និស្សិតអាហារូបករណ៍ ២៥០ នាក់ បន្តការសិក្សានៅប្រទេសចិន

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា បានអញ្ជើញជាអធិបតីភាពក្នុង ពិធីអបអរសាទរឆ្នាំ នៃការផ្លាស់ប្ដូរប្រជាជន និងប្រជាជន កម្ពុជា-ចិន ២០២៤ និងជូនដំណើរនិស្សិតអាហារូបករណ៍កម្ពុជា ចំនួន ២៥០ នាក់ ទៅបន្តការសិក្សានៅប្រទេសចិន។

ពិធីនេះ រៀបចំនៅល្ងាចថ្ងៃទី២៣ ខែសីហា ឆ្នាំ២០២៤ នេះ ដោយមានការអញ្ជើញចូលរួមពី លោក វ៉ាង វិនពិន ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំនៅព្រះរាជាណាចក្រកម្ពុជា ស្ថាបនិក និងជាប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋចិន ប្រធានសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន។

បន្ទាប់ពីបានស្ដាប់នូវរបាយការណ៍របស់ប្រធានសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន និងប្រសាសន៍ របស់ ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំនៅកម្ពុជារួចមក បណ្ឌិតសភាចារ្យ ឧបនាយករដ្ឋមន្រ្តី បានថ្លែងអំណរគុណយ៉ាងជ្រាលជ្រៅជូនចំពោះភាគីចិនដែលតែងផ្តល់ការ គាំទ្រលើគ្រប់វិស័យ ជាពិសេស ការអភិវឌ្វិស័យអប់រំក្នុងប្រទេសកម្ពុជា សមិទ្ធផលនានាជាច្រើន សាលារៀន បច្ចេទេស បច្ចេកវិទ្យា សមិទ្ធផលក្នុងវិស័យអប់រំ សុខាភិបាលហេដ្ឋារចនាសម្ព័ន្ធ ផ្លូវ ស្ពានជាច្រើនផ្សេងទៀត។

បណ្ឌិតសភាចារ្យសង្ឃឹមថាមិត្តភាពរវាងកម្ពុជា និងចិន នៅតែបន្ដចំណងមិត្តភាព ដ៏យូរអង្វែងនេះជារៀងដរាបទៅ ការចែករំលែកពង្រីកបទពិសោធន៍បើកចំហរក្នុងការសម្រេចបាននូវសមិទ្ធផលកំណែទម្រង់អភិវឌ្ឍកាន់តែច្រើន សម្រេចបាននូវចក្ខុវិស័យ ឆ្នាំ២០៣០ និង២០៥០ ហើយយុវជន គឺជាផ្នែកមួយដ៏សំខាន់ នៃទំនាក់ទំនងរវាងប្រទេសចិន និងប្រទេសកម្ពុជា ព្រោះយុវជនគឺតំណាងអនាគតរបស់ប្រទេសជាតិ យុវជនក៏តំណាងអនាគត នៃចំណងមិត្តភាពរវាងកម្ពុជា និងចិនផងដែរ។

បណ្ឌិតសភាចារ្យ ឧបនាយករដ្ឋមន្រ្តី បានបន្ដទៀតថា ការសិក្សានៅប្រទេសចិន និស្សិតនឹងអាចឈ្វេងយល់បានស៊ីជម្រៅអំពីវប្បធម៌ប្រពៃណីរស់នៅរបស់ប្រជាជនចិនក្នុងយុគសម័យថ្មី ដែលលេចចេញពីការរីកចម្រើនផ្នែកវិទ្យាសាស្ត្រ បច្ចេកវិទ្យា និងការអភិវឌ្ឍសេដ្ឋកិច្ច ។

បណ្ឌិតសភាចារ្យ ឧបនាយករដ្ឋមន្រ្តី បានផ្តាំផ្ញើដល់និស្សិតឱ្យប្រកាន់ភ្ជាប់ការគោរពច្បាប់ និងវិន័យសាលាឱ្យបានខ្ជាប់ខ្ជួន ត្រូវចេះសាមគ្គីគ្នា បង្កើតមិត្តភាពជាមួយនិស្សិតដែលមកពីបណ្តាប្រទេសដទៃទៀត ជាពិសេស ត្រូវខិតខំរៀនសូត្រឱ្យទទួលបានលទ្ធផលល្អ ដើម្បីលើកស្ទួយកិត្តិយសនិស្សិតកម្ពុជា ព្រមទាំងពាំនាំមោទនភាពជូនគ្រួសារ និងប្រទេសជាតិ៕