ព័ត៌មានជាតិ

ចែករំលែកបទពិសោធន៍ ទៅបន្តសុពលភាពអត្តសញ្ញាណបណ្ណសញ្ជាតិខ្មែរថ្មី ដំណើរការយ៉ាងណា?

បានផុស

៣ ខែ មុន

នៅ

ថ្ងៃអង្គារ ៧ មេសា ២០២៦

ដោយ

ពលរដ្ឋខ្មែរដែលគ្រប់អាយុ ១៥ ឆ្នាំ អាចទៅធ្វើអត្តសញ្ញាណបណ្ណសញ្ជាតិខ្មែរ ដើម្បីអាចយកប្រើប្រាស់ជាផ្លូវការស្របតាមច្បាប់។ អត្តសញ្ញាណបណ្ណសញ្ជាតិខ្មែរមានសុពលភាព ១០ ឆ្នាំ ហើយផុតរយៈពេលកំណត់ ពលរដ្ឋត្រូវទៅស្នើសុំបន្តសុពលភាពប្រើប្រាស់ថ្មីឡើងវិញ។

ពាក់ព័ន្ធការស្នើសុំបន្តសុពលភាពអត្តសញ្ញាណបណ្ណសញ្ជាតិខ្មែរ ក្រុមការងារកម្ពុជាថ្មីមានអត្ថបទចង់ចែករំលែកបទពិសោធន៍ពីលំហូរក្នុងការបន្តសុពលភាពអត្តសញ្ញាណបណ្ណសញ្ជាតិខ្មែរ ក្រោយបានចុះទៅស្នើសុំបន្តសុពលភាពអត្តសញ្ញាណបណ្ណសញ្ជាតិខ្មែរដែលផុតសុពលភាពនៅផ្សារទំនើបអ៊ីអន ៣ ខណ្ឌមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅជាន់ទី ៣ នៃផ្សារទំនើបអ៊ីអន ៣ មានជ័យ នៅខាងមុខទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរ មានរៀបចំបែងចែកគំនូស ដើម្បីឲ្យពលរដ្ឋឈរតម្រង់ជួរតាមអាទិភាពអ្នកមកមុនចូលមុន។ ប៉ុន្តែក្នុងនោះក៏ផ្តល់អាទិភាពសម្រាប់ជនចាស់ជរា ស្រ្តីមានផ្ទៃពោះ ជនពិការ និងអ្នកមានកូនក្មេងតូចៗ។

ក្រោយតម្រង់ជួរមួយសន្ទុះ ឃើញមានមន្រ្តីបានដើរមកណែនាំដល់អ្នកដែលកំពុងឈរតម្រង់ជួរពីលំហូរការងារ សម្រាប់ការស្នើសុំបន្តសុពលភាពអត្តសញ្ញាណបណ្ណសញ្ជាតិខ្មែរ ឬអ្នកដែលបាត់ឬត្រូវមកកែតម្រូវទិន្នន័យអត្តសញ្ញាណបណ្ណ។ ក្នុងនោះក៏សង្កេតឃើញមានអ្នកមកទទួលអត្តសញ្ញាណបណ្ណថ្មីដែលត្រូវឈរជួរផ្សេងគ្នា និងច្រកចូលខុសគ្នា។

ឆ្លងកាត់បទពិសោធន៍ផ្ទាល់របស់ក្រុមការងារកម្ពុជាថ្មី ពាក់ព័ន្ធដំណើរការស្នើសុំបន្តសុពលភាពអត្តសញ្ញាណបណ្ណសញ្ជាតិខ្មែរត្រូវឆ្លងកាត់ ៦ ដំណាក់កាល៖

ដំណាក់កាលទី ១

កន្លែងផ្តល់ព័ត៌មាន៖ នេះជាទីតាំងដំបូងគេដែលត្រូវឆ្លងកាត់។ ក្រោយតម្រង់ជួរដើរចូលក្នុងការិយាល័យ មានមន្រ្តីមួយរូបបានឈររង់ចាំដើម្បីទទួលអត្តសញ្ញាណបណ្ណដែលផុតសុពលភាពរបស់ពលរដ្ឋដើម្បីយកទៅថតចម្លង និងចែកសលាកបត្រព័ត៌មានដើម្បីបំពេញ ក្នុងនោះក៏មានការបោះត្រានិងផ្តិតមេដៃបញ្ជាក់នៅលើឯកសារនោះផងដែរ។

