ឆ្នាំ ២០២៣ គ្រោះមហន្តរាយកើតឡើងជាង ១ ពាន់លើក បណ្ដាលឱ្យមនុស្សស្លាប់ ជាង ១ រយនាក់

នៅ​ក្នុង​ឆ្នាំ ២០២៣ គ្រោះ​មហន្តរាយ​ធម្មជាតិ បាន​កើត​ឡើង​ជាង ១០០០ លើក បណ្តាល​ឱ្យ​មនុស្ស​ស្លាប់ និង​របួស​ជាង ៤០០ នាក់ ព្រមទាំង​បំផ្លាញ​ផ្ទះសម្បែង​ជិត ២ ម៉ឺន​ខ្នង។

លោក សុទ្ធ គឹមកុលមុនី អ្នកនាំពាក្យ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បាន​មាន​ប្រសាសន៍​នៅ​ព្រឹក​ថ្ងៃ​ទី ០៦ មករា នេះ​ថា ឆ្នាំ ២០២៣ គ្រោះ​មហន្តរាយ​ធម្មជាតិ​រួមមាន ៖ ខ្យល់​កន្ត្រាក់ រន្ទះបាញ់ និង​អគ្គិភ័យ បាន​កើត​ឡើង​ចំនួន ១០១៨ លើក បណ្តាល​ឱ្យ​មនុស្ស​ស្លាប់​ចំនួន ១២៣ នាក់ រង​របួស ២៧៨ នាក់ និង​បំផ្លាញ​ផ្ទះសម្បែង​ជិត ១៨០០០ ខ្នង ព្រមទាំង​តូប​ផ្សារ ឃ្លាំង​ទំនិញ សាលារៀន និង​អគារ​រដ្ឋបាល​មួយ​ចំនួន​ទៀត។

លោក​បាន​បន្ត​ថា ក្នុង​នោះ​រន្ទះបាញ់​កើតឡើង​ចំនួន ១៤៣ លើក បណ្តាល​ឱ្យ​ខូចខាត​ផ្ទះ ១៦ ខ្នង ស្លាប់ ៨៤ នាក់ របួស ៥៩ នាក់ និង​ងាប់​គោក្របី ១០៧ ក្បាល។ ចំណែក​ខ្យល់​កន្ត្រាក់​កើតឡើង​ចំនួន ៣០៤ លើក បណ្តាល​ឱ្យ​រលំ​ផ្ទះ ២០៣៤ ខ្នង របើក​ដំបូល​ផ្ទះ ១៥៤៤៩ ខ្នង សាលារៀន ៩៥ ខ្នង តូប​ផ្សារ ៨០ តូប អគារ​រដ្ឋបាល ៤០ អគារ ស្លាប់​មនុស្ស ៩ នាក់ និង​របួស ១៧៥ នាក់។ រីឯ​អគ្គិភ័យ​កើតឡើង​ចំនួន ៥៧១ លើក បណ្តាល​ឱ្យ​ឆេះ​ផ្ទះ ៦៣៦ ខ្នង តូប​ផ្សារ ៤៩៩ តូប​ឃ្លាំងទំនិញ ១៤ សាលារៀន ១ ខ្នង រោងចក្រ​សិប្បកម្ម ១១ កន្លែង អគារ​រដ្ឋបាល ១៤ កន្លែង ស្លាប់​មនុស្ស ៣០ នាក់ និង​របួស ៤៤ នាក់។

លោក​បាន​បន្ត​ទៀត​ថា ចំនួន​គ្រោះ​មហន្តរាយ​ធម្មជាតិ​ឆ្នាំ ២០២៣ បើ​ធៀប​ទៅ​នឹង​ឆ្នាំ ២០២២ កន្លងទៅ ឃើញ​ថា មាន​ការ​កើន​ឡើង​គួរ​ឱ្យ​កត់សម្គាល់ ដោយ​ឆ្នាំ ២០២២ មាន​គ្រោះ​មហន្តរាយ​កើត​ឡើង​ចំនួន ៧៧៤ លើក បណ្តាល​ឱ្យ​មនុស្ស​ស្លាប់​ចំនួន ៨២ នាក់ និង​របួស ១៧៩ នាក់ បំផ្លាញ​ផ្ទះ​សម្បែង ១០៦៤៣ ខ្នង។ ក្នុង​នោះ​រន្ទះបាញ់​កើតឡើង​ចំនួន ១១០ លើក បណ្តាល​ឱ្យ​មនុស្ស​ស្លាប់ ៦៣ នាក់ របួស ៦៦ នាក់ ងាប់​គោក្របី ៩០ ក្បាល។ ខ្យល់​កន្ត្រាក់​កើតឡើង​ចំនួន ២១០ លើក បណ្តាល​ឱ្យ​រលំ​ផ្ទះ ១១១០ ខ្នង របើក​ដំបូល​ផ្ទះ ៩៥៣៣ ខ្នង ខូចខាត​សាលារៀន​ចំនួន ៦៤ ខ្នង តូប​ផ្សារ ១៣ តូប អគារ​រដ្ឋបាល ២៥ កន្លែង ស្លាប់​មនុស្ស ៣ នាក់ និង​របួស ៦៦ នាក់ និង​អគ្គិភ័យ​កើតឡើង​ចំនួន ៤៥៤ លើក បណ្តាល​ឱ្យ​ឆេះ​ផ្ទះ​ចំនួន ៧៣៧ ខ្នង តូប​ផ្សារ ១០០ តូប ឃ្លាំង​ទំនិញ ១៨ កន្លែង សាលារៀន ២ ខ្នង អគារ​រដ្ឋបាល ២ កន្លែង រោងចក្រ​សិប្បកម្ម ១២ កន្លែង ស្លាប់​មនុស្ស ១៦ នាក់ និង​របួស ៥៥ នាក់៕

អត្ថបទ ៖ សំអឿន