សម្ដេចតេជោ តែងតាំងមន្ត្រីការទូតមួយរូបទៀតឱ្យកាន់តំណែងនៅព្រឹទ្ធសភា

សម្ដេចតេជោ ហ៊ុន សែន បានសម្រេចតែងតាំងមន្ត្រីការទូតមួយរូបទៀតឱ្យកាន់តំណែងនៅព្រឹទ្ធសភា។ លោក ងួន សុខវេង ដែលជាមន្ត្រីជាន់ខ្ពស់ក្រសួងការបរទេស ត្រូវបានសម្ដេចតេជោ តែងតាំងមុខតំណែងជាអគ្គនាយកនៃអគ្គនាយកដ្ឋានពិធីការ និងទំនាក់ទំនងអន្តរជាតិ នៃអគ្គលេខាធិការដ្ឋានព្រឹទ្ធសភា។

មុនការតែងតាំង លោក ងួន សុខវេង មានតំណែងជាអគ្គនាយកនៃអគ្គនាយកដ្ឋានអាស៊ី-ប៉ាស៊ីហ្វិក ក្រសួងការបរទេសកម្ពុជា ហើយលោកក៏ធ្លាប់បំពេញតួនាទីជាឯកអគ្គរាជទូតកម្ពុជាប្រចាំប្រទេសសិង្ហបុរី ព្រមទាំងតួនាទីមួយចំនួនទៀតនៅក្រសួងការបរទេស ជាអាទិ៍ អគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ និងលេខាស្ថានទូត។ សម្រាប់តំណែងនៅព្រឹទ្ធសភាពេលនេះ គឺលោក ងួន សុខវេង មកជំនួសអគ្គនាយកចាស់ លោក ឈឹម សុទ្ធគុណ។

ក្រៅពីផ្លាស់ប្ដូរអគ្គនាយកពិធីការ និងទំនាក់ទំនងអន្តរជាតិ សេចក្ដីសម្រេចរបស់សម្ដេចតេជោ ប្រធានព្រឹទ្ធសភានៃកម្ពុជា ក៏បានផ្លាស់ប្ដូរ និងតែងតាំងមុខតំណែងអគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុថ្មីផងដែរ ដោយលោក ជាម សុផលមករា ត្រូវមកកាន់តំណែងជំនួសលោក ទេព ចាន់អុនវុធីរក្ស។

ពិធីប្រកាសចូលកាន់តំណែងអគ្គនាយកថ្មីទាំងពីរ របស់អគ្គលេខាធិការដ្ឋានព្រឹទ្ធសភា បានរៀបចំឡើងនាព្រឹកថ្ងៃទី១៣ ខែមិថុនា ឆ្នាំ២០២៤ ក្រោមអធិបតីលោក ប្រាក់ សុខុន អនុប្រធានទី១ ព្រឹទ្ធសភា និងលោក អ៊ុច បូររិទ្ធ អនុប្រធានទី២ ព្រឹទ្ធសភា ព្រមទាំងថ្នាក់ដឹកនាំអគ្គលេខាធិការដ្ឋានព្រឹទ្ធសភា។

ជាការកត់សម្គាល់ ក្នុងអាណត្តិដឹកនាំជាប្រធានព្រឹទ្ធសភានៃកម្ពុជា សម្ដេចតេជោ ហ៊ុន សែន បានទាញយកអ្នកការទូតឆ្នើមៗនៅក្រសួងការបរទេសជាច្រើនរូបមកឱ្យបំពេញការងារនៅស្ថាប័នព្រឹទ្ធសភា សម្រាប់អាណត្តិថ្មីនេះ៕