ពន្ធដារ អះអាងថា ពុំមានការដំឡើងពន្ធព្រលាន​ឬសំបុត្រយន្តហោះ ចំពោះអ្នកដំណើរ និងភ្ញៀវទេសចរទេ

អគ្គនាយកដ្ឋានពន្ធដារ បានអះអាងតាមរយៈសេចក្តីបំភ្លឺថា ពុំមានការប្រមូលពន្ធ ឬដំឡើងពន្ធព្រលានយន្តហោះ​ទៅក្រៅប្រទេស ឬពន្ធសំបុត្រយន្តហោះនោះឡើយ។ ការបំភ្លឺរបស់ពន្ធដារ ដើម្បីឆ្លើយតបទៅនឹងការ​ភាន់ច្រឡំ​របស់សាធារណជន ដែលលើកឡើងនៅលើបណ្តាញសង្គម។

នៅក្នុងសេចក្តីបំភ្លឺរបស់អគ្គនាយកដ្ឋានពន្ធដារ បានឱ្យដឹងដូច្នេះថា« ការលើកឡើងថា មានការដំឡើង​ពន្ធព្រលាន​យន្តហោះ ចំពោះអ្នកដំណើរ និងភ្ញៀវទេសចរណ៍ ទៅក្រៅប្រទេស ឬពន្ធសំបុត្រយន្តហោះ ដែលករណីនេះ​គឺជាការ​លើកឡើងពុំឆ្លុះបញ្ចាំងពីការពិតនោះទេ ហើយច្បាប់ស្តីពីសារពើពន្ធជាធរមានក៏ពុំមានចែង អំពីប្រភេទពន្ធលើព្រលាន​យន្តហោះនោះឡើយ។ ការលើកឡើងនេះអាចជាការលើកឡើងសំដៅដល់ការស្នើដំឡើង កម្រៃសេវាកម្មអ្នកដំណើរ​របស់ក្រុមហ៊ុនឯកជន ដែលអភិវឌ្ឍ និងគ្រប់គ្រងអាកាសយានដ្ឋាន»។

អគ្គនាយកដ្ឋានពន្ធដារ បានបញ្ជាក់ថា ការចេញសេចក្តីភ្លឺដោយសារនាពេលថ្មីៗនេះ បានសង្កេតឃើញថា មានការលើក​ឡើងតាមបណ្តាញសង្គមមួយចំនួនដោយការភាន់ច្រឡំ ឬក្នុងចេតនាបំភាន់ មួលបង្កាច់ និងចោទប្រកាន់​ដែលពុំបាន​ឆ្លុះបញ្ចាំង ពីកិច្ចខិតខំប្រឹងប្រែងចូលរួមចំណែករបស់អគ្គនាយកដ្ឋានពន្ធដារក្នុងការអនុវត្តតួនាទីភារកិច្ច ក្នុងការងារគ្រប់​គ្រងប្រមូលចំណូលពន្ធស្របតាមច្បាប់ស្តីពីសារពើពន្ធ។

អគ្គនាយកដ្ឋានពន្ធដារ បានអំពាវនាវ និងលើកទឹកចិត្តដល់សាធារណជនទាំងអស់ សូមធ្វើការឈ្វេងយល់ពីព័ត៌មាន ដែលត្រូវបានផ្សព្វផ្សាយជាសាធារណៈ ចៀសវាងទទួលបាន និងចែករំលែកបន្តនូវព័ត៌មានបំភាន់ ក្លែងបន្លំ និងនាំឱ្យសា​ធារណជនមានការយល់ច្រទ្បំ។

ក្នុងករណីមានចម្ងល់នានា ពាក់ព័ន្ធនឹងពន្ធដារ អាចទាក់ទងមកមជ្ឈមណ្ឌលពិគ្រោះយោបល់ (Call center) តាមរយៈលេខទូរស័ព្ទ ១២៧៧ ដោយឥតគិតថ្លៃ៕