រដ្ឋមន្ត្រីក្រសួងយុត្តិធម៌ នឹងរៀបចំសន្និសីទសារព័ត៌មាន បង្ហាញពីការងារកែទម្រង់ប្រព័ន្ធយុត្តិធម៌ សម្រាប់នីតិកាលទី ៧

រដ្ឋមន្ត្រីក្រសួងយុត្តិធម៌ ​នឹងរៀបចំសន្និសីទសារព័ត៌មាន ដើម្បីបង្ហាញអំពីការការងារកែទម្រង់ប្រព័ន្ធយុត្តិធម៌ សម្រាប់រាជរដ្ឋាភិបាល នីតិកាលទី ៧ ក្នុងឆាប់ៗខាងមុខនេះ។ នេះបើតាមការឲ្យដឹងពីលោក ជិន​ ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌។

កាលពីថ្ងៃទី ៤ ខែកញ្ញា ឆ្នាំ ២០២៣កន្លងទៅនេះ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានដឹកនាំកិច្ចប្រជុំដែលមានការចូលរួមពីថ្នាក់ដឹកនាំ និងក្រុមការងារដែលមានការពាក់ព័ន្ធ ដើម្បីពិនិត្យអំពីវឌ្ឍនភាព នៃការងាររៀប​ចំឯកសារនានា ក៏ដូចជាការត្រៀមលក្ខណៈ សម្រាប់អនុវត្តការងារកែទម្រង់ប្រព័ន្ធយុត្តិធម៌ សម្រាប់រាជរដ្ឋាភិបាល នីតិកាលទី ៧ នៃរដ្ឋសភា ប្រកបដោយប្រសិទ្ធភាព និងទទួលបានលទ្ធផលតាមការគ្រោងទុក។

ពាក់ព័ន្ធនឹងការងារកែទម្រង់ប្រព័ន្ធយុត្តិធម៌នេះ លោក ជិន ម៉ាលីន អ្នកនាំពាក្យក្រសួងយុត្តិធម៌ បានឲ្យដឹងថា ក្នុងពេលឆាប់ៗខាងមុខនេះ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ នឹងធ្វើសន្និសីទសារព័ត៌មាន ដើម្បីបង្ហាញ និងជម្រាបជូនសាធារណជន៕