រដ្ឋមន្រ្តីក្រសួងអធិការកិច្ច និងអភិបាលខេត្តកំពង់ចាម ធ្វើពិធីស្រង់ព្រះ ទោះចប់បុណ្យចូលឆ្នាំខ្មែរក៏ដោយ

រដ្ឋមន្រ្តីក្រសួងអធិការកិច្ច លោក ហួត ហាក់  និងលោក អ៊ុន ចាន់ដា អភិបាលខេត្តកំពង់ចាម បានអញ្ជើញធ្វើពិធីស្រង់ព្រះ នៅថ្ងៃទី១៧  ខែមេសា  ឆ្នាំ ២០២៤  នៅក្នុងបរិវេណវត្តគិរីវនារាម ហៅវត្តស្ទឹងត្រង់ ក្នុងស្រុកស្ទឹងត្រង់  ខេត្តកំពង់ចាម ។

បេីទោះបី ពិធីបុណ្យចូលឆ្នាំប្រពៃណីជាតិខ្មែរ  រយៈពេល បីថ្ងៃក៏ដោយ  សម្រាប់រដ្ឋបាលស្រុកស្ទឹងត្រង់  បានប្រារព្ធពិធីស្រង់ព្រះ  និងមានកម្មវិធីកម្សាន្តសប្បាយៗជាច្រេីន។ ដោយក្នុងនោះមានការអញ្ជេីញចូលរួមពីសំណាក់ លោក  ហួត ហាក់ រដ្ឋមន្រ្តីក្រសួងអធិការកិច្ច និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទឹងត្រង់ និងលោក  អ៊ុន ចាន់ដា អភិបាលខេត្តកំពង់ចាម នៅថ្ងៃទី១៧ ខែមេសាឆ្នាំ ២០២៤នេះ បានដឹកនាំប្រតិភូអមដំណើរ និងក្រុមការងារជាច្រើនទៀត។

ស្ថិតក្នុងបរិយាកាសសប្បាយរីករាយ នោះដែរ  សម្រាប់សង្ក្រាន្តស្ទឹងត្រង់  ក្រោយពីមានពិធីសាសនារួចមក  ថ្នាក់ដឹកនាំ  មន្ត្រីរាជការ  ពុទ្ធបរិស័ទ រួមបងប្អូនប្រជាពលរដ្ឋ  ទាំងជិតឆ្ងាយបានធ្វេីពិធីស្រង់ព្រះ  មិនតែប៉ុណ្ណោះ  មានការបាញ់ទឹក  រាំលេងកម្សាន្ត  ក្រោមដំបូលសុខសន្តិភាព។

 គូសបញ្ជាក់ថា  សម្រាប់វត្តស្ទឹងត្រង់នេះ  ពុទ្ធិបរិស័ទតែងតែនាំគ្នាមកវត្តនៅក្នុងថ្ងៃទី១៧មេសានេះ  ដើម្បីធ្វើពិធីស្រង់ព្រះដោយមានទឹកលាយជាមួយផ្កាភ្ញី ទឹកអប់ដើម្បីស្រោចស្រពដល់ព្រះបដិមា ឬអ្នកមានគុណ អ្នកមានឋានៈខ្ពង់ខ្ពស់ជាង ដោយបងប្អូនប្រជាពលរដ្ឋខ្មែរ លោក មានជំនឿតៗគ្នាយូរមកហើយថា ស្រង់ព្រះទាំងព្រះបដិមាថ្ម និងព្រះរស់ អ្នកមានគុណ សុទ្ធតែទទួលបានមកវិញនូវសេចក្ដីសុខចម្រើន ត្រជាក់ត្រជុំគ្រប់ក្រុមគ្រួសារ កាត់ផ្តាច់កម្មអកុសល លះបង់បាបអកុសលចាស់ៗ ចោល ហើយសាងនូវកុសលថ្មី៕

អត្ថបទ និងរូបភាព៖  ឡេក ចាន់ពេជ្រ