ព័ត៌មានជាតិ

៤ ច្រកសំខាន់ ជាច្រកដឹកជញ្ជូនទំនិញដ៏មមាញឹកចេញចូលប្រទេសកម្ពុជា

បានផុស

១ year មុន

នៅ

ថ្ងៃចន្ទ ២៥ មីនា ២០២៤

ដោយ

ឯកសារផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា (២០២៣-២០៣៣) បានបង្ហាញពីច្រកដឹកជញ្ជូនចំនួន ៤ ជាច្រកដ៏សំខាន់បំផុតសម្រាប់ដឹកជញ្ជូនទំនិញចេញចូលប្រទេសកម្ពុជា។

ក្នុងឯកសារបានលើកឡើងពីកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ (ក្អមសំណរ) ច្រកព្រំដែនប៉ោយប៉ែត និងច្រកព្រំដែនបាវិត ដែលបានដើរតួនាទីជាច្រកដឹកជញ្ជូនទំនិញចម្បងចេញចូលប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទំនិញនាំចូលមានច្រើនប្រភេទ និងចម្រុះជាប្រភេទផលិតផលរ៉ែ (អំបិល ថ្ម ស៊ីម៉ងត៍ ធ្យូងថ្ម ប្រេងឥន្ធនៈជាដើម និងទំនិញកុងតឺន័រ ភាគច្រើនឆ្លងកាត់តាមកំពង់ផែស្វយ័តក្រុងព្រះសីហនុ និងតិចតួចចូលតាមច្រកអាកាសយានដ្ឋានអន្តរជាតិភ្នំពេញ។

ខណៈដែលផ្លូវជាតិលេខ១ លេខ៥ និងលេខ ៦ ជាច្រករបៀងសេដ្ឋកិច្ចភាគខាងត្បូងនៃមហាអនុតំបន់មេគង្គ ច្រកព្រំដែនក្រុងបាវិត និងប៉ោយប៉ែតបានដើរតួនាទីយ៉ាងសំខាន់បំផុតសម្រាប់វិស័យដឹកជញ្ជូនជាពិសេសទំនិញ។ ទំនិញភាគច្រើនដែលឆ្លងកាត់ច្រកព្រំដែនអន្តរជាតិទាំងពីរនេះ បែងចែកទៅជាពីរប្រភេទគឺប្រភេទទី ១ ជាគ្រឿងបន្លាស់/សម្ភារផ្សេងៗ (វត្ថុធាតុដើមឬពាក់កណ្ដាលសម្រេច) ដែលនាំចូលពីក្រុមហ៊ុនមេក្នុងប្រទេសថៃ/វៀតណាម ឬការនាំចេញផលិតផលទៅប្រទេសទាំងនោះវិញជាផលិតផលសម្រេច ឬពាក់កណ្ដាលសម្រេចក្រោមយុទ្ធសាស្ត្រ “ថៃ+១” និង “វៀតណាម+១” និងប្រភេទទី២ ជាទំនិញដឹកជញ្ជូនឆ្លងកាត់ពីប្រទេសថៃ/វៀតណាម ទៅកាន់គោលដៅចុងក្រោយ ជាពិសេសចេញពីរាជធានីភ្នំពេញ។

រីឯច្រករបៀងឆ្លងកាត់ពីភ្នំពេញទៅខេត្តព្រះសីហនុ ជារបៀងសេដ្ឋកិច្ចដ៏សំខាន់តភ្ជាប់រាជធានីភ្នំពេញទៅកំពង់ផែស្វយ័តក្រុងព្រះសីហនុដែលជាច្រកដង្ហើមសេដ្ឋកិច្ចកម្ពុជាចេញទៅកាន់ទីផ្សារអន្តរជាតិ។

នៅឆ្នាំ២០២៣ កម្ពុជាសម្រេចបានទំហំពាណិជ្ជកម្មអន្តរជាតិ ៤៦,៨ ពាន់លានដុល្លារ។ ផលិតផលឧស្សាហកម្មកាត់ដេរនៅតែជាទំនិញនាំមុខគេក្នុងការនាំចេញ។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋាករ។

របាយការណ៍គយ និងរដ្ឋាករបានបង្ហាញថា ចិនគឺជាដៃគូពាណិជ្ជកម្មដ៏សំខាន់របស់កម្ពុជានៅឆ្នាំ២០២៣ ដោយទំហំពាណិជ្ជកម្មកម្ពុជា-ចិន មានជាង ១២ ពាន់លានដុល្លារ ខណៈដែលអាមេរិក ជាដៃគូសំខាន់ទី២ មានទំហំពាណិជ្ជកម្មជាង ៩ ពាន់លានដុល្លារ។ ក្រៅពីនេះ មានវៀតណាម ថៃ ជប៉ុន ឥណ្ឌូនេស៊ី អាល្លឺម៉ង់ កាណាដា និងប្រទេសមួយចំនួនទៀតសរុប ២០ ប្រទេស ដែលជាដៃគូពាណិជ្ជកម្មដ៏សំខាន់របស់កម្ពុជា៕