គល់រាំង ប្រភេទត្រីកម្រមួយក្បាល ទម្ងន់ ៨,៥ គីឡូ ត្រូវបានលែងចូលទន្លេវិញ​

ត្រីគល់រាំងមួយក្បាល​ទម្ងន់ ៨,៥ គីឡូ ប្រវែង ០,៦៥ ម៉ែត្រ ដែលជាប្រភេទត្រីកម្រ ត្រូវបានមន្ត្រី​ជលផល​ទទួល​យកមកលែងចូលទន្លេវិញនៅ​ឃុំប្រល័យមាស​ ស្រុកកំពង់លែង ខេត្តកំពង់ឆ្នាំង នៅរសៀលថ្ងៃទី ២៥ ខែធ្នូ ឆ្នាំ ២០២៣។

​លោក លី ឡា នាយខណ្ឌរដ្ឋបាលជលផលខេត្តកំពង់ឆ្នាំងបានឲ្យដឹងថា៖ នៅម៉ោង៧ ព្រឹក ថ្ងៃទី ២៥ ខែធ្នូ ឆ្នាំ២០២៣ នៅចំណុចវាលភក់ ក្នុងភូមិសាស្រ្តភូមិក្រម៉ាល់ ឃុំប្រឡាយមាស ស្រុកកំពង់លែង ប្រជាពលឈ្មោះ សុខ ជ្រុយ ភេទប្រុស អាយុ ៤៧ ឆ្នាំ រស់នៅភូមិក្រងផ្តឹល ឃុំប្រឡាយមាស ស្រុកកំពង់លែង ខេត្តកំពង់ឆ្នាំង បានជូនដំណឹងថា នេសាទបានត្រីគល់រាំងមួយក្បាល ជាប់លប បន្ទាប់ពីទទួល​បានដំណឹង​នេះ លោកបានរាយការណ៍មកជំនាញជលផលដើម្បី​យកត្រីនេះលែងចូល​ដែននេសាទ​វិញ។

លោក លី ឡា បានបញ្ជាក់ទៀតថា ត្រីគល់រាំងជាប្រភេទត្រីទឹកសាបមានប្រភពនៅក្នុងព្រះរាជាណាចក្រកម្ពុជា​ ហើយ​ត្រីប្រភេទត្រីនេះត្រូវការពារដោយក្រឹត្យច្បាប់លេខ ៣៣ ក្រ.ច ស្តីពីការគ្រប់គ្រងវិស័យជលផលក្នុងជំពូក ២ មាត្រា ១៨។ ខេត្តបានបង្កើតតំបន់ការពារអន្លង់ត្រីជាច្រើននៅតាមទន្លេមេគង្គ ដើម្បីអភិរក្សពូជត្រីជិតផុតពូជនេះ។

ដូច្នេះប្រជាពលរដ្ឋពេលនេសាទបានត្រីប្រភេទនេះសូមចូលរួមលែងវាចូលក្នុងទន្លេវិញដើម្បីរួមគ្នាអភិរក្សពូជត្រីនេះឲ្យ បាន​សម្បូរ និងគង់វង្សរហូតដល់ទៅសម្រាប់កូនចៅជំនាន់​ក្រោយ៕

អត្ថបទ៖ ឈៀងថារិទ្ធ