Connect with us

ព័ត៌មានជាតិ

មន្ត្រីកសិកម្មខេត្តស្ទឹងត្រែង កុំឱ្យកសិករកាប់ស្វាយចន្ទី​ចោល ខណៈតម្លៃនឹងល្អឡើងវិញនៅពេលខាងមុខ

បានផុស

នៅ

មន្ទីរកសិកម្មជំរុញកសិករឱ្យសហគមន៍ស្វាយចន្ទីខេត្តស្ទឹងត្រែងខិតខំថែទាំដំណាំស្វាយចន្ទី ទៅតាមបច្ចេកទេស ដើម្បីទទួលបានទិន្នផលច្រើន ទោះបីការប្រមូលទិញគ្រាប់ស្វាយចន្ទី ឈ្មួញឱ្យតម្លៃទីផ្សារទាបក៏ដោយ តែយើងផលិតបានទិន្នផលច្រើន ប្រសើរជាងបានតិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែងបានឱ្យដឹងថា នៅដើមឆ្នាំ២០២៤ សង្កេតឃើញចម្ការស្វាយចន្ទីមួយចំនួនកសិករ មិនទាន់យកចិត្តទុកដាក់ថែទាំបានត្រឹមត្រូវទៅតាមបច្ចេកទេសទេ ច្រើនទុកឱ្យវាផ្លែទៅតាមធម្មជាតិតែប៉ុណ្ណោះ ហើយខ្លះទៀតបែរជាកាប់ឈូសឆាយចោល ហើយនាំគ្នាផ្លាស់ប្តូរប្រភេទដំណាំទៅវិញ។

លោកបន្តថា៖ ការធ្វើបែបនេះ នាំឱ្យខាតបង់សេដ្ឋកិច្ចរបស់គ្រួសារ ដែលយើង បានខិតខំប្រឹងប្រែងធ្វើការដាំដុះកន្លង​មក អញ្ចឹងទេខ្ញុំថា មន្ទីរសូមលើកទឹកចិត្ត បងប្អូនសុំរក្សាទុកនៅដដែល ទន្ទឹមនឹងនេះ គឺខិតខំការថែរក្សា ចន្ទីដែលមានស្រាប់ ធ្វើម៉េចពង្រឹងគុណភាពគ្រាប់របស់បងប្អូន លោកថា តម្លៃវានឹងមានការប្រសើរឡើងនៅពេលខាងមុខ។    

 

លោកស្រី ហេង ស្រីពេជ្រ  អាជីវករប្រមូលទិញគ្រាប់ស្វាយចន្ទីនៅក្រុងស្ទឹងត្រែង បានអះអាងថា៖ ក្រុមហ៊ុនប្រមូលទិញបានបែងចែកគ្រាប់ស្វាយចន្ទី M23 ជា២ប្រភេទ មានលេខ១ និងលេខ២ ចំណែកពូជ០៩ គិតតម្លៃផ្សេងព្រោះវាគ្រាប់តូចៗ ដោយសារទីផ្សារក្រៅប្រទេស បានដាក់តម្លៃទិញទាបជាងឆ្នាំ២០២៣។

លោក គិត ណារេត កសិករដាំស្វាយចន្ទី នៅឃុំស្រែក្រសាំង ស្រុកសៀមបូកបានទទួលស្គាល់ថា៖ គ្រាប់ស្វាយចន្ទីពូជ​M២៣នៅដើមរដូវលក់បានតម្លៃ៥២០០រៀលក្នុងមួយគីឡូក្រាម ហើយបច្ចុប្បន្នលក់បានតែ៤១០០ទៅ​៤២០០​រៀល ចំណែកគ្រាប់ពួជ០៩បានតម្លៃតែ៣៨០០តែប៉ុណ្ណោះ។

លោក ណែម គុន្ធា ប្រធានស្តីទីមន្ទីរពាណិជ្ជកម្ម ខេត្តស្ទឹងត្រែងបានបញ្ជាក់ថា៖ បញ្ហានេះមន្ទីរពាណិជ្ជកម្មបានទាក់ទងក្រុមហ៊ុន ឱ្យមកបោះទីតាំងប្រមូលទិញនៅក្នុងខេត្តជារៀងរាល់ឆ្នាំ និងតម្រូវឱ្យធ្វើកិច្ចសន្យាជាមួយប្រជាសហគមន៍កសិករ​​ចន្ទី ដើម្បីចុះកុងត្រាទិញ ធានាតម្លៃទីផ្សារជូនកសិករយើង។

លោកបានសំណូមពរទៅគ្រប់ម្ចាស់ដំណាំស្វាយចន្ទី គិតពីគុណភាពទិន្នផលដែលផលិតបាន ដើម្បីប្រកួតប្រជែងផ្នែកទីផ្សារ ជាពិសេសកសិករ ពេលដាំដុះត្រូវជ្រើសរើសពូជ ទៅតាមមន្ត្រីកសិកម្មបានណែនាំ ដើម្បីទទួលបានផលគ្រាប់ធំល្អ មានគុណភាពលក់បានថ្លៃ។

សូមបញ្ជាក់ថា៖ ទីតាំងទិញផលគ្រាប់ស្វាយចន្ទី នៅក្នុងខេត្តស្ទឹងត្រែងបច្ចុប្បន្នមានចំនួន៣៩កន្លែង ក្នុងនោះនៅក្រុងស្ទឹងត្រែង ៥កន្លែង ស្រុកសៀមបូក ៧កន្លែង សៀមប៉ាង៣កន្លែង សេសាន៦កន្លែង បុរីអូរស្វាយសែនជ័យ៣កន្លែង និងថាឡាបរិវ៉ាត់១៥កន្លែង កំពុងប្រមួលទិញសម្រាប់នាំចេញទៅប្រទេសវៀតណាមតែមួយប៉ុណ្ណោះ៕

អត្ថបទ៖ ងិនលីម

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម