ព័ត៌មានជាតិ

ដឹងទេ! កាលពីជាង ៤០ ឆ្នាំមុន បាក់ឌុបមានសិស្សមកប្រឡងត្រឹម ៨២ នាក់ប៉ុណ្ណោះ

បានផុស

៣ years មុន

នៅ

ថ្ងៃសៅរ៍ ៤ វិច្ឆិកា ២០២៣

ដោយ

បើតាមឯកសារក្រសួងអប់រំ យុវជន និងកីឡា ក្រោយប្រទេសកម្ពុជាចេញផុតពីរបបប៉ុលពតឆ្នាំ ១៩៧៩ ពោលនាសម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នាសម័យប្រឡងឆ្នាំ ១៩៨០ ដំណើរការប្រឡងជំនាន់នោះមានសិស្សមកប្រឡងត្រឹម ៨២ នាក់ប៉ុណ្ណោះ។ ក្នុងចំណោមសិស្ស ៨២ នាក់ អ្នកជាប់មានចំនួន ៧២ នាក់ ស្មើអត្រា ៨៧.៨០%។

នៅឆ្នាំប្រឡងក្រោយៗមកទៀត ចំនួនសិស្សមានការកើនឡើងបន្តបន្ទាប់។ ជាក់ស្តែងនៅឆ្នាំ ១៩៨១ ចំនួនសិស្សមកប្រឡងមានចំនួន ១៤២ នាក់ ឆ្នាំ ១៩៨២ មានចំនួន ១៦៤ នាក់ ឆ្នាំ ១៩៨៣ មានចំនួន ១៥៦ នាក់ ឆ្នាំ ១៩៨៤ មានចំនួន ៨៣៤ នាក់ ឆ្នាំ ១៩៨៥ មានចំនួន ១ ៦១៦ នាក់ ឆ្នាំ ១៩៨៦ មានចំនួន ៣ ៦៥០ នាក់ ឆ្នាំ ១៩៨៧ មានចំនួន ៤ ៧៤៦ នាក់ ឆ្នាំ ១៩៨៨ មានចំនួន ៥ ៧២៧ នាក់ ឆ្នាំ ១៩៨៩ មានចំនួន ៧ ៨៣៣ នាក់ និងឆ្នាំ ១៩៩០ មានចំនួន ១១ ៥៦៧ នាក់ និងបន្តកើនឡើងជាលំដាប់នាសម័យប្រឡងក្រោយៗមកទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់សម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅថ្ងៃ ០៦ វិច្ឆិកា ២០២៣ បើតាមក្រសួងអប់រំ យុវជន និងកីឡា មានបេក្ខជនចុះឈ្មោះប្រឡងសរុបចំនួន ១៣៧,៤១២នាក់ (ស្រី ៧៣,២៧៨ នាក់ ក្នុងនោះបេក្ខជនថ្នាក់វិទ្យាសាស្ត្រមានចំនួន ៤១,៣៧៩នាក់ (ស្រី ២៤,៧៨៩ នាក់) បេក្ខជនថ្នាក់វិទ្យាសាស្ត្រសង្គមមានចំនួន៩៦,០៣៣ នាក់ (ស្រី ៤៨,៤៨៩ នាក់)។

នៅក្នុងសន្និសីទសារព័ត៌មានពាក់ព័ន្ធដំណើការប្រឡងសញ្ញាបត្រមធ្យមសិក្សាទុតិយភូមិកាលពីថ្ងៃទី ២៧ ខែតុលា ឆ្នាំ២០២៣ លោក ហង់ជួន ណារ៉ុន ឧបនាយករដ្ឋមន្ដ្រី និងជារដ្ឋមន្រ្តីក្រសួងអប់រំ យុវជន និងកីឡាបានធានាអះអាងថា នឹងរៀបចំការប្រឡងដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានពោលគឺអ្នកចេះជាប់៕