លោក ស សុខា បង្កើតក្រុមតាមដានការអនុវត្តរាល់គោលការណ៍ណែនាំដែលលោកដាក់ចេញ

នៅថ្ងៃទី២៨ ខែមិថុនា ឆ្នាំ២០២៤ រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស សុខា បានសម្រេចបង្កើតក្រុមការងារ ដើម្បីតាមដានការអនុវត្តគោលការណ៍ណែនាំដែលលោកដាក់ចេញ។

តាមសេចក្ដីសម្រេចរបស់លោកឧបនាយករដ្ឋមន្ត្រី ស សុខា ត្រូវបានចាត់តាំងលោក ទូច សុខៈ អ្នកនាំពាក្យរងក្រសួងមហាផ្ទៃ ជាប្រធាន លោក រ៉េន រតនៈ អ្នកនាំពាក្យផ្ទាល់លោកឧបនាយករដ្ឋមន្ត្រី ស សុខា ជាអនុប្រធាន និងអនុប្រធានមួយរូបទៀត គឺលោកស្រី លីម ជឹងហួន ព្រមទាំងសមាជិកចំនួន ៥រូប។

ក្រុមការងារតាមដាននេះ មានតួនាទីជាសេនាធិការផ្ទាល់របស់លោក ស សុខា ដោយមានភារកិច្ចប្រមូល និងរៀបចំជាបញ្ជីរាល់អនុសាសន៍របស់លោក ស សុខា ទាំងលិខិត និងផ្ទាល់មាត់ ហើយតាមដាន ពិនិត្យ វាយតម្លៃ ជំរុញការអនុវត្ត និងលើកយោបល់។

ក្រុមការងារនេះ ក៏ត្រូវតាមដាន វាយតម្លៃមតិត្រឡប់ពីមន្ត្រីចំណុះក្រសួងមហាផ្ទៃ និងមហាជនទូទៅចំពោះគោលការណ៍ណែនាំរបស់លោក ស សុខា ហើយទំនាក់ទំនងជាមួយអគ្គនាយកដ្ឋាន អង្គភាពនានាចំណុះក្រសួងមហាផ្ទៃ រដ្ឋបាលថ្នាក់ក្រោមជាតិ ស្នងការដ្ឋាន នគរបាលរាជធានី-ខេត្ត និងភាគីពាក់ព័ន្ធនានា និងរៀបចំកិច្ចប្រជុំ និងធ្វើរបាយការណ៍អំពីវឌ្ឍនភាពការងារប្រចាំខែ ឆមាស និងប្រចាំឆ្នាំ៕

អត្ថបទ៖ ធឿន វ៉ាន់សុង