អគ្គនាយកដ្ឋានអត្តសញ្ញាណកម្ម ដាក់ប្រអប់ទទួលពាក្យបណ្ដឹងពីពលរដ្ឋ ដើម្បីពង្រឹងការផ្តល់សេវា

ឧត្តមសេនីយ៍ឯក សាយ ម៉េងឈាង អគ្គនាយករង និងជាប្រធានក្រុមប្រចាំការសេវាកម្មអត្តសញ្ញាណកម្ម និងប្រតិកម្មរហ័សនៃអគ្គនាយកដ្ឋានអត្តសញ្ញាណកម្ម បានដឹកនាំក្រុមការងារចុះបើក និងដាក់ប្រអប់សំបុត្រទទួលមតិយោបល់ និងពាក្យបណ្តឹងផ្សេងៗនៅទីស្នាក់ការផ្តល់លិខិតឆ្លងដែនខេត្តបន្ទាយមានជ័យ និងខេត្តបាត់ដំបង។

ការចុះដាក់ប្រអប់សំបុត្រទទួលមតិយោបល់ និងពាក្យបណ្ដឹងពេលនេះ អនុវត្តតាមគោលការណ៍ណែនាំរបស់លោកឧត្តមសេនីយ៍ឯក បណ្ឌិត តុប នេត អគ្គនាយកនៃអគ្គនាយកដ្ឋានអត្តសញ្ញាណកម្ម សំដៅពង្រឹងការងារផ្តល់សេវា ក៏ដូចជាទទួលបាននូវមតិយោបល់ ឬពាក្យបណ្តឹងផ្សេងៗពីពលរដ្ឋដែលមកទទួលសេវា ដើម្បីយកមកដោះស្រាយប្រកបដោយប្រសិទ្ធភាព។

បើតាមការលើកឡើងរបស់ឧត្តមសេនីយ៍ឯក សាយ ម៉េងឈាង ប្រអប់សំបុត្រនេះ នឹងទទួលយកនូវរាល់មតិយោបល់ ឬពាក្យបណ្តឹងទាំងអស់របស់ប្រជាពលរដ្ឋ ដើម្បីពិនិត្យ ដោះស្រាយ និងរាយការណ៍ជូនថ្នាក់ដឹកនាំបានជ្រាប ដែលលោក បញ្ជាក់ថា នេះជាយន្តការបន្ថែមពីលើយន្តការដែលកំពុងអនុវត្តជាប្រចាំថ្ងៃរបស់អគ្គនាយកដ្ឋានអត្តសញ្ញាណកម្ម។ យន្តការនានាដែលអគ្គនាយកដ្ឋានអត្តសញ្ញាណកម្មកំពុងតែអនុវត្ត មានជាអាទិ៍៖ មន្ត្រីប្រចាំការរង់ចាំទទួលដោះស្រាយ តាម រយៈ App កម្មវិធី GDI eservices និងតាមរយៈលេខទូរស័ព្ទប្រចាំការ ១២៧១ ឬ ០១៧ ៨៩៨ ៩១៥ ព្រមទាំងទំព័រហ្វេសប៊ុកផ្លូវការរបស់អគ្គនាយកដ្ឋានអត្តសញ្ញាណកម្ម។

ក្នុងឱកាសជួបប្រជុំជាមួយថ្នាក់ដឹកនាំ និងមន្ត្រីនៃសាខាផ្ដល់លិខិតឆ្លងដែនប្រចាំខេត្តបន្ទាយមានជ័យ និងខេត្តបាត់ដំបង កាលពីថ្ងៃទី១៩ និងថ្ងៃទី២០ ខែវិច្ឆិកា ឆ្នាំ២០២៣ ឧត្តមសេនីយ៍ឯក អគ្គនាយករង ក៏បានណែនាំដល់មន្ត្រីផ្តល់សេវាជួរមុខទាំងអស់ត្រូវបំពេញភារកិច្ចការងារឱ្យមានប្រសិទ្ធភាព ដោយប្រកាន់ខ្ជាប់នូវវិន័យការងារ ក្រមសីលធម៌វិជ្ជាជីវៈ គោរពពេលវេលាការងារ ប្រើប្រាស់ពាក្យសម្តីសមរម្យ ហើយត្រូវស្លៀកពាក់ឯកសណ្ឋានឱ្យបានគ្រប់លក្ខណៈឱ្យសាកសមជាមន្ត្រីផ្តល់សេវាជួរមុខ៕