ព័ត៌មានជាតិ

វិទ្យាស្ថានជាតិសហគ្រិនភាព និងនវានុវត្តន៍ ត្រៀមរួចរាល់សម្រាប់បង្រៀនជំនាញវិជ្ជាជីវៈដល់យុវជនមកពីគ្រួសារក្រីក្រ

បានផុស

៣ years មុន

នៅ

ថ្ងៃព្រហស្បតិ៍ ២៨ ធ្នូ ២០២៣

ដោយ

កាលពីថ្ងៃទី ២៧ ខែធ្នូ ឆ្នាំ ២០២៣ លោក តាន់ កុសល នាយកវិទ្យាស្ថានជាតិសហគ្រិនភាព និងនវានុវត្តន៍ បានលើកឡើងថា វិទ្យាស្ថាន បានត្រៀមខ្លួនរួចជាស្រេចក្នុងការបើកជាផ្លូវការវគ្គបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅពាក់កណ្ដាលខែមករា ឆ្នាំ ២០២៤ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានគូសបញ្ជាក់ថា ចាប់តាំងពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានប្រកាសដាក់ឲ្យអនុវត្តជាផ្លូវការនូវការបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់ កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ វិទ្យាស្ថាន បានទទួលយុវជនមកចុះឈ្មោះចូលរៀនចំនួន ១ ៦៤៦ នាក់ លើជំនាញចំនួន ៩ មានដូចជា ផលិតនំ ធុរកិច្ចភេសជ្ជៈ ធ្វើម្ហូប សេវាកម្មសម្អាងកាយ ម៉ាស៊ីនត្រជាក់ អគ្គិសនី ក្រាហ្វិកឌីសាញ សេវាកម្មកុំព្យូទ័រ និងការតបណ្ដាញទឹកក្នុងអគារ។

លោកបន្តថា វិទ្យាស្ថានជាតិសហគ្រិនភាព និងនវានុវត្តន៍ នឹងបើកថ្នាក់ដំបូងក្នុងការបណ្ដុះបណ្ដាលជំនាញវិជ្ជាជីវៈទៅដល់សិស្សដែលចុះឈ្មោះចូលរៀននៅថ្ងៃទី ១៥ ខែមករា ឆ្នាំ ២០២៤ ខាងមុខ។ ហើយវិទ្យាស្ថាន បានរៀបចំទាំងសម្ភារៈ ថ្នាក់រៀន រោងជាង បន្ទប់ពិសោធន៍ និងគ្រូបណ្ដុះបណ្ដាល ដែលពោរពេញទៅដោយសមត្ថភាពផងដែរ។ លោកបន្ថែមថា «ជំនាញទាំងអស់របស់វិទ្យាស្ថាន ជាជំនាញដែលសិស្សមានការងារធ្វើល្អសមរម្យ និងទទួលបានប្រាក់កម្រៃច្រើន នៅពេលដែលពួកគេបញ្ចប់ការសិក្សានៅទីនេះ»។

គួរបញ្ជាក់ថា កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ឲ្យអនុវត្តជាផ្លូវការនូវការបណ្ដុះបណ្ដាលជំនាញវិជ្ជាជីវៈ និងបច្ចេកទេស ទៅដល់គ្រួសារក្រីក្រ និងគ្រួសារងាយរងហានិភ័យ ១,៥ លាននាក់ ដែលការបណ្ដុះបណ្ដាលនេះ មានរយៈពេល ៤ ខែ សិក្សាដោយឥតគិតថ្លៃ។ ដោយឡែក យុវជនមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានប្រាក់ឧបត្ថម្ភប្រចាំខែចំនួន ២៨ ម៉ឺនរៀល រហូតដល់រៀនចប់ផងដែរ។

ទន្ទឹមនេះ លោក តាន់ កុសល បានអំពាវនាវទៅដល់យុវជនដែលមិនទាន់ចុះឈ្មោះចូលរៀនស្វែងយល់អំពីជំនាញវិជ្ជាជីវៈ និងបច្ចេកទេស ហើយនាំគ្នាមកចុះឈ្មោះចូលរៀនឲ្យបានគ្រប់ៗ គ្នា៕