សម្ដេចធិបតី ហ៊ុន ម៉ាណែត ៖ កម្ពុជា ទទួលបានអត្ថប្រយោជន៍ជាច្រើន ពីគំនិតផ្ដួចផ្ដើមខ្សែក្រវាត់ និងផ្លូវ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ប្រទេសកម្ពុជា ទទួលបានអត្ថប្រយោជន៍ជាច្រើនពីគំនិតផ្ដួចផ្ដើមខ្សែក្រវាត់ និងផ្លូវ ដែលបង្កើតដោយលោក ស៊ី ជីនពីង ប្រធានាធិ​បតីចិន។

ក្នុងកិច្ចសម្ភាសន៍ ជាមួយក្រុមហ៊ុនសារព័ត៌មានចិន China Media Group នៅក្នុងកម្មវិធី Leader Talks នាទីក្រុងប៉េកាំង កាលពីពេលថ្មីៗនេះ សម្ដេចធិបតី ហ៊ុន ម៉ាណែត យល់ឃើញថា គំនិតផ្ដួចផ្ដើមខ្សែ​ក្រវាត់ និងផ្លូវ មានគោលបំណងជួយឲ្យប្រទេសជាច្រើន មានការរីកចម្រើន និងមានលទ្ធភាពទទួលបានកាន់តែឆាប់រហ័ស ពិសេសប្រទេសមានការអភិវឌ្ឍតិចតួច ទទួលបាន និងមានឱកាសអភិវឌ្ឍ ពិសេសទទួលបានហិរញ្ញប្បទាន កាន់តែឆាប់រហ័ស ក្នុងការកសាងហេដ្ឋារចនាសម្ព័ន្ធនានា ដែលត្រូវការចាំបាច់ សម្រាប់ការគាំទ្ររីកចម្រើន និងអភិវឌ្ឍន៍។

សម្ដេចធិបតី ហ៊ុន ម៉ាណែត មានប្រសាសន៍បន្តថា ប្រទេសកម្ពុជា ទទួលបានអត្ថប្រយោជន៍យ៉ាងច្រើន ពីការផ្ដួចផ្ដើមខ្សែក្រវាត់ និងផ្លូវនេះ ក៏ដូចជាប្រទេសជាច្រើនដែរ ហើយការចូលរួមវេទិកាខ្សែ​ក្រវាត់ និងផ្លូវ លើកទី ៣នេះ គឺជាការបង្ហាញពីការគាំទ្ររបស់កម្ពុជា សម្រាប់វេទិកាខ្សែក្រវាត់ និងផ្លូវនេះ។ សម្ដេចធិបតី ហ៊ុន ម៉ាណេត ក៏បានសម្ដែងការអបអរសាទរ ចំពោះលោក ស៊ី ជីនពីង ប្រធានាធិ​បតីចិន និងរដ្ឋាភិបាលចិន ដែលបានរៀបចំដោយជោគជ័យនូវវេទិកាខ្សែក្រវាត់ និងផ្លូវនេះ។

សម្ដេចធិបតី ហ៊ុន ម៉ាណែត បានបញ្ជាក់ថា «ខ្ញុំយល់ថា ប្រទេសកម្ពុជា ទទួលបានអត្ថប្រយោជន៍ជាច្រើនពីការផ្ដួចផ្ដើមខ្សែក្រវាត់ និងផ្លូវនេះ តាមរយៈការរៀបចំយុទ្ធសាស្រ្ដដោយផ្សាភ្ជាប់ ជាមួយនឹងការគាំទ្រដែលបានពីការផ្ដួចផ្ដើមនេះ តាមរយៈការរៀបចំយុទ្ធសាស្រ្ដ ដោយផ្សារភ្ជាប់ជាមួយនឹងការគាំទ្រដែលបានពីការផ្ដួចផ្ដើមនេះ»។

សូមជម្រាបថា សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដឹកនាំគណៈប្រតិភូជាន់ខ្ពស់រាជរដ្ឋាភិបាល អញ្ជើញចូលរួមក្នុងវេទិកាខ្សែក្រវាត់ និងផ្លូវលើកទី ៣ នៅទីក្រុងប៉េកាំង ប្រទេសចិន ចាប់ពីថ្ងៃទី ១៦ ដល់ថ្ងៃទី ១៩​ ខែតុលា ឆ្នាំ ២០២៣ ដែលតបតាមការអញ្ជើញរបស់លោក ស៊ី ជីនពីង ប្រធានាធិបតីចិន។

បើតាមសេចក្ដីប្រកាសព័ត៌មាន របស់ក្រសួងការបរទេសកម្ពុជា ស្ដីពី ជោគជ័យ នៃដំណើរទស្សនកិច្ចរបស់សម្ដេចធិបតី ហ៊ុន ម៉ាណែត ក្នុងវេទិកាខ្សែក្រវាត់ និងផ្លូវ លើកទី ៣ បានឲ្យដឹងថា គំនិតផ្តួចផ្តើមខ្សែក្រវាត់ និងផ្លូវ (BRI) នេះ បានផ្ដល់អត្ថប្រយោជន៍ជាច្រើនដល់ប្រទេសកំពុងអភិវឌ្ឍ រួមទាំងកម្ពុជា ដោយក្នុងនោះ រួមមាន៖ ការអភិវឌ្ឍហេដ្ឋារចនាសម្ព័ន្ធ ការវិនិយោគផ្ទាល់ពីបរទេស កំណើនសេដ្ឋកិច្ច ការធ្វើសមាហរណកម្មក្នុងតំបន់ និងសកលលោក និងការផ្លាស់ប្ដូរប្រជាជន និងប្រជាជន។

នៅក្នុងវេទិកានោះ សម្ដេចធិបតី ហ៊ុន ម៉ាណែត បានបញ្ជាក់ពីការគាំទ្រពេញទំហឹងរបស់កម្ពុជា និងការត្រៀមខ្លួនរួចជាស្រេច ក្នុងការរួមគ្នាអនុវត្តនូវសកម្មភាពធំៗចំនួន ៨ ដែលលោកប្រធានាធិបតី ស៊ី ជីនពីង បានលើកឡើងក្នុងសុន្ទរកថាគន្លឹះ ក្នុងពិធីបើកវេទិកាខ្សែក្រវាត់ និងផ្លូវលើកទី ៣នេះ។

សកម្មភាពធំៗទាំង ៨នោះ រួមមាន៖ ការកសាងបណ្តាញតភ្ជាប់ពហុវិស័យខ្សែក្រវាត់ និងផ្លូវ, ការគាំទ្រសេដ្ឋកិច្ចពិភពលោកបើកចំហ, ការអនុវត្តកិច្ចសហប្រតិបត្តិការជាក់ស្ដែង, ការជំរុញការអភិវឌ្ឍបៃតង, ការជំរុញនវានុវត្តន៍ផ្នែកវិទ្យាសាស្ត្រ និងបច្ចេកវិទ្យា, ការគាំទ្រការផ្លាស់ប្តូរប្រជាជន និងប្រជាជន, ការលើកកម្ពស់កិច្ចសហប្រតិបត្តិការខ្សែក្រវាត់ និងផ្លូវ ដែលឈរលើមូលដ្ឋាននៃសុចរិតភាព និងការពង្រឹងការកសាងស្ថាប័នសម្រាប់កិច្ចសហប្រតិបត្តិការខ្សែក្រវាត់ និងផ្លូវ ជាលក្ខណៈអន្តរជាតិ៕