ព័ត៌មានជាតិ

ប្រទះសម្បុកកន្ធាយជិតផុតពូជលើពិភពលោក យកមករក្សាទុកនៅទីតាំងភ្ញាស់ដោយសុវត្ថិភាព

បានផុស

៣ years មុន

នៅ

ថ្ងៃសុក្រ ២៩ ធ្នូ ២០២៣

ដោយ

សម្បុកសត្វកន្ធាយក្បាលកង្កែបមួយសម្បុកមានពងប្រមាណ ២៩ គ្រាប់ និងជាសម្បុកទីមួយក្នុងរដូវកាលពងកូនត្រូវបានក្រុមការងារបច្ចេកទេសនៃអង្គការសមាគមអភិរក្សសត្វព្រៃយកមករក្សាទុកនៅទីតាំងភ្ញាស់ដែលមានសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សត្វកន្ធាយក្បាលកង្កែបត្រូវបានចាត់ថ្នាក់ជាប្រភេទសត្វកំពុងរងគ្រោះ ដោយអនុក្រឹត្យរាជរដ្ឋាភិបាលលេខ ១២៣ អនក្រ.បក ចុះថ្ងៃទី ១២ ខែសីហា ឆ្នាំ២០០៩ និងក្នុងបញ្ជីក្រហមនៃអង្គការ IUCN ដែលជាប្រភេទសត្វកំពុងរងគ្រោះនិងជិតផុតពូជនៅលើពិភពលោក។ សត្វកម្រនេះត្រូវបានរកឃើញសារជាថ្មីម្ដងទៀតនៅចន្លោះពីស្រុកសំបូរខេត្តក្រចេះ រហូតដល់ស្រុកសៀមបូកខេត្តស្ទឹងត្រែងមានចម្ងាយប្រមាណ ៥០ គីឡូម៉ែត្រ។

ស្របពេលជាមួយគ្នានេះ អង្គការសមាគមអភិរក្សសត្វព្រៃ WCS មានក្ដីសោមនស្សដែលសមាជិកសហគមន៍បានយល់ដឹងលើការងារអភិរក្សធនធានជលផលជិតផុតពូជ ជាពិសេសការងារការពារនិងអភិរក្សកន្ធាយក្បាលកង្កែប។ ទាំងនេះសបញ្ជាក់ឲ្យឃើញថា ការងារអប់រំផ្សព្វផ្សាយតាមមូលដ្ឋានពិតជាមានសារសំខាន់ ក្នុងការជួយដល់ការងារការពារ និងអភិរក្សជីវចម្រុះតាមដងទន្លេមេគង្គ រួមទាំងកន្ធាយក្បាលកង្កែបផងដែរ។

សូមបញ្ជាក់ថា ការចាប់ការប្រមូលពង ការលក់ ការទិញ ការហូប ការរក្សាទុក និងការដឹកជញ្ជូនកន្ធាយក្បាលកង្កែបពីដែនទឹកធម្មជាតិ ជាអំពើល្មើសច្បាប់ ហើយជនដែលប្រព្រឹត្តល្មើសនឹងត្រូវផ្ដន្ទាទោសតាមច្បាប់ជាធរមាន៕