សម្តេចធិបតី ណែនាំឱ្យអង្គភាពយោធាពង្រឹងការកសាងធនធានមនុស្សទាំងបរិមាណ និងគុណភាព

នៅព្រឹកថ្ងៃទី១០ ខែវិច្ឆិកា ឆ្នាំ២០២៣នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំដល់គ្រប់អង្គភាពយោធាទាំងអស់ ត្រូវពង្រឹងការងារហ្វឹកហ្វឺន និងការកសាងប្រភពធនធានមនុស្ស ដោយគិតទាំងបរិមាណ និងគុណភាព ដើម្បីបម្រើដល់កិច្ចការពារជាតិឱ្យមានប្រសិទ្ធភាពខ្ពស់ថែមទៀត។

ក្នុងពិធីអបអរសាទរខួបអនុស្សាវរីយ៍លើកទី២៨ ថ្ងៃបង្កើតបញ្ជាការដ្ឋានទ័ពពិសេស នៅព្រឹកថ្ងៃនេះ សម្ដេចធិបតី ហ៊ុន ម៉ាណែត បានណែនាំដូច្នេះថា៖ «គ្រប់អង្គភាពទាំងអស់ ត្រូវពង្រឹងការហ្វឹកហ្វឺន រៀនសូត្រ និងការកសាងប្រភពធនធានមនុស្ស ទាំងបរិមាណ និងគុណភាព ដើម្បីបម្រើដល់កិច្ចការពារជាតិឱ្យមានប្រសិទ្ធភាព ជាពិសេសអង្គភាពយោធាទាំងអស់ ត្រូវពង្រឹងការបង្កើនជំនាញដល់យោធាឱ្យស្របតាមភារកិច្ច»។ សម្ដេចធិបតី បានចាត់ទុកការងារហ្វឹកហ្វឺន គឺជាការធ្វើទំនើបកម្មមួយរបស់រាជរដ្ឋាភិបាលកម្ពុជាក្នុងវិស័យការពារជាតិ ខណៈទំនើបកម្មចំនួន២ផ្សេងទៀត ក៏ត្រូវបានយកចិត្តទុកដាក់ ពោល គឺទំនើបកម្មហេដ្ឋារចនាសម្ព័ន្ធ និងទំនើបកម្មគ្រឿងបំពាក់។

នៅចំពោះមុខនាយទាហាន នាយទាហានរង និងពលទាហាន នៃកងយោធពលខេមរភូមិន្ទ សម្ដេចធិបតី នាយករដ្ឋមន្ត្រី ក៏បានជំរុញធ្វើយ៉ាងណាឱ្យកងទ័ពកម្ពុជា ត្រូវតែជាកងទ័ពដែលមានវិជ្ជាជីវៈខ្ពស់ ស្មោះត្រង់ចំពោះជាតិមាតុភូមិ និងប្រជាជន និងយកអស់ស្មារតីគោរពឱ្យបានម៉ឺងម៉ាត់រាល់បទបញ្ញត្តិ សារាចរណែនាំ លក្ខន្តិកៈនៃកងយោធពលខេមរភូមិន្ទ ក៏ដូចជាលិខិតបទដ្ឋានគតិយុត្តនានា ហើយប្រកាន់ខ្ជាប់នូវសេចក្ដីថ្លៃថ្នូរបស់កងយោធពលខេមរភូមិន្ទ សំដៅប្រែក្លាយជាកម្លាំងដ៏ពិតប្រាកដនៃខឿនការពារជាតិមាតុភូមិ និងប្រជាជនកម្ពុជា។

សម្ដេចធិបតី ក៏បានផ្ដល់អនុសាសន៍ដល់គ្រប់អង្គភាពយោធា នៃកងយោធពលខេមរភូមិន្ទទាំងអស់ ត្រូវបន្តយកចិត្តទុកដាក់បំផុតទៅលើការប្រើប្រាស់កម្លាំង ធនធានទ្រព្យសម្បត្តិរបស់អង្គភាពឱ្យបានស្ថិតស្ថិរ និងមានប្រសិទ្ធភាព។ ក្នុងន័យនេះ សម្ដេចធិបតី បានណែនាំឱ្យមានការប្រើប្រាស់កម្លាំងឱ្យសមស្របតាមតម្រូវការ និងជំនាញ ព្រមទាំងត្រូវគ្រប់គ្រង ថែរក្សាគ្រឿងសព្វាវុធ បរិក្ខាយោធាគ្រប់បែបយ៉ាង ទាំងស្បៀងអាហារ ជាដើម ឱ្យបានត្រឹមត្រូវ និងគង់វង្ស។

ទន្ទឹមនេះ សម្ដេចនាយករដ្ឋមន្ត្រី ក៏បានស្នើឱ្យអង្គភាពទាំងអស់ យកចិត្តទុកដាក់ត្រៀមកម្លាំង មធ្យោបាយ សម្ភារៈគ្រប់បែបយ៉ាង ដើម្បីចូលរួមជួយសង្គ្រោះប្រជាពលរដ្ឋ នៅពេលមានគ្រោះភ័យជាយថាហេតុណាមួយ ដោយត្រូវមានស្មារតីបុរេសកម្ម ព្រមទាំងសហការឱ្យបានស្និទ្ធិរមួតជាមួយអាជ្ញាធរដែនដី និងក្រសួងស្ថាប័នពាក់ព័ន្ធ៕