នយោបាយ

ប្រធានាធិបតីចិនចាត់រដ្ឋមន្ត្រីការបរទេសចូលទៅថ្វាយព្រះពរជូនសម្ដេចម៉ែនៅរាជដំណាក់ក្រុងប៉េកាំង

បានផុស

២២ វិនាទី មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

ប្រធានាធិបតីចិនលោក ស៊ី ជិនពីង បានចាត់រដ្ឋមន្ត្រីការបរទេសលោក វ៉ាង យី ចូលទៅថ្វាយព្រះពរថ្វាយជូនសម្ដេចមហាក្សត្រី នរោត្តម មុនិនាថ សីហនុ ក្នុងឱកាសខួបចម្រើនព្រះជន្មវស្សាហ្លួងម៉ែ គម្រប់ ៩០ព្រះវស្សា ដល់ព្រះរាជដំណាក់ក្នុងរដ្ឋធានីប៉េកាំង ប្រទេសចិន ព្រមទាំងបញ្ជាក់ពីមិត្តភាពដ៏រឹងមាំរវាងចិន និងកម្ពុជា ដែលមានភាពស្មោះត្រង់ និងគោរពគ្នាទៅវិញទៅមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសចូលសវនការជាមួយព្រះមហាក្សត្រកម្ពុជាសម្ដេចព្រះ បរមនាថ នរោត្តម សីហមុនី និងសម្ដេចព្រះមហាក្សត្រី នរោត្តម មុនិនាថ សីហនុ កាលពីថ្ងៃទី១៧ ខែមិថុនា ក្រៅពីពាំនាំនូវការសួរសុខទុក្ខ និងថ្វាយព្រះពរជូនសម្ដេចម៉ែ និងព្រះមហាក្សត្រកម្ពុជាពីប្រធានាធិបតី និងភរិយា លោក វ៉ាង យី បានបញ្ជាក់ថា៖ «អស់រយៈពេល ៧០ ឆ្នាំមកហើយ ដោយមិនគិតពីការវិវត្តនៃសភាពការណ៍អន្តរជាតិ ប្រទេសចិន និងកម្ពុជាតែងតែប្រព្រឹត្តចំពោះគ្នាទៅវិញទៅមកដោយស្មោះត្រង់ និងគោរពគ្នាទៅវិញទៅមក ដោយបានបង្កើតគំរូសម្រាប់ទំនាក់ទំនងរវាងរដ្ឋ និងរដ្ឋ»។

លោកក៏បានបន្ថែមដែរថា ប្រទេសចិនមានឆន្ទៈក្នុងការធ្វើការជាមួយប្រទេសកម្ពុជា ដើម្បីបន្តពង្រឹងមិត្តភាពប្រពៃណី ពង្រឹងទំនុកចិត្តគ្នាទៅវិញទៅមកជាយុទ្ធសាស្ត្រ បង្កើនកិច្ចសហប្រតិបត្តិការជាក់ស្តែង បង្កើតអត្ថប្រយោជន៍បន្ថែមទៀតសម្រាប់ប្រជាជននៃប្រទេសទាំងពីរ និងធ្វើការចូលរួមចំណែកថ្មីៗដល់សន្តិភាពក្នុងតំបន់ និងពិភពលោក។

ព្រះករុណា ព្រះមហាក្សត្រ និងសម្តេចម៉ែសព្វព្រះហឫទ័យប្រទានសារជូនពរដល់ប្រធានាធិបតី និងលោកជំទាវទី១របស់ប្រទេសចិន ព្រមទាំងបានសម្តែងការដឹងគុណចំពោះប្រទេសចិនចំពោះការគាំទ្ររយៈពេលវែង និងការរៀបចំដ៏ឈ្លាសវៃរបស់ខ្លួនសម្រាប់ការព្យាបាល និងពិនិត្យព្រះរាជសុខភាពរបស់គ្រួសាររាជវង្សកម្ពុជា ក៏ដូចជាជំនួយដ៏ស្មោះស្ម័គ្ររបស់ខ្លួនចំពោះការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា។

ព្រះករុណា គូសបញ្ជាក់ថា ប្រទេសកម្ពុជាឱ្យតម្លៃខ្ពស់ចំពោះមិត្តភាពប្រពៃណីរវាងកម្ពុជា និងចិន។ មិនថាស្ថានភាពអន្តរជាតិផ្លាស់ប្តូរយ៉ាងណាទេ កម្ពុជានឹងតែងតែជាមិត្តល្អបំផុតរបស់ប្រទេសចិន។

សម្ដេចព្រះមហាក្សត្រី នរោត្តម មុនិនាថ សីហនុ ប្រសូតនៅថ្ងៃទី ១៨ ខែមិថុនា ឆ្នាំ១៩៣៦ ដោយមានព្រះនាមដើម ប៉ូល ម៉ូនិក អ៊ីហ្សហ្ស៊ី (Paule Monique Izzi)។ ព្រះបិតា ព្រះនាម ហ្សង់ ហ្វ្រង់ស្វ័រ អ៊ីហ្សហ្ស៊ី (Jean François Izzi) ជាជនជាតិបារាំង កាត់អ៊ីតាលី និងព្រះមាតាព្រះនាម ប៉ុម ពាង។ សម្ដេចម៉ែ បានរៀបអភិសេកជាមួយសម្ដេចព្រះនរោត្តម សីហនុ នៅខែមេសា ឆ្នាំ១៩៥២ ហើយបានទទួលបរមងារជាអ្នកម្នាង។ នៅឆ្នាំ១៩៩២ ព្រះករុណាសម្ដេច នរោត្តម សីហនុ បានប្រទានគោរមងារដល់អ្នកម្នាង ប៉ូល ម៉ូនិក អ៊ីស៊ី ជាសម្ដេចព្រះជាយា។

ក្នុងឆ្នាំ១៩៩៣ សម្ដេចព្រះជាយា ទ្រង់បានទទួលគោរមងារជាសម្ដេចព្រះមហេសី នរោត្តម មុនីនាថ សីហនុ នៃព្រះរាជាណាចក្រកម្ពុជា ហើយនៅឆ្នាំ១៩៩៦ ព្រះមហេសីបានទទួលបរមងារជាសម្ដេចព្រះរាជអគ្គមហេសី។ បច្ចុប្បន្ន សម្ដេចព្រះរាជអគ្គមហេសី មានព្រះគោរមងារជា សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល៕

អត្ថបទដោយ ហ៊ុន សិរីវឌ្ឍន៍