​កសិករក្នុងភូមិរអាង ខេត្តកំពង់ចាម ​ចាប់ផ្ដើមប្រមូល​ផល​ប៉ិកួៈជាង ៨០ តោន ចែកចាយទីផ្សារក្នុងស្រុក ​

​កសិករក្នុងឃុំរអាង ស្រុកកំពង់សៀម ខេត្តកំពង់ចាម បានចាប់ផ្ដើមប្រមូលផលប៉ិកួៈ ដែលមាន​ផ្ទៃដីជាង ២០ ហិកតា ​នៅដើមឆ្នាំ ២០២៤នេះ។ ទិន្នផលប៉ិកួៈ ​ទទួលបានប្រមាណ ៤ តោន ក្នុងមួយហិកតា ដែលកសិករអាចលក់បានតម្លៃ ៧០០ រៀល ក្នុងមួយ​គីឡូក្រាម ទាបជាងឆ្នាំមុន ៣០០ រៀល។

​លោក នួន ពេជ្រ អាយុ ៦១ ឆ្នាំ ​ជាកសិករ​ដាំប៉ិកួៈ ​​បានរៀបរាប់ឲ្យដឹងថា លោកដាំប៉ិកួៈតែកន្លះ​ហិកតា ​ប្រើពូជអស់ ២០ គីឡូក្រាម ​អាចប្រមូលផលមកវិញជាង ២ តោន។ ប៉ិកួៈងាយដាំ តែតម្រូវឲ្យកសិករឧស្សាហ៍ព្យាយាម មានពេលវាចាំថែសម្អាតស្មៅ ស្រោចទឹក បាញ់ថ្នាំសម្លាប់សត្វល្អិត ពូនរង កាត់ត្រូយ កាត់ផ្កា ទើបវាឲ្យផលល្អ។

បច្ចេកទេសកាត់ត្រូយ កាត់ផ្កា សំខាន់បំផុត គឺជួយឲ្យប៉ិកួៈមានមើមធំល្អ ខណៈប៉ិកួៈប្រើពេលដាំ ៣ ខែ និង១០ថ្ងៃ កសិករ​អាចប្រមូលផលបានហើយ បើយើងចង់ប្រមូលផលជាបន្តបន្ទាប់ យើងដាំឆ្លាស់ពេលខុសៗគ្នាទៅ នោះកសិករមានប៉ិគក់លក់រហូតដល់ខែមេសាទើបអស់។

វាមានទីផ្សារ ងាយលក់ មានឈ្មួញចុះទិញដល់ទីចម្ការ ពិសេសគេដឹកទៅលក់នៅភ្នំពេញតែម្តង។ ប៉ិកួៈមានសារៈប្រយោជន៍ដល់មនុស្ស សត្វ អាចហូបលេង ធ្វើជាស្នូលនំប៉ាវ នំក្រូចស្នូលប្រៃ ឆ្នៃតាមចិត្តចង់ ពិសេសទៀតគេទិញឲ្យសត្វ​ស្វាស៉ីជាអាហារទៀតផងដែរ។

លោក ម៉ន រ៉េត មេឃុំរអាង បានបញ្ជាក់ឲ្យដឹងថា ក្នុងឃុំមានចំនួន២ភូមិដែលដាំប៉ិកួៈ គឺភូមិរមូលដាំជាង៤ហិកតា និងភូមិរអាងក្រោមដាំជិត ២០ ហិកតា សរុបផ្ទៃដីអាចជាង២០ហិកតា។ យើងពិនិត្យជាក់ស្តែង ឃើញកសិករគាត់ដាំដំណាំ​៤ប្រភេទរួមមាន មានប៉ិកួៈ សណ្តែកដី ពោត និងល្ង វិលជុំរាល់ឆ្នាំ ព្រោះផលដំណាំនេះ មានទីផ្សារច្បាស់លាស់ កសិកររីករាយនិងបន្តផលិតទិន្នផលនេះ ប្រកបដោយគុណភាព និងគ្មានគីមី សម្រាប់សុខភាពយើងទាំងអស់គ្នា។

កសិករពេញនិយមកសិកម្មនេះ ព្រោះវាបានញាំងឲ្យមានសុវត្ថិភាពសេដ្ឋកិច្ចគ្រួសារយ៉ាងប្រសើរ ក្នុងឃុំមិនសូវមានពលរដ្ឋធ្វើចំណាកស្រុកនោះទេ៕

អត្ថបទ៖ សាន វិឡែម