កម្ពុជា អាល្លឺម៉ង់ ពិគ្រោះយោបល់ ស្តីពី កិច្ចសហប្រតិបត្តិការអភិវឌ្ឍន៍ ឆ្នាំ២០២៤

ដោយទទួលការអនុញ្ញាតពី សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានអញ្ជើញចូលរួមក្នុងកិច្ចពិគ្រោះយោបល់ ស្តីពី កិច្ចសហប្រតិបត្តិការអភិវឌ្ឍន៍ ឆ្នាំ២០២៤ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធអាល្លឺម៉ង់។ នេះបើតាមការផ្ដល់ព័ត៌មានពី ក្រសួងសុខាភិបាល នៅថ្ងៃនេះ។

កិច្ចពិគ្រោះយោបលនេះ ប្រព្រឹត្តទៅក្រោមការដឹកនាំដោយសហប្រធាន លោក ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី២ ក្រុមប្រឹក្សាអភិវឌ្ឍន៍កម្ពុជា តំណាងរាជរដ្ឋាភិបាលកម្ពុជា និង លោក Stefan Messerer ឯកអគ្គរដ្ឋទូតសាធារណរដ្ឋសហព័ន្ធអាល្លឺម៉ង់ ប្រចាំព្រះរាជាណាចក្រកម្ពុជា តំណាងរដ្ឋាភិបាលសាធារណរដ្ឋសហព័ន្ធអាល្លឺម៉ង់ នាថ្ងៃទី២០ ខែមិថុនា ឆ្នាំ២០២៤ នេះ។

គោលបំណង នៃកិច្ចប្រជុំបានពិភាក្សាទៅលើ៖ ម៉ាក្រូសេដ្ឋកិច្ចកម្ពុជា ការអភិវឌ្ឍន៍ និងទស្សនវិស័យ, ក្របខ័ណ្ឌនយោបាយ, កិច្ចសហប្រតិបត្តិការផ្នែកហិរញ្ញវត្ថុ និងបច្ចេកទេស អំពីការគាំពារសុខភាពសង្គម និងគោលនយោបាយប្រជាជន ការបំរែបំរួលអាកាសធាតុ និងថាមពល និងការអភិវឌ្ឍន៍សេដ្ឋកិច្ចប្រកបដោយនិរន្តរភាព (Sustainable Economic Development), កម្មវិធីអភិវឌ្ឍន៍ហេដ្ឋារចនាសម្ព័ន្ធនៅជនបទសម្រាប់កម្ពុជា ដំណាក់កាលទី២, សមិទ្ធិផលដែលសម្រេចបានរហូតមកដល់បច្ចុប្បន្ន, និងជំហានបន្ទាប់ឆ្ពោះទៅមុខ។

ក្នុងកិច្ចប្រជុំនេះ មានការអញ្ជើញចូលរួមពីសំណាក់ តំណាងជាន់ខ្ពស់ពីក្រសួង-ស្ថាប័ន នៃរាជរដ្ឋាភិបាល រួមមាន៖ ក្រសួងសេដ្ឋកិច្ច និងហិរញ្ញវត្ថុ ក្រសួងសុខាភិបាល ក្រសួងមហាផៃ្ទ ក្រសួងការបរទេស និងសហប្រតិបត្តិការអន្តរជាតិ ក្រសួងការងារ និងបណ្តុះបណ្តាលវិជ្ជាជីវៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន ក្រសួងពាណិជ្ជកម្ម ក្រសួងយុត្តិធម៌ គណៈកម្មាធិការសហប្រតិបត្តិការអភិវឌ្ឍន៍កម្ពុជា ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្រសួងអភិវឌ្ឍន៍ជនបទ អគ្គិសនីកម្ពុជា ទីស្តីការគណៈរដ្ឋមន្ត្រី ក្រសួងផែនការ គណៈកម្មាធិការសិទ្ធិមនុស្សកម្ពុជា ក្រុមមេធាវីរាជរដ្ឋាភិបាល និងមានតំណាងស្ថានទូតអាល្លឺម៉ងប្រចាំកម្ពុជា តំណាងក្រសួងសហព័ន្ធអាល្លឺម៉ង់ សម្រាប់សហប្រតិបត្តិការសេដ្ឋកិច្ច និងការអភិវឌ្ឍ (BMZ) តំណាងទីភា្នក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិប្រចាំកម្ពុជា (GIZ) និងតំណាងធនាគារអភិវឌ្ឍន៍អាល្លឺម៉ង់ប្រចាំកម្ពុជា (KfW) ។