របស់សមាគសន្តិសុខសង្គមអាស៊ាន  (ASSA) លើកទី៤២ នៅទីក្រុងបានដាស៊េរីបេហ្កាវ៉ាន់នៃប្រទេសព្រុយណេ។

លោក ហេង សុផាន់ណារិទ្ធ អគ្គនាយករង ប.ស.ស. តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា ក្នុងឱកាសនោះមន្ត្រីជំនាញ ប.ស.ស. ក៏បានចូលរួមធ្វើបទបង្ហាញស្តីពី បរិវត្តកម្មឌីជីថលសម្រាប់ប្រព័ន្ធប្រតិបត្តិការ ប.ស.ស.និងបានចែករំលែកឧត្តមានុវត្តន៍ពាក់ព័ន្ធទៅនឹងវឌ្ឍនភាព នៃការអនុវត្តរបបសន្តិសុខសង្គម និងការអភិវឌ្ឍប្រព័ន្ធឌីជីថល ប.ស.ស. កម្ពុជា។

គួរបញ្ជាក់ថា សិក្ខាសាលាចែករំលែកឧត្តមានុវត្តន៍ខាងលើ រៀបចំដោយមូលនិធិសោធនិវត្តន៍សម្រាប់កម្មករនិយោជិត (ETF) នៃប្រទេសព្រុយណេ ដោយមានការចូលរួមពីតំណាងអង្គការអន្តរជាតិ និងតំណាងស្ថាប័នសន្តិសុខសង្គមជាសមាជិកនៃសមាគម ASSA ចំនួន ២០ស្ថាប័ន ដែលមកពីបណ្តាប្រទេសអាស៊ានទាំង ១០ សរុបចំនួនប្រមាណជាង ១០០នាក់។

សូមរំលឹកថា គិតត្រឹមខែកញ្ញាឆ្នាំ២០២៥ ប.ស.ស. មានសមាជិក ប.ស.ស.កើនឡើងដល់ ៣,៣លាននាក់ក្នុងនោះមានស្រីចំនួន ១,៨ លាននាក់៕

អត្ថបទ៖ សំអឿន