​អាកាសយានដ្ឋាន​ចំនួន ០៨ ចុះបញ្ជីនៅកម្ពុជា មាន ៣ កំពុងដាក់ឲ្យ​ដំណើការ​

បច្ចុប្បន្ននេះ អាកាសយានដ្ឋាន​ដែលបានចុះបញ្ជីមានចំនួន ០៨ នៅកម្ពុជា ក្នុងនោះមាន ០៣ កំពុងដាក់​ឲ្យ​ដំណើរការ​ពេញ​លេញ​រួមមាន៖ អាកាសយានដ្ឋានអន្តរជាតិភ្នំពេញ សៀមរាប និង​ព្រះសីហនុ។

ដោយឡែក អាកាសយានដ្ឋានស៊ីវិលក្នុងស្រុកចំនួន ៥ ដែលមិនទាន់​ដំណើរការ​មាន៖ អាកាសយានដ្ឋាន​បាត់ដំបង ស្ទឹងត្រែង កោះកុង និង​មណ្ឌលគិរី ខណៈអាកាសយានដ្ឋានកំពង់ឆ្នាំងកំពុង​ប្រើប្រាស់និង​គ្រប់គ្រងរួមគ្នាដោយរដ្ឋលេខាធិការដ្ឋានអាកាសចរស៊ីវិល និងក្រសួងការពារជាតិ។ នេះបើតាម​ឯកសារ​ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣។

អាកាសយានដ្ឋានទាំងនេះប្រតិបត្តិការជាចម្បងសម្រាប់យន្តហោះកម្រិត C និង D។ ដោយសារ​តែ​តម្រូវការ​នៃការ​ហោះហើរ​រយៈចម្ងាយ​ឆ្ងាយ និងផ្លូវហោះហើរដែលមានរំហូរអ្នកដំណើរច្រើន ផ្លូវហោះ​មួយចំនួនដំណើរការដោយ​យន្តហោះកម្រិត E ដូចជា A333 និង B777 លើសពី​បទដ្ឋាន​បច្ចេកទេស​ដែល​មិន​ស្របនឹងដំណើរការសុវត្ថិភាព និងការធានាប្រតិបត្តិការនៃអាកាសយានដ្ឋាន។

បើតាម​ឯកសារ​ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-​២០៣៣ ​ជើងហោះហើរអន្តរជាតិពីកម្ពុជាភាគច្រើន ផ្តោតលើការហោះហើរនៅក្នុងតំបន់អាស៊ីអាគ្នេយ៍។ ប្រទេសគោលដៅដែល​មាន​ជើងហោះហើរត្រង់ច្រើន​ជាងគេគឺប្រទេសចិន។ បច្ចុប្បន្ននេះ កម្ពុជាពុំមានការហោះហើរត្រង់ទៅកាន់ទ្វីបអឺរ៉ុប សហរដ្ឋអាម៉េរិក អាហ្វ្រិក និងអាស៊ីខាងត្បូងទេ។

ក្រុមហ៊ុន OCIC បានទទួលគោលការណ៍ឯកភាព​ពីរាជរដ្ឋាភិបាលក្នុងការ​វិនិយោគ​សាង​សង់ អាកាសយានដ្ឋានភ្នំពេញថ្មីក្នុងរូបភាពនៃភាពជាដៃគូរវាងរដ្ឋនិងឯកជន (OCIC ៩០% និង​រដ្ឋាភិបាល ១០%) តាមទម្រង់ “រចនាប្លង់ សាងសង់ ហិរញ្ញប្បទាន ធ្វើជាម្ចាស់កម្មសិទ្ធិ និង​ធ្វើ​ប្រតិបត្តិការ/design build finance own and operate (DBFOO)​”​។ គម្រោងអភិវឌ្ឍន៍នេះចែកចេញជា ០៣ ដំណាក់កាល ដោយដំណាក់កាល ទី១ ពីឆ្នាំ ២០១៩ ដល់ឆ្នាំ ២០៣០ ដំណាក់​កាលទី២ ពីឆ្នាំ​២០៣០ ដល់ឆ្នាំ២០៥០ និងដំណាក់កាលទី៣ បន្តពីឆ្នាំ២០៥០តទៅ។

