ពលរដ្ឋ គាំទ្រចំណាត់ការរបស់ក្រសួងសុខាភិបាល ចំពោះការបិទ និងដកអាជ្ញាបណ្ណមន្ទីរពេទ្យឯកជនមួយចំនួន ដែលខុសច្បាប់ និងខុសគោលការណ៍

ចាប់​ពី​​ខែ​សីហា ​ដល់ខែតុលានេះ មាន​មន្ទីរ​សម្រាក​ព្យាបាល​ឯកជនមួយចំនួន ​ត្រូវ​បាន​ក្រសួង​សុខា​ភិបាល​ សម្រេច​បិទ​ និង​ដក​ហូត​អាជ្ញាបណ្ណ​ ដោយសារ​ការ​ផ្តល់​សេវាកម្ម​មិន​ត្រឹម​ត្រូវ​តាមច្បាប់ និង​មិន​គោរព​តាម​គោល​ការណ៍​ណែនាំ​របស់​ក្រសួង។ ប្រជាពលរដ្ឋ ក៏ដូចជាសាធារណជន បានសម្ដែងការគាំទ្រចំពោះចំណាត់ការដ៏ល្អ របស់ក្រសួងសុខាភិបាលជាបន្តប​ន្ទាប់នេះ។

លោក នឿ សង្ហា អតីតនិស្សិតថ្នាក់បរិញ្ញាបត្រ ជំនាញចិត្តវិទ្យា នៃសាកលវិទ្យាល័យភូមិន្ទភ្នំពេញ បានប្រាប់កម្ពុជាថ្មីថា លោកពិតជាគាំទ្រចំពោះការបិទ និងដកហូតអាជ្ញាបណ្ណមន្ទីរពេទ្យឯកជនទាំងឡាយណា ដែលប្រព្រឹត្តខុស និងមិនគោរពតាមគោលការណ៍ណែនាំ របស់ក្រសួងសុខាភិបាល។ ប្រសិនបើនៅតែឲ្យមន្ទីរពេទ្យ ឬគ្លីនិកឯកជន ដែលគ្មានវិជ្ជាជីវៈទាំងនោះបន្តសកម្មភាពទៀត នឹងធ្វើឲ្យប្រជាពលរដ្ឋមួយចំនួនបន្តរងគ្រោះ។ ដូច្នេះលោកគាំទ្រចំណាត់ការរបស់ក្រសួងសុខាភិបាល ជាបន្តបន្ទាប់មកនេះ។

តែយ៉ាងណាក៏ដោយ លោក នឿ សង្ហា បានស្នើឲ្យក្រសួងសុខាភិបាល គួរតែអង្កេតស្រាវជ្រាវឱ្យបានច្បាស់លាស់ជាមុនសិន ដោយបែងចែងថា មន្ទីរពេទ្យឯកជន ឬគ្លីនិក ពហុព្យាបាល​ និងសម្ភពឯកជនមួយណា ដែលប្រព្រឹត្តកំហុសធ្ងន់ធ្ងរ រហូតដល់បាត់បង់អាយុជីវិតអ្នកជំងឺ និងមន្ទីរពេទ្យឯកជនណា ដែលគ្រាន់តែប្រព្រឹត្តកំហុសបន្តិចបន្តួច។ ប្រសិនបើ ទីតាំងទាំងនោះប្រព្រឹត្តកំហុសតិចតួច គួរតែជួយសម្របសម្រួលឱ្យដំណើរការឡើងវិញ។

ចំណែក កញ្ញា ជា​ ចាន់ដែត គ្រូពេទ្យ និងជាអ្នកថែទាំអ្នកជំងឺ នៃគ្លីនិកឯកជនមួយកន្លែង ក៏បានប្រាប់មកកម្ពុជាថ្មីដូចគ្នាដែរថា កញ្ញា គាំទ្រចំណាត់ការរបស់ក្រសួងសុខាភិបាល ចំពោះមន្ទីរពេទ្យ​ឯកជនណាមួយ ដែលប្រព្រឹត្តខុសពីគោល​ការណ៍ណែនាំ របស់ក្រសួងសុខាភិបាល។

ក្នុងនាម កញ្ញា ក៏ជាគ្រូពេទ្យម្នាក់ដែរនោះ​ កញ្ញា ពិតជាមិនចង់ឃើញអ្នកជំងឺ ឬអ្នករបួសណាមួយ ត្រូវមកបាត់បង់អាយុជីវិត ឬគ្រោះថ្នាក់ធ្ងន់ធ្ងរ ដោយសារតែក្រុមគ្រូពេទ្យ មិនថាជាកំហុសចេតនាក្ដី ឬអចេតនាក្ដី ទាំងនេះគឺជាក្រមសីលធម៌ វិជ្ជាជីវៈ របស់គ្រូពេទ្យពិតប្រាកដ។

សម្រាប់ករណី ដែលក្រសួងសុខាភិបាលបានបិទ និងដកហូតអាជ្ងាបណ្ណ មន្ទីរពេទ្យឯកជន ដែលប្រព្រឹត្តកំហុសនេះ កញ្ញា ថា វាជាមេរៀន​ និងចាត់ទុកជាបទពិសោធន៍ សម្រាប់មន្ទីរពេទ្យ ឬគ្លីនិកឯកជន​​ ផ្សេងៗទៀត គួរតែពិនិត្យ និងរក្សាគុណភាពសេវាថែទាំអ្នកជំងឺ ឱ្យមានស្ដង់ដា និងចូលរួមគោរពតាមគោលការណ៍ណែនាំ របស់ក្រសួងសុខាភិបាល៕

អត្ថបទ៖ សួស សិត