Connect with us

ព័ត៌មានជាតិ

​ពលរដ្ឋ ៦១ គ្រួសារសុំសិទ្ធិកាន់កាប់លើដីតំបន់ ៣ ដែលខ្លួនអាស្រ័យផលជាង ១០ ឆ្នាំកន្លងមក​

បានផុស

នៅ

កន្លងទៅថ្មីៗនេះក្រុមជំនាញខេត្តបាត់ដំបងបានចុះវាស់វែងធ្វើការកាត់ឆ្វៀលដី​តំបន់៣ទៅ​ឲ្យប្រជាពលរដ្ឋដែលអាស្រ័យ​ផល​កន្លងមក តាមអនុសាសន៍របស់ប្រមុខរាជរដ្ឋាភិបាល ក្នុងនោះក៏មានស្រុកមោងឬស្សីផងដែរ។

​ប៉ុន្តែអ្វីដែលគួរឲ្យកត់សម្គាល់គឺមានប្រជាពលរដ្ឋចំនួន ៦១ គ្រួសារ ដែលបានអាស្រ័យ​ផលបង្កបង្កើន​ផលរយៈពេលរាប់ឆ្នាំមកហើយ បែរជាពុំត្រូវបានការ​កាត់ឆ្វៀលដីពីសំណាក់​មន្ត្រីជំនាញឡើយ ដែលពួកគាត់ទាំងអស់គឺរស់នៅក្នុងភូមិដូនទ្រី ឃុំជ្រៃ ស្រុកមោងឬស្សី ខេត្តបាត់ដំបង។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមខ្លឹមសារដែលប្រជាពលរដ្ឋទាំងអស់បានធ្វើសំណើរផ្ញើជូនទៅគណៈអភិបាលខេត្ត តាមរយៈរដ្ឋបាលខេត្ត កាល ពីថ្ងៃទី ២ ខែមេសា ឆ្នាំ២០២៤ កន្លងទៅថ្មីៗនេះ គឺពួកគាត់បានលើកឡើងថា ដីស្រែនៅក្នុងតំបន់ ៣ ដែលពួកគាត់អាស្រ័យ​ផលជាង ១០ ឆ្នាំមកហើយនោះ គឺនៅចំណុច តានុបរាំង អូរពងកន្សោង បឹងយ៉ាប អូរតាចាន់ បឹងអាសាមសិប បឹងកណ្ដុរ បឹងសេក បឹងឃុនជិត និង អូររាំងអង្ក្រង ដែលចំណុចទាំងអស់ខាងលើនេះស្ថិតក្នុងភូមិដូនទ្រី ឃុំជ្រៃ ស្រុក​មោងឬស្សី។

តំណាងរបស់ពួកគាត់មានទាំងស្នាមមេដៃរបស់ប្រជាពលរដ្ឋទាំង ៦១ គ្រួសារផងនោះ បានសំណូមពរដល់លោកអភិបាលនៃគណៈអភិបាលខេត្តបាត់ដំបង មេត្តាជួយកាត់ឆ្វៀលដីតំបន់ ៣ ដែលពួកគាត់ធ្លាប់បានអាស្រ័យផលកន្លងមក ឱ្យពួកគាត់បានគ្រប់គ្រងដីទាំងនោះជាកម្មសិទ្ធិផ្ទាល់ខ្លួនផង ទៅតាមអនុសាសន៍ដ៏ខ្ពង់ខ្ពស់របស់ប្រមុខនៃរាជរដ្ឋាភិបាលកម្ពុជា។

លុះនៅថ្ងៃទី ១៩ ខែមេសា ម្សិលមិញនេះ តាមការទាក់ទងពីសំណាក់ប្រជាពលរដ្ឋមកកាន់រដ្ឋបាលខេត្តដែលជាកន្លែងទទួលពាក្យរបស់ប្រជាពលរដ្ឋ គឺបានឲ្យដឹងថា ឯកសាររបស់ពួកគាត់ត្រូវបានបញ្ជូនទៅកាន់ទីចាត់ការអន្តរវិស័យ សាលាខេត្តបាត់ដំបងហើយ ដើម្បីពិនិត្យទៅតាមលក្ខណៈបច្ចេកទេសរបស់ក្រុមជំនាញ។

តាមរយៈទូរសព្ទកាលពីម្សិលមិញនេះ លោក សាន ទិត្យវីរៈ នាយកទីចាត់ការអន្តរវិស័យ បានបញ្ជាក់ប្រាប់កម្ពុជាថ្មីថា ឯកសាររបស់ប្រជាពលរដ្ឋទាំង ៦១ គ្រួសារ គឺលោកបានទទួលហើយ ដោយបច្ចុប្បន្នលោកកំពុងពិនិត្យទៅលើឯកសារទាំងនោះ មុននឹងបន្តនីតិវិធី។

ដោយឡែកប្រជាពលរដ្ឋក៏បានសំណូមពរយ៉ាងទទូចដល់អាជ្ញាធរខេត្ត ក៏ដូចជាប្រមុខនៃរាជរដ្ឋាភិបាល ដើម្បីសុំឱ្យបានកាន់កាប់ដីធ្លីស្របច្បាប់ស្របពេលដែលរាជរដ្ឋាភិបាលចេញបទបញ្ជាឲ្យកាត់ឆ្វៀល ដីដែលពលរដ្ឋបានអាស្រ័យផលនាពេលកន្លងមក ព្រោះថ្មីៗនេះការកាត់ជ្វាលដីនៅតំបន់ខាងលើ គឺក្រុមជំនាញគេធ្វើឡើងតែប៉ុន្មានគ្រួសារប៉ុណ្ណោះ៕

អត្ថបទ៖ សោ និយមរ័ត្ន

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម