សម្ដេចតេជោ ហ៊ុន សែន ៖ ខេត្តកណ្ដាល ជាខេត្តទី ៣ ដែលមានរោងចក្រច្រើនជាងគេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា ប្រសិនបើខិតខំបន្ថែមទៀត ខេត្តកណ្ដាលនឹងអាចមានរោងចក្រច្រើនជាង ខណៈនាពេលបច្ចុប្បន្ននេះ ខេត្តកណ្ដាលជាខេត្តទី ៣ ដែលមានរោងចក្រច្រើនជាងគេ។ ការឲ្យដឹងរបស់សម្តេចតេជោ ហ៊ុន សែន បានធ្វើឡើងក្នុងពិធីជួបសំណេះ​សំណាលជាមួយកម្មករ-កម្មការិនី នៅស្រុកអង្គស្នួល ខេត្តកណ្តាល នាព្រឹកថ្ងៃទី ២៩ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា ខេត្តកណ្ដាល ជាខេត្តទី ៣ ដែលមានរោងចក្រច្រើនជាងគេ បន្ទាប់ពីរាជធានីភ្នំពេញ និងខេត្តកំពង់ស្ពឺ។ ខេត្តកណ្ដាល​ ប្រសិនបើខិតខំទាក់ទាញអ្នកវិនិយោគិនបន្ថែមនោះ នឹងអាចមានរោងចក្រច្រើនជាងគេ។

សម្ដេចតេជោ ហ៊ុន សែន ថ្លែងបែបនេះថា «ខេត្តកណ្ដាលប្រសិនជាប្រឹងច្រើនជាងនេះ ខេត្តកណ្ដាលអាចមានរោងចក្រច្រើនជាង ប៉ុន្តែប្រហែលជាក្នុងរយៈពេលកន្លងទៅ គឺខាងកំពង់ស្ពឺគេមានចំណុចទាក់ទាញច្រើនជាង ហើយវាកៀកនឹងកំពង់ផែដែលគេត្រូវដឹកចេញៗ»។

តែយ៉ាងណាក៏ដោយ ក្នុងមួយឆ្នាំកម្មករ-កម្មការនីដែលបំពេញការងារនៅខេត្តកណ្ដាល អាចរកចំណូលបានជាង ៤០០លានដុល្លារអាមេរិក។ សម្ដេចតេជោ ហ៊ុន សែន ក៏បានអំពាវនាវកម្មករ-កម្មការនី ត្រូវខិតខំបំពេញការងារ និងត្រូវចូលរួមថែរក្សាការងារ ឲ្យបានគង់វង្ស៕