ក្រុមភ្ញៀវទេសចរអូស្ត្រាលីបានមកដល់ខេត្តសៀមរាបជាមួយការទទួលសា្វគមន៍យ៉ាងកក់ក្តៅ

នៅយប់ថ្ងៃទី២៤ ខែវិច្ឆិកា ឆ្នាំ២០២៣ យន្តហោះខ្នាតធំ បូអ៉ីង៧៧៧ លើកដំបូងដែលហោះត្រង់ពីទីក្រុងស៉ីដនី ប្រទេសអូស្ត្រាលី បានមកចុះនៅខេត្តសៀមរាប ដោយដឹកអ្នកដំណើរចំនួន២០៨នាក់ និងក្រុមហោះហើរចំនួន ១៦នាក់ សរុប ២២៤នាក់។

លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានអញ្ជើញទៅទទួលស្វាគមន៍ជើងហោះហើរដឹកអ្នកដំណើរតាមផ្លូវអាកាសហោះហើរត្រង់ចេញពីទីក្រុងស៉ីដនី ប្រទេសអូស្ត្រាលីនេះ នៅអាកាសយានដ្ឋានអន្តរជាតិសៀមរាបអង្គរ(SAI) វេលាម៉ោង ១៨:៤០នាទីល្ងាច ដោយមានការចូលរួមពីគណៈប្រតិភូ ដែលជាថ្នាក់ដឹកនាំ និងក្រុមការងារបច្ចេកទេស នៃរដ្ឋលេខាធិការដ្ឋានអាកាសចរណ៍ស៊ីវិល ថ្នាក់ដឹកនាំខេត្តសៀមរាប អាជ្ញាធរពាក់ព័ន្ធ និងប្រតិបត្តិករអាកាសយានដ្ឋានអន្តរជាតិសៀមរាបអង្គរផងដែរ។

ការរៀបចំពិធីស្វាគមន៍ជើងហោះហើរនេះ គឺបានបញ្ជាក់ពីលទ្ធភាព និងសមត្ថភាពគ្រប់គ្រាន់របស់អាកាសយានដ្ឋានអន្តរជាតិសៀមរាបអង្គរ ក្នុងការទទួលជើងហោះហើរត្រង់ពីតំបន់ឆ្ងាយៗ ដូចជាប្រទេសអូស្រ្តាលី នាថ្ងៃនេះ និងអាចទទួលការចុះចតអាកាសយានធុនធំបានផងដែរ៕

ដោយ៖ គឿនវេត