ព័ត៌មានជាតិ

រដ្ឋមន្ត្រីការងារ ៖ ការដាក់ចេញរបបសន្តិសុខសង្គមផ្នែកសោធន ធ្វើឱ្យកម្ពុជាមានប្រព័ន្ធគាំពារសង្គមកាន់តែមានសង្គតិភាព

បានផុស

២៧ វិនាទី មុន

នៅ

ថ្ងៃពុធ ២១ ឧសភា ២០២៥

ដោយ

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអះអាងថា ការដាក់ចេញរបបសន្តិសុខសង្គមផ្នែកសោធន ធ្វើឱ្យកម្ពុជាមានប្រព័ន្ធគាំពារសង្គម និងប្រព័ន្ធសន្តិសុខសង្គម កាន់តែមានសង្គតិភាព និងមានសមធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងវេទិកាផ្សព្វផ្សាយស្ដីពីវឌ្ឍនភាព នៃការអនុវត្តប្រព័ន្ធគាំពារសង្គម តាមរយៈការអនុវត្តយុទ្ធសាស្ត្របញ្ចកោណ-ដំណាក់កាលទី ១ របស់រាជរដ្ឋាភិបាលនីតិកាលទី ៧ នៃរដ្ឋសភា កាលពីពេលថ្មីៗ នេះ លោករដ្ឋមន្ត្រី បានបន្តថា «មកដល់ពេលនេះ ទាំងវិស័យសាធារណៈ ទាំងវិស័យឯកជន គឺទទួលបាននូវរបបសន្តិសុខសង្គមដូចគ្នា ខណៈកាលពីមុនវិស័យឯកជនទទួលបានតែរបបហានិភ័យការងារ និងផ្នែកថែទាំសុខភាព ប៉ុន្តែមិនទទួលបានផ្នែកសោធននោះទេ។ ចំណែកមន្ត្រីសាធារណៈទទួលបានផ្នែកសោធន តែមិនទទួលបានផ្នែកហានិភ័យការងារ និងថែទាំសុខភាព តែឥឡូវនេះ ទាំងវិស័យឯកជន និងសាធារណៈ គឺទទួលបាន ៣ ដូចគ្នា ដែលធ្វើឱ្យកម្ពុជាមានប្រព័ន្ធគាំពារសង្គម និងប្រព័ន្ធសន្តិសុខសង្គមមួយមានសង្គតិភាព ហើយអាចធ្វើឱ្យប្រជាពលរដ្ឋជ្រើសរើសគន្លងអាជីពរបស់ខ្លួនជាមន្ត្រីរាជការក៏បាន ជាបុគ្គលិកក្រុមហ៊ុនក៏បាន ព្រោះថា ទោះបីជាខ្លួនបំពេញការងារក្នុងវិស័យឯកជន ឬសាធារណៈ ថ្ងៃក្រោយអាចផ្លាស់ប្ដូរគ្នាបាន អាចបូកយោងបន្តគ្នាបាន មិនអាចផ្តាច់ពីការបង់ភាគទាន ឬខាតបង់នូវអត្ថប្រយោជន៍ពេលយើងផ្លាស់ប្ដូរតួនាទី ឬអាជីពនៅក្នុងជីវិតរបស់យើងនោះឡើយ»។

លោករដ្ឋមន្ត្រី បានបន្តទៀតថា បេឡាជាតិសន្តិសុខសង្គម (ប.ស.ស) បានលេចរូបរាងជាលើកដំបូងនៅកម្ពុជា នាទសវត្សរ៍ឆ្នាំ ១៩៤០ ក្នុងទម្រង់ជាប្រព័ន្ធតាវកាលិកគ្រួសារ ដែលហៅថា “ហឹបប្រាក់អន្តរវិជ្ជាជីវៈ”។ ប៉ុន្តែគួរឱ្យសោកស្ដាយ កម្មវិធីគាំពារសុខភាពនេះ ត្រូវបានបំផ្លាញទាំងស្រុងក្រោមរបបប្រល័យពូជសាសន៍ ប៉ុល ពត។ លុះដល់ក្រោយថ្ងៃរំដោះ ៧ មករា ១៩៧៩ ប្រព័ន្ធសន្តិសុខសង្គម ត្រូវបានស្ដារឡើងវិញជាជំហានៗ ហើយរហូតដល់ឆ្នាំ ២០០២ ច្បាប់ស្ដីពីរបបសន្តិសុខសង្គមសម្រាប់ជនទាំងឡាយដែលស្ថិតក្រោមបទប្បញ្ញត្តិ នៃច្បាប់ស្ដីពីការងារ ត្រូវបានដាក់ឱ្យអនុវត្ត ហើយបេឡាជាតិរបបសន្តិសុខសង្គម ត្រូវបានបង្កើតនៅឆ្នាំ ២០០៧។

លោករដ្ឋមន្ត្រី បានបន្ថែមថា រាជរដ្ឋាភិបាលកម្ពុជា នៅតែបន្តអភិវឌ្ឍន៍លើរបបសន្តិសុខសង្គមសម្រាប់សង្គមជាតិ ជាក់ស្ដែងនៅឆ្នាំ ២០១៩ ច្បាប់ស្ដីពីរបបសន្តិសុខសង្គមថ្មី ត្រូវបានរៀបចំឡើង ដើម្បីឆ្លើយតបទៅនឹងការវិវត្តន៍សេដ្ឋកិច្ច និងសង្គម ដោយផ្ដោតលើ ៤ ចំណុចសំខាន់ៗ ៖ (១) ផ្នែកហានិភ័យការងារ (២) ផ្នែកថែទាំសុខភាព (៣) ផ្នែកប្រាក់សោធន និង (៤) ផ្នែកនិកម្មភាព។ បន្ទាប់មកទៀត កម្មវិធីគាំពារសង្គមតាមរយៈរបបសន្តិសុខសង្គម ត្រូវបានអនុវត្តកាន់តែទូលំទូលាយ ទាំងក្របខណ្ឌរាជរដ្ឋាភិបាល និងវិស័យឯកជន តាមជំហានបន្តបន្ទាប់ ដែលផ្ដល់នូវភាពសំខាន់បំផុតក្នុងការថែទាំសុខភាពរបស់កម្មករ-និយោជិត ក៏ដូចជាប្រជាពលរដ្ឋទូទាំងប្រទេស។

គួរបញ្ជាក់ថា គិតមកត្រឹមខែមេសា ឆ្នាំ ២០២៥ នេះ សមាជិក ប.ស.ស បានកើនឡើងដល់ ៣ ០៦០ ៣៩២ នាក់ ស្រី ១ ៦៨៦ ៨៨៧ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៥០៨ ៦៦៩ នាក់ ស្រី ១៥០ ៩០៨ នាក់ បុគ្គលស្ថិតក្នុងវិស័យឯកជន ចំនួន ១ ៨៦៦ ១២២ នាក់ ស្រី ១ ១២៤ ៨០១ នាក់ បុគ្គលស្វ័យនិយោជន៍ចំនួន ៤៩៨ ៥៤៦ នាក់ ស្រី ៣០៣ ៤១៩ នាក់ និងអ្នកក្នុងបន្ទុក ១៨៧ ០៥៥ នាក់ ស្រី ១០៧ ៧៥៩ នាក់៕

អត្ថបទ ៖ សំអឿន