ស្ថានីយប្រព្រឹត្តកម្មទឹកកខ្វក់បឹងជើងឯក នឹង​ដាក់​ឱ្យ​ដំណើរការ​ដើម​សប្តាហ៍​ក្រោយ

គម្រោងស្ថានីយប្រព្រឹត្តកម្មទឹកកខ្វក់​បឹងជើងឯក គ្រោងធ្វើការប្រគល់-ទទួលជូនរដ្ឋបាលរាជធានីភ្នំពេញនិងដាក់ឱ្យដំណើរការ​​​នៅដើមសប្តាហ៍ទី ២ នៃខែវិច្ឆិកា ឆ្នាំ២០២៣ ខាងមុខនេះ។

កាលពី​ថ្ងៃ​ទី ១ ខែវិច្ឆិកា ឆ្នាំ២០២៣ លោក ចៅ សុភៈភិបាល អគ្គនាយកស្តីទីនៃអគ្គនាយកដ្ឋានប្រព័ន្ធចម្រោះទឹកកខ្វក់ បាន​​ដឹកនាំក្រុមការងារបច្ចេកទេសអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន ចុះទស្សនកិច្ចស្ថានីយប្រព្រឹត្តកម្មទឹកកខ្វក់បឹងជើងឯក ដោយមានការចូលរួមពីអគ្គនាយករង ប្រធាននាយកដ្ឋានជំនាញក្រោម​​ឱវាទ​និងមន្ត្រីបច្ចេកទេស ក្រោមការសម្របសម្រួលពីមន្ទីរសាធារណការ និងដឹកជញ្ជូនរាជធានីភ្នំពេញ និងក្រុមហ៊ុន​សាងសង់។

ស្ថានីយប្រព្រឹត្តកម្មទឹកកខ្វក់​​បឹងជើងឯក សាងសង់ដោយក្រុមហ៊ុនចម្រុះ គូបូតា-មេតាវ៉ត់ធឺ ជ័ន វែនឈួរ (Kubota-Metawater Joint Venture) លើផ្ទៃដីទំហំ ៣ ហិកតា ស្ថិតនៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ក្រោមជំនួយឥតសំណងរបស់រដ្ឋាភិបាលជប៉ុនប្រមាណ ២៣៤០ លានយេន ស្មើនឹងប្រមាណ ២០លានដុល្លារអាមេរិក៕