ព័ត៌មានជាតិ

រដ្ឋមន្ត្រីសុខាភិបាល ក្រើនរំលឹកមន្ត្រី ត្រូវខិតខំយកចិត្តទុកដាក់ផ្តល់សេវាជូនពលរដ្ឋ ប្រកបដោយក្រមសីលធម៌វិជ្ជាជីវៈ

បានផុស

២ years មុន

នៅ

ថ្ងៃព្រហស្បតិ៍ ២៧ មិថុនា ២០២៤

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានក្រើនរំលឹកដល់ថ្នាក់ដឹកនាំមន្ទីរពេទ្យគ្រប់បណ្តារាជធានី-ខេត្ត ត្រូវខិតខំផ្តោតសំខាន់លើការថែទាំ និងយកចិត្តទុកដាក់ក្នុងការផ្តល់សេវាសុខភាពជូនដល់ប្រជាពលរដ្ឋប្រកបដោយក្រមសីលធម៌វិជ្ជាជីវៈ ឱ្យមានប្រសិទ្ធភាពខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំការងារប្រចាំខែមិថុនា ឆ្នាំ ២០២៤ ដើម្បីពិនិត្យវឌ្ឍនភាពការងារ និងលើកទិសដៅការងារបន្ត ដើម្បីបង្កើនប្រសិទ្ធភាពការងារបន្ថែមទៀត កាលពីរសៀលថ្ងៃទី ២៦ មិថុនា លោករដ្ឋមន្ត្រី បានណែនាំដល់មន្ត្រីរាជការ និងបុគ្គលិកសុខាភិបាលទាំងអស់ ជាពិសេសថ្នាក់ដឹកនាំមន្ទីរពេទ្យគ្រប់បណ្តាថ្នាក់រាជធានី-ខេត្ត ត្រូវប្រកាន់ខ្ជាប់នូវស្មារតីទទួលខុសត្រូវខ្ពស់ ដោយត្រូវធ្វើការចុះពិនិត្យជាប្រចាំ ជាពិសេសខិតខំផ្តោតសំខាន់លើការថែទាំ និងយកចិត្តទុកដាក់ក្នុងការផ្តល់សេវាសុខភាពជូនដល់ប្រជាពលរដ្ឋប្រកបដោយក្រមសីលធម៌វិជ្ជាជីវៈ ឱ្យមានប្រសិទ្ធភាពខ្ពស់។

ទន្ទឹមនេះដែរ លោករដ្ឋមន្ត្រី ក៏បានណែនាំដល់ថ្នាក់ដឹកនាំជាប្រធានអង្គភាពទាំងអស់ សូមផ្តល់ការបណ្តុះបណ្តាលជំនាញបន្តដល់មន្ត្រីក្រោមឱវាទរបស់ខ្លួន ដើម្បីជំរុញការអនុវត្តការងារឱ្យកាន់តែរលូន និងនវានុវត្តន៍។

ក្នុងឱកាសនោះដែរ លោករដ្ឋមន្ត្រី ក៏បានជម្រាបជូនដល់ថ្នាក់ដឹកនាំ និងមន្ត្រីរាជការសុខាភិបាល ព្រមទាំងសូមពាំនាំនូវការកោតសរសើរជូនមន្ត្រីសុខាភិបាលទាំងអស់ ពីសំណាក់ លោក សាយអា ម៉ាអ៊ូ ពូកាឡា (Saia Mau Piukala) នាយកអង្គការសុខភាពពិភពលោកប្រចាំតំបន់អាស៊ីប៉ាស៊ីហ្វិកខាងលិច ក្នុងឱកាសលោកអញ្ជើញធ្វើដំណើរទស្សនកិច្ចនៅព្រះរាជាណាចក្រកម្ពុជា ចាប់ពីថ្ងៃទី ១៩ ដល់ថ្ងៃទី ២២ ខែមិថុនា ឆ្នាំ ២០២៤ ដែលឃើញពីភាពរីកចម្រើន និងនវានុវត្តន៍ក្នុងវិស័យសុខាភិបាលកម្ពុជា៕

អត្ថបទ ៖ សំអឿន