មហោស្រពសិល្បៈដំណើរខ្មែរ រៀបចំការប្រកួតអត្ថបទរឿងខ្លីស្តីពី តម្លៃមរតកសិល្បៈខ្មែរ និងការចូលរួមរបស់យុវជន

មហោស្រពសិល្បៈដំណើរខ្មែរ បានចេញការប្រកាសនៅថ្ងៃទី៦ ខែវិច្ឆិកា ឆ្នាំ២០២៤ លើបណ្តាញសង្គមហ្វេសប៊ុក ស្តីពីការប្រកួតអត្ថបទរឿងខ្លី ក្រោមប្រធានបទ “តម្លៃមរតកសិល្បៈខ្មែរ និងការចូលរួមពីយុវជនជំនាន់ថ្មី” ដែលជាឱកាសសម្រាប់សាធារណជនដែលស្រឡាញ់ការតែងនិពន្ធ និងចង់បញ្ចេញសមត្ថភាព អាចដាក់ពាក្យប្រកួតបាន។

ចំពោះលក្ខខណ្ឌក្នុងការចូលរួមប្រកួតមានដូចជា៖ អត្ថបទរឿងខ្លីត្រូវសរសេរដោយកុំព្យូទ័រខ្នាតក្រដាស A4 ចាប់ពី៣ ទៅ៣០​ទំព័រ។ រីឯ អក្សរក្នុងកុំព្យូទ័រយក Font យូនីកូត  Khmer OS Simreapទំហំ១២ ជាមួយគ្នានេះ អក្ខរាវិរុទ្ធគឺយកតាមវចនានុក្រមខ្មែររបស់សម្តេចព្រះសង្ឃរាជ ជួន ណាត និងការសម្រេចរបស់ក្រុមប្រឹក្សាជាតិខ្មែរ។ បេក្ខជនដែលមានចំណាប់អារម្មណ៍អាចដាក់ស្នាដៃប្រកួតតាមរយៈតេលេក្រាម ( t.me/wujinhe2222 ) និងផុតកំណត់ទទួលអត្ថបទរឿងខ្លី នៅម៉ោង៥:០០នាទីល្ងាចថ្ងៃទី៣០ ខែវិច្ឆិកា ឆ្នាំ២០២៤។ យ៉ាងណាមិញ ចំពោះបេក្ខជនដាក់ពាក្យប្រកួតចម្លងស្នាដៃរបស់អ្នកដទៃ កម្មវិធីនឹងដកសិទ្ធិប្រកួតដោយស្វ័យប្រវត្តិតែម្តង។

សូមបញ្ជាក់ថា ចំពោះម្ចាស់ជ័យលាភីនៃការប្រកួតនេះ នឹងទទួលបានពានរង្វាន់ «សម្តេចក្រុមព្រះ នរោត្តម ច័ក្រពង្ស់ » និង ប្រកាសនីយប័ត្រ(Certificate) ពានរង្វាន់ស្នាដៃឯក, ពានរង្វាន់ស្នាដៃ ច្នៃប្រឌិតខ្ពស់ និងពានរង្វាន់ ឧត្តមគិតល្អឯក។ សរុបជាទឹកប្រាក់ ២០,៥០០,០០០៛ (ម្ភៃលាន ប្រាំសែនរៀល)៕