ព័ត៌មានជាតិ

ម្ចាស់សំណង់សង់ក្បែរដងស្ទឹងសង្កែអះអាងសំណង់របស់ខ្លួនសាងសង់មានច្បាប់អនុញ្ញាតិ

បានផុស

១ year មុន

នៅ

ថ្ងៃចន្ទ ៤ ធ្នូ ២០២៣

ដោយ

បន្ទាប់ពីកាសែតកម្ពុជាថ្មីបានធ្វើការចុះផ្សាយកាលពីថ្ងៃទី ២៩ ខែវិច្ឆិកា ឆ្នាំ២០២៣ ស្ដីអំពីសំណង់រឹងមួយកន្លែងដែលស្ថិតនៅក្បែរដងស្ទឹងសង្កែ ក្នុងភូមិឡឥដ្ឋសង្កាត់ព្រែកព្រះស្ដេច ក្រុងបាត់ដំបង រួចមកទើបម្ចាស់សំណង់មួយនេះសុំធ្វើការបំភ្លឺដើម្បីឲ្យមជ្ឈដ្ឋាននានាបានជ្រាប។

កាលពីថ្ងៃទី ៣០ ខែវិច្ឆិកា លោក ឡុង ផលគុណ ប្រធានមន្ទីរធនធានទឹកនិងឧតុនិយមខេត្តបាត់ដំបងដែលជាម្ចាស់សំណង់រឹងមួយនេះបានលើកឡើងថា ទីតាំងរបស់លោកដែលសាងសង់សំណង់មួយនេះគឺមានប្លង់កម្មសិទ្ធិត្រឹមត្រូវ ហើយក៏មានច្បាប់អនុញ្ញាតលេខ ៣០៦ ដនស/អសណ ចុះថ្ងៃទី ០៨ ខែសីហា ឆ្នាំ២០២៣ ចេញដោយក្រសួងដែនដីនគររូបនីយកម្ម សំណង់ និងសុរិយោដី ដោយក្រសួងបានកំណត់លើការសាងសង់កម្ពស់ ៩ ជាន់ ស្មើនឹង ៣៨,៤២ ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង ផលគុណ បានបន្ថែមទៀតថា ការសាងសង់សំណង់មួយនេះគឺលោកបានដាក់ក្រុមវិស្វករមកពីរាជធានីភ្នំពេញ ដើម្បីសិក្សាយ៉ាងម៉ត់ចត់ ដូច្នេះលោកក៏សូមអំពាវនាវដល់ប្រជាពលរដ្ឋដែលនៅជិតខាងក្បែរគ្នាកុំមានការព្រួយបារម្ភអំពីហេតុការណ៍ណាមួយដែលនឹងកើតឡើងជាយថាហេតុឲ្យសោះ។ ឯការសាងសង់បន្តទៅលើទៀតនោះគឺត្រូវបានបញ្ចប់ហើយនៅសល់តែដំបូលប៉ុណ្ណោះ រីឯឆ្នេរស្ទឹងដែលមានគម្លាតពីសំណង់របស់លោកប្រមាណ ៣០ ម៉ែត្រនោះលោកក៏មានបំណងរៀបចំនិងកែប្រែច្រាំងស្ទឹងឲ្យមានសោភ័ណភាពផងដែរ។

ពាក់ព័ន្ធបញ្ហាសំណង់ដ៏មានកម្ពស់ស្កឹមស្កៃមួយនេះ កន្លងទៅលោក ស៊ិម វត្ថា ប្រធានការិយាល័យសំណង់នៃមន្ទីរដែនដីនគរូបនីយកម្មខេត្តបាត់ដំបងបានឲ្យកម្ពុជាថ្មីថា ទីតាំងនេះលោកជាមួយនឹងក្រុមការងារបានចុះទៅផ្អាកការកសាងម្តងរួចមកហើយ ដើម្បីត្រួតពិនិត្យទៅតាមលក្ខណៈផ្លូវច្បាប់ព្រោះសំណង់ស្ថិតនៅលើដីក្បែរដងស្ទឹងសង្កែ។ ប៉ុន្តែក្រោយពីបានចុះសិក្សាសង្កេតឃើញថា ម្ចាស់ទីតាំងមានប័ណ្ណកម្មសិទ្ធិស្របច្បាប់ដោយទីតាំងប្លង់មានចម្ងាយពីច្រាំងស្ទឹងសង្កែប្រមាណជាង ២០ ម៉ែត្រ ហើយម្ចាស់បានអះអាងមានច្បាប់ពីក្រសួងផងដែរ។ ឯការសាងសង់បន្តក្នុងគម្រោងពី ៧ ជាន់ ទៅ ៨ ជាន់ ប៉ុន្តែនៅក្នុងច្បាប់អនុញ្ញាតទៅលើកម្ពស់នៃការសាងសង់នេះ គឺលោកគ្រាន់តែឮម្ចាស់សំណង់និយាយតែប៉ុណ្ណោះ ដោយលោកមិនបានឃើញការកំណត់កម្ពស់នៅក្នុងច្បាប់អនុញ្ញាតនៃការសាងសង់នោះឡើយ៕

អត្ថបទ៖ សោ និយមរ័ត្ន

Related Topics:ខេត្តបាត់ដំបង