ព័ត៌មានជាតិ

អ្នកស្រាវជ្រាវប្រទះឃើញប្រភេទឧរង្គសត្វសង្ស័យជាប្រភេទថ្មីសម្រាប់កម្ពុជានិងសកលលោក

បានផុស

២៩ វិនាទី មុន

នៅ

ថ្ងៃសុក្រ ២២ មីនា ២០២៤

ដោយ

ក្រុមអ្នកស្រាវជ្រាវនៃក្រសួងបរិស្ថានបានប្រទះឃើញ និងប្រមូលបាននូវប្រភេទឧរង្គសត្វ និងថលជលិកសត្វមួយចំនួននៅតំបន់ភ្នំថ្មកំបោរក្នុងភូមិសាស្រ្តស្រុកបាណន់ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់ពីថ្ងៃទី១៩ ខែមីនា ឆ្នាំ២០២៤ កន្លងមកនេះ ក្រុមមន្រ្តីជំនាញមកពីនាយកដ្ឋានជីវៈចម្រុះនៃអគ្គនាយកដ្ឋានគោលនយោបាយ និងយុទ្ធសាស្ត្រ ក្រសួងបរិស្ថាន សហការជាមួយអង្គការសត្វព្រៃ និងរុក្ខជាតិកម្ពុជា FFI បានចុះសិក្សាស្រាវជ្រាវពីប្រភេទឧរង្គសត្វ និងថលជលិកសត្វ នៅតាមបណ្តាភ្នំថ្មកំបោរដែលមានដូចជា ភ្នំសំពៅ ភ្នំក្តោង ភ្នំបាណន់ ភ្នំរំសាយសក់ ភ្នំតាគ្រាម ភ្នំក្រពើ និងភ្នំខ្ពស់ជាដើម ស្ថិតនៅក្នុងស្រុកបាណន់ ខេត្តបាត់ដំបង។

ក្នុងនោះបានប្រទះឃើញប្រភេទឧរង្គសត្វនិងថលជលិកសត្វមួយចំនួនដែលអ្នកជំនាញសង្ស័យថា អាចជាប្រភេទថ្មី ឬជាកំណត់ត្រាថ្មីសម្រាប់សកលលោក និងកម្ពុជាផងដែរ។ ការអះអាងនឹងត្រូវបញ្ជាក់បន្ថែមតាមរយៈការវិភាគធនធានពន្ធុ របស់សំណាកប្រភេទជីវៈចម្រុះទាំងនោះ ក្រោយពេលការសិក្សានិងប្រមូលទិន្នន័យនៅតាមទីវាលត្រូវបានបញ្ចប់។

យ៉ាងណាមិញ ទិន្នន័យជីវៈចម្រុះថ្មីដែលបានពីការសិក្សាពេលនេះ ជាព័ត៌មានគ្រឹះយ៉ាងសំខាន់ សម្រាប់គាំទ្រដល់ការអភិរក្សជីវៈចម្រុះ និងការរៀបចំផែនការគ្រប់គ្រងនិងអភិរក្សតំបន់ភ្នំថ្មកំបោរទាំងនោះនៅថ្ងៃអនាគតផងដែរ៕