កម្ពុជាបានដកស្រង់បទពិសោធល្អៗពីសិង្ហបុរី លើការងារគ្រប់គ្រងអត្តសញ្ញាណកម្ម

អគ្គនាយកដ្ឋានអត្តសញ្ញាណកម្មរបស់កម្ពុជា ប្រមូលបានមេរៀន និងបទពិសោធល្អៗពីគំរូប្រទេសសិង្ហបុរីលើការងារគ្រប់គ្រងអត្តសញ្ញាណកម្ម និងការកសាងអត្តសញ្ញាណឌីជីថលជាតិ ដោយផ្ដោតលើការផ្ដល់សេវាអត្តសញ្ញាណឌីជីថលដល់ប្រជាពលរដ្ឋខ្មែរឱ្យបានទូលំទូលាយ។

មេរៀន និងបទពិសោធទាំងនេះ ប្រមូលបានតាមរយៈដំណើរទស្សនកិច្ចសិក្សារបស់ប្រតិភូអគ្គនាយកដ្ឋានអត្តសញ្ញាណកម្ម ដឹកនាំដោយលោកឧត្តមសេនីយ៍ឯក តុប នេត ជាអគ្គនាយក អមដំណើរដោយលោក Amir Khan តំណាងនៃអង្គការ UNDP ប្រចាំកម្ពុជា និងលោក Romain Santon នាយករងអង្គការ Vital ដែលទស្សនកិច្ចនេះ បានធ្វើឡើងកាលពីសប្ដាហ៍កន្លងទៅ ពោលគឺមានរយៈពេល៣ថ្ងៃ ពីថ្ងៃទី១១ ដល់ថ្ងៃទី១៣ ខែមីនា ឆ្នាំ២០២៦។

តាមលទ្ធផលដែលទើបបង្ហាញឱ្យដឹងកាលពីថ្ងៃទី២១ ខែមីនា ដោយក្រុមអ្នកនាំពាក្យក្រសួងមហាផ្ទៃ ទស្សនកិច្ចសិក្សានេះ ក្នុងគោលបំណងសិក្សាអំពីបទពិសោធលើការងារគ្រប់គ្រងអត្តសញ្ញាណកម្ម និងការកសាងអត្តសញ្ញាណឌីជីថលជាតិ ដោយកម្មវិធី Singpass។

ប្រតិភូអគ្គនាយកដ្ឋានអត្តសញ្ញាណ នៃក្រសួងមហាផ្ទៃកម្ពុជា បានចុះឈ្វេងយល់អំពីប្រព័ន្ធគ្រប់គ្រងអត្តសញ្ញាណកម្ម តាមរយៈលេខកូដសម្គាល់អត្តសញ្ញាណ (NRIC) ដោយផ្តល់ជូនប្រជាជនសិង្ហបុរីចាប់តាំងពីកើត រហូតដល់មរណភាព និងការអនុវត្តគោលនយោបាយឌីជីថល “ប្រទេសឆ្លាតវៃ (Smart Nation)” ដោយផ្តោតលើការជំរុញនវានុវត្តន៍ និងការប្រើប្រាស់បច្ចេកវិទ្យាឌីជីថល ដើម្បីលើកកម្ពស់ការអភិវឌ្ឍសេដ្ឋកិច្ចឌីជីថលនៅក្នុងប្រទេសសិង្ហបុរី និងក្នុងតំបន់។

ប្រតិភូ ក៏ទទួលបានមេរៀន និងបទពិសោធន៍លើការរៀបចំគម្រោងវិនិយោគពង្រឹងសមត្ថភាពស្ថាប័នរយៈពេលវែង ផ្តោតលើការរៀបចំគំរូហិរញ្ញប្បទានច្បាស់លាស់ និងឈ្វេងយល់ពីកិច្ចសហការរបស់ប្រទេសសិង្ហបុរី និងមជ្ឈមណ្ឌលសកលរបស់អង្គការ UNDP (UNDP-GC-TISD) លើការងារឌីជីថល ការប្រើប្រាស់បច្ចេកវិទ្យាAI និងការរៀបចំហេដ្ឋារចនាសម្ព័ន្ធឌីជីថលសាធារណៈ ដោយផ្តោតលើកិច្ចសហការនាពេលអនាគតបន្ថែមទៀតរវាងអគ្គនាយកដ្ឋានអត្តសញ្ញាណកម្ម ជាមួយអង្គការ UNDP លើការពង្រឹងសមត្ថភាពមន្ត្រី និងការគាំទ្របច្ចេកទេសទៅលើការរៀបចំកម្មវិធីអត្តសញ្ញាណកម្មខ្មែរអេឡិចត្រូនិក។

លោកឧត្តមសេនីយ៍ឯក បណ្ឌិត តុប នេត អគ្គនាយកនៃអគ្គនាយកដ្ឋានអត្តសញ្ញាណកម្ម បានលើកឡើងថា ទស្សនកិច្ចសិក្សានៅប្រទេសសិង្ហបុរី ដែលជាប្រទេសឈានមុខលើអត្តសញ្ញាណឌីជីថល រយៈពេល៣ថ្ងៃកន្លងមកនេះ គឺទទួលបានលទ្ធផលដ៏ល្អប្រសើរ ដ្បិតថាអង្គភាពពាក់ព័ន្ធការងារអត្តសញ្ញាណកម្ម និងអត្តសញ្ញាណឌីជីថលសិង្ហបុរី បានចែករំលែកនូវបទពិសោធល្អៗដល់អគ្គនាយកដ្ឋានអត្តសញ្ញាណកម្ម។

តាមលោក តុប នេត សិង្ហបុរី បានចែករំលែកលើការរៀបចំកម្មវិធីអត្តសញ្ញាណកម្មខ្មែរអេឡិចត្រូនិក ដើម្បីលើកកម្ពស់នូវការផ្តល់សេវាអត្តសញ្ញាណកម្មឌីជីថលជូនប្រជាពលរដ្ឋខ្មែរគ្រប់រូបឱ្យបានទូលំទូលាយ មានភាពបត់បែន និងជឿទុកចិត្តបាន ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ផ្តោតលើអាទិភាព “មនុស្ស និងបច្ចេកវិទ្យា” ក្នុងចំណោមអាទិភាពទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា”៕