​កសិករថា តម្លៃដំឡូងមីល្អប្រសើរ តែទិន្នផលទទួលបានទាប​

តម្លៃដំឡូងមី​នៅឆ្នាំនេះបាន​ល្អប្រសើរ ប៉ុន្តែ​បរិមាណទិន្នផលធ្លាក់ចុះបន្ដិច​ដោយសារអាកាសធាតុ​មិន​អំណោយផល ដែលមានភាពរាំងស្ងួត នៅដើមរដូវ ហើយមានភ្លៀងខ្លាំងនៅពាក់កណ្ដាលរដូវ។

​លោក អិល ឈិញ ប្រធានសមាគមកសិករដំឡូងមីខ្មែរបានឱ្យដឹងថា នៅខេត្តឧត្តរមានជ័យ​តម្លៃដំឡូងមី ៣២០ រៀល ក្នុង១គីឡូ ​ដែលជាតម្លៃល្អប្រសើរជាងឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោក អិល ឈិញ បានបញ្ជាក់ថា ទិន្នផលដំឡូងមីនៅក្នុងឆ្នាំនេះ មិនសូវល្អទេដោយសារភាពរាំងស្ងួតនាដើម​រដូវ ​និងមានភ្លៀងធ្លាក់ច្រើនាពាក់កណ្ដាលរដូវ​ដែលធ្វើឱ្យឫសមិនដុះ និងចេញឫសតិច ខណៈមួយហិកតា ទទួលបានទិន្នផប្រមាណ ២៥ តោន ប៉ុណ្ណោះ ឬទាបជាងនេះ ​ដែលជាមធ្យមដំឡូងមីអាចទទួលបាន ៣៥ តោន ក្នុង១ ហិកតា។

​បើតាមប្រធានសមាគមរូបនេះ ​នៅឆ្នាំនេះកសិករមិនចំណេញទេ ​ខាតច្រើន ដោយសារកសិករ​អ្នកដាំដំឡូងមី ខូចខាតដើមដំឡូងពីឆ្នាំមុន និងឆ្លងរោគ ហើយងាប់ច្រើន ខណៈដែលការ​ដាំលើក​ទី៣ ពូជក៏ឡើងថ្លៃ។

យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទបានបង្ហាញ​ថា នៅក្នុងរយៈពេល៨ខែ ឆ្នាំ២០២៣នេះ ការនាំចេញចំណិតដំឡូងមីក្រៀម មានបរិមាណជាង ៩៦ ម៉ឺនតោន ថយចុះជាង៤០ភាគរយ, ដំឡូងមីស្រស់ជាង​៧២ ម៉ឺនតោន ថយចុះជាង២៤ភាគរយ បើប្រៀបនឹងឆ្នាំ ២០២២។ ទីផ្សារដំឡូងមីរបស់កម្ពុជា មានប្រទេសវៀតណាម និងប្រទេសថៃ៕

អត្ថបទ៖ ឡេង ដេត