ក្នុងដំណាក់កាលទី១ ផែនការមេអភិវឌ្ឍន៍អាកាសយានដ្ឋានភ្នំពេញថ្មីនឹងពង្រីក​សមត្ថភាព​ទទួល​ភ្ញៀវ​ចំនួន ១៣ លាននាក់/ឆ្នាំ ជាមួយសមត្ថភាពឆ្លងកាត់ទំនិញប្រមាណ ១៧៥ ០០០តោន ព្រម​ទាំងមានសមត្ថភាព​ទទួលយន្តហោះរហូតកម្រិត E (Code E:A-340-300, A350-900 and B777- 200/300ER, B747-300/400) និង​មានចំណតយន្តហោះចំនួន ២២។

បន្ទាប់ពីបញ្ចប់ដំណាក់កាលទី១ ក្រុមហ៊ុនអភិវឌ្ឍន៍គ្រោងសាងសង់ផ្លូវរត់ (2r runway) ទី២ និង​ហេដ្ឋារចនា​សម្ព័ន្ធផ្សេងៗពាក់ព័ន្ធបម្រើឱ្យ​យន្តហោះប្រើប្រាស់ taxiway)។ ផែនការអភិវឌ្ឍន៍នេះ​គ្រោង​ពង្រីក​សមត្ថភាពទទួលភ្ញៀវរហូតដល់ ៣០ លាននាក់/ឆ្នាំ នៅឆ្នាំ២០៥០ ជាមួយ​សមត្ថភាព​ឆ្លងកាត់​ទំនិញប្រមាណ ៥២៧ ០០០តោន។ ជាមួយគ្នានេះ ការអនុវត្តនៃផែនការមេអភិវឌ្ឍន៍អាកាសយានដ្ឋានអន្តរជាតិ​សៀមរាបអង្គរមានពីរ​ដំណាក់កាល ក្នុងនោះពីឆ្នាំ២០២០ ដល់២០២៣ មាន​ផែនការបង្កើនសមត្ថភាពទទួលភ្ញៀវប្រមាណ ៧ លាននាក់/ឆ្នាំ និងទំនិញឆ្លងកាត់ប្រមាណ ១០ ០០០ តោន/ឆ្នាំ ខណៈដំណាក់កាលបន្ទាប់ពីឆ្នាំ ២០២៣ គ្រោងបង្កើនសមត្ថភាពទទួលភ្ញៀវ ២០​លាននាក់/ឆ្នាំ និងទំនិញឆ្លងកាត់​ប្រមាណ ៦០ ០០០តោន/ឆ្នាំ។

ជារួម ការអភិវឌ្ឍឧស្សាហកម្មអាកាសចរណ៍នៅកម្ពុជា​នៅមានកម្រិតធៀបនឹងបណ្តាប្រទេសក្នុង តំបន់​អាស៊ាន ជាពិសេសដោយសារកង្វះខាតហេដ្ឋារចនាសម្ព័ន្ធរូបវន្ត។ ជាក់ស្ដែង បច្ចុប្បន្ននេះ​មានអាកាសយានដ្ឋានតែ ៣ ប៉ុណ្ណោះ នៅក្នុងប្រទេសកម្ពុជា ដែលមានសមត្ថភាព​ទទួលការ​ហោះហើរ​អន្តរជាតិ ជាមួយនឹងចំនួនជើងហោះហើរ និងទំនិញឆ្លងកាត់តិចតួច ព្រមទាំង​បណ្ដាញ​អាកាសចរណ៍​មានលក្ខណៈ មិនទាន់ពេញលេញ​ដែលរាំងស្ទះ​ដល់ការតភ្ជាប់​ជើងហោះហើរ​ជាមួយ​ប្រទេសនិង​តំបន់ជុំវិញ។

ជាមួយគ្នានេះកម្ពុជាមិនទាន់មានមធ្យោបាយ​ពេញលេញ និងភាពងាយស្រួល​គ្រប់គ្រាន់​លើផ្នែក​អាកាសចរណ៍​ក៏ដូចជា​ខ្វះការគាំទ្រគ្រប់គ្រាន់សម្រាប់ការផ្លាស់ប្ដូរជើងយន្តហោះអន្តរជាតិ និង​កិច្ចសហប្រតិបត្តិការ​សេដ្ឋកិច្ច និង ពាណិជ្ជកម្មអន្តរជាតិក្នុងវិស័យដឹកជញ្ជូនផ្លូវអាកាសជាដើម៕