ជយលាភីតែងនិពន្ធ ស្ដីពី ពិធីចូលព្រះវស្សា ពីលេខ១ ដល់លេខ៥ ជាសិស្សស្រីទាំងអស់

នៅព្រឹកថ្ងៃទី១៥ ខែកក្កដានេះ ក្រសួងអប់រំ យុវជន និងកីឡា បានប្រកាសជយលាភី ៥រូប ក្នុងការប្រឡង តែងនិពន្ធ ស្ដីពី ពិធីបុណ្យអាសាឡ្ហបូជា (ចូលព្រះវង្សា) ក្នុងចំណោមបេក្ខជនប្រឡងសរុបប្រមាណ ២៩០នាក់ មកពីសាលារៀនចំនួន ២៣ ចូលរួមប្រឡងកាលពីរសៀលម្សិលមិញនេះ។

ក្នុងចំណោមជយលាភីចំនួន ៥ រូប គឺសុទ្ធសឹងជាសិស្សស្រីទាំងអស់ ដោយ ២រូប មកពីសាលារដ្ឋ និង ៣រូបទៀត មកពីគ្រឹះស្ថានសិក្សាឯកជន ដោយជយលាភីលេខ១ បានទៅលើយុវសិស្ស ស្រួច ស៊ីណា មកពីវិទ្យាល័យ ហ៊ុន សែន តាខ្មៅ។ ឯជ័យលាភីលេខ២ បានទៅលើយុវសិស្ស ហៀង លីងអ៊ើ មកពី សាលារៀនសុវណ្ណភូមិទី២៦; ជ័យលាភីលេខ៣ គឺយុវសិស្ស លី សុខនី មកពីសាលារៀនវ៉េស្ទឡាញន៍ សាខាទួលទំពូង; ជ័យលាភីលេខ៤ គឺបានទៅលើយុវសិស្ស ខាន់ សៀវម៉ី មកពីវិទ្យាល័យ ហ៊ុន សែន សេរីភាព និងជ័យលាភីលេខ៥ បានទៅលើយុវសិស្ស ឡាំង សុខាណា មកពីសាលារៀនសុវណ្ណភូមិទី២៦។

គួរជម្រាបថា ការប្រឡងតែងនិពន្ធ ស្ដីពី “ពិធីបុណ្យអាសាឡ្ហបូជា” គឺរៀបចំឡើងដោយ ក្រសួងអប់រំ យុវជន និងកីឡា សហការជាមួយវត្តនិគ្រោធវ័ន ក្នុងគោលបំណងលើកកម្ពស់ ការតែងនិពន្ធ អក្សរសាស្រ្តខ្មែរ និងផ្ដល់ឱកាសដល់យុវជនបានសិក្សាឈ្វេងយល់អំពីព្រះពុទ្ធសាសនា ការលើកកម្ពស់គុណធម៌ ចរិយាធម៌ សីលធម៌ សាមគ្គីធម៌ក្នុងសង្គម ក៏ដូចជាចូលរួមក្នុងការផ្សព្វផ្សាយ ព្រះពុទ្ធសាសនា ទៅកាន់គ្រប់ស្រទាប់ យុវជនកម្ពុជា។ តួយ៉ាង ក្នុងទស្សនៈវិជ្ជាព្រះពុទ្ធសាសនា គឺជាកម្រងនៃគោលការណ៍ធំៗដែលព្រះពុទ្ធបានចងក្រង ដើម្បីអប់រំមនុស្ស នៅក្នុងការគ្រប់គ្រងរដ្ឋ ក្នុងការគ្រប់គ្រងសង្គម ក្នុងការគ្រប់គ្រងគ្រួសារ និងក្នុងការគ្រប់គ្រង ខ្លួនឯង ឱ្យក្លាយទៅជាបញ្ញវន្ត ឱ្យសង្គមជាតិមានសេចក្តីសុខ និងមានសេចក្តីចម្រើនរុងរឿងបន្តបន្ទាប់ទៀត៕