រដ្ឋមន្រ្តីសន្យា​យ៉ាងយូរត្រឹមឆ្នាំ ២០២៤ បណ្តាញទឹកស្អាតនឹងត​ចូល​ដល់ឆ្នេរអង្កោល

នៅ​ក្នុងពិធីសម្ពោធដាក់ឲ្យប្រើប្រាស់ផ្លូវបេតុងមួយខ្សែនៅភូមិអង្កោល លោក​ ចម ប្រសិទ្ធ ទេសរដ្ឋមន្រ្តីរដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានបញ្ជាក់​ថា យ៉ាងយូរត្រឹមឆ្នាំក្រោយ (២០២៤) ទុយោទឹកស្អាតត្រូវតែមកដល់ឆ្នេរអង្កោល។

លោក​រដ្ឋមន្រ្តី​បាន​ឲ្យ​ដឹង​ថា កាលពី​ឆ្នាំ ២០១៧ មក ក្រសួងបានផ្តល់សិទ្ធវិនិយោគទឹកស្អាតជូនក្រុមហ៊ុនរបស់លោកស្រី អ៊ុក សោភា (រយៈពេល២០ឆ្នាំ) ក្នុងការផលិតទឹកស្អាត និងលក់ទៅឲ្យប្រជាពលរដ្ឋប្រើប្រាស់នៅទូទាំង ១១ភូមិ ក្នុងស្រុកដំណាក់ចង្អើរ តែមិនមានលទ្ធផលអ្វីជាដុំកំភួនរហូតដល់ឆ្នាំ ២០២២ ក្រុមហ៊ុនបានផ្ទេរសិទ្ធវិនិយោគនេះទៅឲ្យក្រុមហ៊ុនលោកស្រី វង្ស សោភ័ណ ក្នុងការបន្តផលិតនិងចែកចាយទឹកស្អាតនេះ។ តែទោះជាយ៉ាងណា កិច្ចការរបស់ក្រុមហ៊ុនទទួលសិទ្ធិបន្តខាងលើក្នុងការចែកចាយទឹកស្អាត​ហាក់នៅស្រពិចស្រពិល ដូចជាការរកប្រភពទឹកសម្រាប់ផ្គត់ផ្គង់ជាដើម ដែលនេះជាហេតុបន្តការរាំងស្ទះដល់ដំណើរការអភិវឌ្ឍន៍ របស់មូលដ្ឋានស្រុកដំណាក់ចង្អើរ ស្របពេលដែលគម្រោងធំៗជាច្រើន កំពុងសំឡឹងមកបោះទុនវិនិយោគទីនេះរាប់តាំងពីសណ្ឋាគារឡើង។

បើតាមលោក ចម ប្រសិទ្ធិ ក្រសួងមិនអាចបន្តភាពយឺតយ៉ាវក្នុងការរុញទឹកស្អាតរបស់ក្រុមហ៊ុនដែលបានសិទ្ធិវិនិយោគទៀតនោះទេ ព្រោះការបន្តពន្យាពេលរុញទឹកស្អាតចូលមកតំបន់អង្កោលនេះ អាចបន្តរាំងស្ទះដល់ដំណើរការអភិវឌ្ឍន៍នូវមូលដ្ឋានស្រុកដំណាក់ចង្អើរ ជាពិសេសឆ្នេរអង្កោលតែម្តង។

«យើងត្រូវតែត្រួតពិនិត្យឡើងវិញ ការដែលឲ្យអាជ្ញាប័ណ្ណទឹកស្អាតដែលធ្វើនៅស្រុកដំណាក់ចង្អើរនេះ។ បើក្រុមហ៊ុនមិនមានលទ្ធភាពធ្វើបានទេ យើងនឹងយកទឹកពីទំនប់ប្រឡាក់ក្រឡាខេត្តកំពតចូលមកទីនេះតែម្តង យើងមិនអាចរង់ចាំបានទៀតនោះទេ ព្រោះយើងត្រូវការអភិវឌ្ឍន៍»។

គួរបញ្ជាក់ថា រាល់រដូវប្រាំង ប្រជាពលរដ្ឋដែលរស់នៅមូលដ្ឋានស្រុកដំណាក់ចង្អើរខេត្តកែប តែងជួបបញ្ហាកង្វះទឹកស្អាតសម្រាប់ប្រើប្រាស់ប្រចាំថ្ងៃ។ រដូវអត់ភ្លៀងពលរដ្ឋតាមភូមិនីមួយៗប្រើប្រាស់ទឹកអណ្តូង ដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាតក្រហមកម្ពុជា​ផ្តល់ជូនតែមិនអាចបង្រ្គប់តម្រូវការបស់ពលរដ្ឋបាននោះទេ៕

អត្ថបទ៖ សឹង រ៉ាត់