(បញ្ជាក់៖ ការស្នើសុំបន្តសុពលភាពអត្តសញ្ញាណបណ្ណសញ្ជាតិខ្មែរថ្មី ពលរដ្ឋអាចភ្ជាប់យកទៅតែជាមួយអត្តសញ្ញាណបណ្ណចាស់ (ច្បាប់ដើម) ដែលផុតសុពលភាព តែក្នុងករណីមានការកែតម្រូវទិន្នន័យក្នុងអត្តសញ្ញាណបណ្ណឧទាហរណ៍ការដូរអាសយដ្ឋានជាដើម ត្រូវភ្ជាប់ជាមួយសៀវភៅស្នាក់ ឬសៀវភៅគ្រួសារ ឬលិខិតបញ្ជាក់ទីលំនៅ)។

សលាកបត្រព័ត៌មានត្រូវបំពេញ

ដំណាក់កាលទី ២

កន្លែងបំពេញឯកសារ៖ នៅទីតាំងបំពេញឯកសារ មានរៀបចំតុបញ្ឈរសម្រាប់ពលរដ្ឋឈរបំពេញ។ នៅលើសលាកបត្រព័ត៌មាន (សូមបំពេញអាសយដ្ឋានតាមអត្តសញ្ញាណបណ្ណ សៀវភៅស្នាក់នៅ ឬសៀវភៅគ្រួសារ ហាមបំពេញយកអាសយដ្ឋានផ្ទះជួល ឬផ្ទះបងប្អូន ឬកន្លែងធ្វើការ)។

(បញ្ជាក់៖ នៅក្នុងសលាកបត្រព័ត៌មាន ក៏តម្រូវឲ្យបំពេញលេខអត្តសញ្ញាណបណ្ណឪពុកនិងម្តាយ។ ករណីនេះគួរថតចម្លងឬថតទុកឲ្យរួចស្រេច ដើម្បីយកទៅបំពេញឲ្យបានត្រឹមត្រូវ។

ដំណាក់កាលទី ៣

កន្លែងយកខ្ចៅដៃ៖ ក្រោយបំពេញនៅលើសលាកបត្រព័ត៌មានរួច ត្រូវយកទៅដាក់នៅលើកញ្ច្រែងតុមន្ត្រីកន្លែងយកខ្ចៅដៃ (អាចមានមន្ត្រីណែនាំបន្ថែម) រួចរង់ចាំស្ដាប់មន្រ្តីហៅឈ្មោះដើម្បីឈរតម្រង់ជួរយកខ្ចៅដៃ។ ដំណើរការយកខ្ចៅដៃត្រូវផ្តិតទាំងម្រាមខាងឆ្វេង និងខាងស្តាំ (ម្រាម ៥ ទាំងសងខាង)។

ដំណាក់កាលទី ៤

ទីតាំងត្រួតពិនិត្យឯកសារ៖ កន្លែងនេះមានការវាស់កម្ពស់ ហើយត្រូវរង់ចាំមន្រ្តីហៅតាមលេខរៀង។

ដំណាក់កាលទី ៥

ទីតាំងពិនិត្យផ្តល់៖ កន្លែងនេះមន្រ្តីនឹងពិនិត្យបន្ថែមលើឯកសារ និងអាចសាកសួរផ្ទៀងផ្ទាត់ព័ត៌មានដែលបានបំពេញ។

ដំណាក់កាលទី ៦

កន្លែងបន្ទប់ថតរូប៖ នេះជាដំណាក់កាលចុងក្រោយនៃលំហូរការស្នើសុំបន្តសុពលភាពការធ្វើអត្តសញ្ញាណបណ្ណសញ្ជាតិខ្មែរ។ ពេលដើរចូលបន្ទប់ថតរូប មន្រ្តីណែនាំឲ្យអង្គុយកៅអីតាមលេខរៀងដើម្បីត្រៀមថតរូប។

(ក្នុងបន្ទប់ថតរូប ក៏មានកញ្ចក់បញ្ឈរតូចមួយដែលអ្នកមកស្នើសុំអាចសារ៉េមុខ ឬសក់ឲ្យបានសមរម្យមុនចាប់ផ្តើមថតរូប)។

ក្នុងដំណើរការថតរូប ដំបូងត្រូវស្កេនម្រាមដៃចំនួន ៤ ទាំងម្រាមខាងឆ្វេងនិងខាងស្តាំ បន្ទាប់មកត្រូវស្កេនមេដៃផ្គួបម្តងពីរចុងក្រោយ។ ក្រោយថតរូបចប់ គឺត្រូវស៊ីញ៉ែប៊ិចអេឡិចត្រូនិកនៅលើម៉ាស៊ីន។

