ព័ត៌មានជាតិ

ចេញសសរស្ពានបណ្តើរៗ ស្ពានឆ្លងទន្លេខេត្តក្រចេះសម្រេចការសាងសង់បានជាង ១៥%

បានផុស

៣ years មុន

នៅ

ថ្ងៃពុធ ១៣ កញ្ញា ២០២៣

ដោយ

ស្ពានឆ្លងទន្លេមេគង្គខេត្តក្រចេះ សាងសង់សម្រេចបានជាង ១៥ ភាគរយ។ នេះបើតាមលោក ហ៊ាង សុទ្ធាយុត្តិ អគ្គនាយកបច្ចេកវិទ្យានិងទំនាក់ទំនងសាធារណៈ និងជាអ្នកនាំពាក្យក្រសួងសាធារណការនិងដឹកជញ្ជូន។

លោក ហ៊ាង សុទ្ធាយុត្តិ បានឲ្យដឹងថា ស្ពានខេត្តក្រចេះបានបើកការដ្ឋានសាងសង់កាលពីថ្ងៃទី ០២ ខែមករា ឆ្នាំ២០២៣ ខណៈវឌ្ឍនភាពមកដល់ពេលនេះសម្រេចបាន ១៥%។

ស្ពានឆ្លងទន្លេខេត្តក្រចេះមានប្រវែង ១ ៧៦១ ម៉ែត្រ បានបើកការដ្ឋានសាងសង់កាលពីថ្ងៃទី ០២ ខែមករា ឆ្នាំ២០២៣ ភ្ជាប់ពីត្រើយខាងកើតនៅត្រង់ចំណុចឃុំបុសលាវ ស្រុកចិត្របុរី ខេត្តក្រចេះ និងត្រើយខាងលិចនៅត្រង់ចំណុចឃុំសោប ស្រុកព្រែកប្រសព្វ ខេត្តក្រចេះ។

លោក ហ៊ាង សុទ្ធាយុត្តិ បានបន្តថា នេះជាគម្រោងស្ពានឆ្លងទន្លេទីមួយនៅខេត្តក្រចេះ ដែលគ្រោងប្រើប្រាស់រយៈពេលសាងសង់ ៤២ ខែ សាងសង់ដោយក្រុមហ៊ុនសំណង់សៀងហៃ (SCG) និងត្រួតពិនិត្យដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ចំណាយថវិកាប្រមាណជាង ១១៤ លានដុល្លារអាមេរិក។

ជុំវិញផលប៉ះពាល់នានាពីគម្រោងសាងសង់ បើតាមមន្រ្តីក្រសួងសាធារណការរូបនេះ ក្រុមការងារអន្តរក្រសួងក៏កំពុងខិតខំដោះស្រាយ ដើម្បីជំរុញការងារឲ្យចប់សព្វគ្រប់តាមផែនការគ្រោងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈគម្រោងស្ពានខេត្តក្រចេះ នឹងសម្រួលការធ្វើដំណើររបស់ប្រជាពលរដ្ឋទាំងនៅត្រើយខាងកើតនិងខាងលិច ខណៈបច្ចុប្បន្នពលរដ្ឋត្រូវប្រើទូកដចម្លងជាប្រចាំដែលត្រូវចំណាយថវិកា ខាតទាំងពេលវេលា និងប្រឈមមុខគ្រោះថ្នាក់ផ្សេងៗ៕