លោក គង់ ភោគ៖ ជំហរនយោបាយការបរទេសកម្ពុជាក្នុងអាណត្តិសម្ដេចធិបតី មិនខុសពីអាណត្តិសម្ដេចតេជោទេ

មន្ត្រីជាន់ខ្ពស់ក្រសួងការបរទេសកម្ពុជា បញ្ជាក់ថា ជំហរនយោបាយការបរទេសកម្ពុជា ក្នុងអាណត្តិដឹកនាំដោយសម្ដេចធិបតី ហ៊ុន ម៉ាណែត ជានាយករដ្ឋមន្ត្រី មិនខុសពីអាណត្តិដឹកនាំរបស់សម្ដេចតេជោ ហ៊ុន សែន អតីតនាយករដ្ឋមន្ត្រីឡើយ ពោលគឺបន្តរក្សានិរន្តរភាព និងជំរុញបន្ថែមទៀតរាល់ការងារអាទិភាព។  

លោក គង់ ភោគ រដ្ឋលេខាធិការក្រសួងការបរទេសកម្ពុជា បានលើកឡើងក្នុងវេទិកាពិភាក្សាជាមួយក្រុមអ្នកសារព័ត៌មាន ដែលរៀបចំឡើងដោយក្លិបអ្នកកាសែតកម្ពុជា នាព្រឹកថ្ងៃទី១២ ខែមិថុនា ឆ្នាំ២០២៤ ថា៖ «ជំហរគោលនយោបាយការបរទេសរបស់កម្ពុជា គឺរក្សាសង្គតិភាព និងនិរន្តរភាពនៃនយោបាយការបរទេសរបស់យើង ពីអាណត្តិមុនៗ ដែលដឹកនាំដោយសម្ដេចតេជោ អតីតនាយករដ្ឋមន្ត្រី។ ដូច្នេះ អ្វីដែលអាណត្តិថ្មីនេះ ត្រូវធ្វើ គឺជំរុញបន្ថែមទៀតរាល់ការងារអាទិភាពទាំងអស់នោះ»។

បើតាមលោក គង់ ភោគ ការងារអាទិភាពមួយចំនួន ដែលជាការងារសំខាន់សម្រាប់កិច្ចការបរទេសរបស់កម្ពុជា នៅក្នុងអាណត្តិថ្មីនេះ ក្រោមការដឹកនាំដោយសម្ដេចធិបតី ហ៊ុន ម៉ាណែត ជានាយករដ្ឋមន្ត្រី ក៏ដូចជាទៅអាណត្តិក្រោយៗទៀតនោះ គឺបន្តពង្រឹងទំនាក់ទំនងជាមួយដៃគូនានានៅជុំវិញពិភពលោក បន្តជំរុញការដំឡើងកម្រិតទំនាក់ទំនងឱ្យកាន់តែស៊ីជម្រៅរវាងកម្ពុជាជាមួយដៃគូ ក៏ដូចជាកិច្ចសហប្រតិបត្តិការជាមួយបណ្ដាប្រទេសផ្សេងៗទៀត ដើម្បីបម្រើដល់ប្រយោជន៍ស្នូលរបស់កម្ពុជា ឱ្យស្របតាមការលើកឡើងរបស់អតីតនាយករដ្ឋមន្ត្រី សម្ដេចតេជោ គឺរក្សាមិត្តចាស់ ពង្រឹងទំនាក់ទំនងបន្ថែមទៀតជាមួយមិត្តថ្មី។

លោករដ្ឋលេខាធិការ បន្ថែមថា រាជរដ្ឋាភិបាលកម្ពុជា ក៏នឹងបន្តលើកកម្ពស់ទំនាក់ទំនងជាមួយបណ្តាប្រទេសនៅជាប់ភូមិ ផងរបងជាមួយកម្ពុជា ដើម្បីរក្សាសន្តិសុខ ស្ថិរភាពតាមបន្ទាត់ព្រំដែន និងចូលរួមលើកកម្ពស់ទំនាក់ទំនងផ្នែកសេដ្ឋកិច្ច ពាណិជ្ជកម្ម សំដៅលើកកម្ពស់ជីវភាពពលរដ្ឋរស់នៅតាមបណ្តោយព្រំដែន។ លើសពីនេះ កម្ពុជា នឹងបន្តជំរុញតួនាទីរបស់ខ្លួននៅក្នុងអង្គការតំបន់ឱ្យកាន់តែសកម្ម និងពេញលេញ ដើម្បីជំរុញប្រយោជន៍របស់តំបន់ ក៏ដូចជាជំរុញប្រយោជន៍ស្នូលរបស់ជាតិផងដែរ៕