ក្នុងដំណាក់ថតរូបនេះ មន្រ្តីអាចណែនាំអ្នកកាន់លេខរៀងបន្ទាប់ឲ្យឡើងឈរទន្ទឹមក្បែរអ្នកកំពុងថតរូបនៅខាងមុខ ដើម្បីអាចដឹងពីដំណើរការការងារ និងត្រៀមថតរូបបន្តបន្ទាប់គ្នា។

ក្រើនរំលឹកបន្ថែម៖ ក្នុងដំណាក់កាលថតរូប មន្រ្តីនឹងវាយបញ្ចូលទិន្នន័យចូលទៅប្រព័ន្ធកុំព្យូទ័រ។ ខណៈមន្រ្តីវាយទិនុ្នន័យបញ្ចូលក្នុងប្រព័ន្ធកុំព្យូទ័រ មានស្រ្គីនមូនីទ័របង្ហាញព័ត៌មានដែលមន្រ្តីបានកំពុងវាយបញ្ចូលទិន្នន័យចូលទៅក្នុងគំរូអត្តសញ្ញាណបណ្ណថ្មី ដែលនេះជាដំណាក់កាលសំខាន់ដែលពលរដ្ឋដែលមកស្នើសុំបន្តសុពលភាពអត្តសញ្ញាណ ត្រូវពិនិត្យផ្ទៀងផ្ទាត់ដោយយកចិត្តទុកដាក់ និងអាចស្នើសុំកែតម្រូវភ្លាមៗក្រែងមានការបញ្ចូលទិន្នន័យខុស។

ក្រោយបញ្ចប់ទាំង ៦ ដំណាក់កាល គឺរួចរាល់នៃដំណើរការស្នើសុំបន្តសុពលភាពអត្តសញ្ញាណបណ្ណសញ្ជាតិខ្មែរថ្មី។ ជាចុងក្រោយពលរដ្ឋនឹងទទួលបានចុងសន្លឹក ដើម្បីរង់ចាំថ្ងៃទទួលអត្តសញ្ញាណបណ្ណសញ្ជាតិខ្មែរថ្មី ដើម្បីយកទៅប្រើប្រាស់ជាផ្លូវការ។

ក្នុងចុងសន្លឹកឃើញមានបញ្ជាក់ ក្រោយដាក់ពាក្យស្នើសុំ ពលរដ្ឋនឹងទទួលបានអត្តសញ្ញាណបណ្ណថ្មីក្នុងរយៈពេល ២១ ថ្ងៃនៃថ្ងៃធ្វើការ។

ការរៀបរាប់ចែករំលែកបទពិសោធន៍នេះ គឺជាដំណើរការស្នើសុំបន្តសុពលភាពអត្តសញ្ញាណបណ្ណសញ្ជាតិខ្មែរនៅផ្សារទំនើបអ៊ីអន ៣ មានជ័យ ខណៈការធ្វើអត្តសញ្ញាណបណ្ណសញ្ជាតិខ្មែរ ពលរដ្ឋក៏អាចទៅធ្វើនៅតាមទីតាំងផ្សេងទៀតដែលអាជ្ញាធរបានរៀបចំពង្រាយមានដូចជា៖

-នៅប៉ុស្តិ៍នគរបាលរដ្ឋបាលឃុំ/សង្កាត់ នៃលំនៅឋានសាមីខ្លួនកំពុងរស់នៅ ឬ
-នៅអធិការដ្ឋាននគរបាលក្រុង/ស្រុក/ខណ្ឌ នៃលំនៅឋានសាមីខ្លួនកំពុងរស់នៅ ឬ
-នៅស្នងការដ្ឋាននគរបាលរាជធានី/ខេត្ត នៃលំនៅឋានសាមីខ្លួនកំពុងរស់នៅ ឬ
-នៅទីស្នាក់ការ ក្នុងផ្សារទំនើបអ៊ីអន២ ខណ្ឌសែនសុខ (AEON II) ឬ
-នៅទីស្នាក់ការ ក្នុងផ្សារទំនើបអ៊ីអន៣ ខណ្ឌមានជ័យ (AEON III) ឬ
-នៅទីស្នាក់ការ បេឡាជាតិសន្តិសុខសង្គម (ប.ស.ស.) ខណ្ឌសែនសុខ ឬ
-នៅនាយកដ្ឋានអត្តសញ្ញាណប័ណ្ណសញ្ជាតិខ្មែរ អគ្គនាយកដ្ឋានអត្តសញ្ញាណកម្ម ខណ្ឌច្បារអំពៅ រាជធានីភ្នំពេញ។