ព័ត៌មានជាតិ

កម្ពុជា ចែករំលែកវឌ្ឍនភាពការអនុវត្តរបបសន្តិសុខសង្គមដល់ប្រតិបត្តិករសន្តិសុខសង្គមក្នុងតំបន់អាស៊ី-ប៉ាស៊ីហ្វិក

បានផុស

២ ខែ មុន

នៅ

ថ្ងៃសុក្រ ១១ តុលា ២០២៤

ដោយ

កម្ពុជា បានចែករំលែកអំពីវឌ្ឍនភាព នៃការអនុវត្តរបបសន្តិសុខសង្គមផ្នែកហានិភ័យការងារ ថែទាំសុខភាព និងផ្នែកប្រាក់សោធន ព្រមទាំងលើកឡើងអំពីការសិក្សាសមិទ្ធិលទ្ធភាពក្នុងការអនុវត្តរបបសន្តិសុខសង្គមផ្នែកនិកម្មភាពការងារ នាពេលអនាគតដល់ប្រតិបត្តិករសន្តិសុខសង្គមក្នុងតំបន់អាស៊ី-ប៉ាស៊ីហ្វិកដែលបានចូលរួមកិច្ចពិភាក្សាតុមូលរបស់ជំនាញការអាស៊ីស្ដីពី កិច្ចគាំពារផ្នែកនិកម្មភាពការងារឆ្នាំ ២០២៤ នៅទីក្រុងហ្សាកាតា ប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចពិភាក្សាតុមូលខាងលើនេះ ប្រព្រឹត្តទៅមានរយៈពេល ២ ថ្ងៃ ចាប់ពីថ្ងៃទី ៩-១០ ខែតុលា ឆ្នាំ ២០២៤ រៀបចំឡើងដោយរាជរដ្ឋាភិបាល នៃប្រទេសជប៉ុន, អង្គការអន្តរជាតិខាងការងារ និងអង្គភាពធានារ៉ាប់រងសំណងគ្រោះថ្នាក់ការងារអាស៊ី នៃសាធារណរដ្ឋឥណ្ឌូណេស៊ី ដោយមានការចូលរួមពីតំណាងស្ថាប័នសន្តិសុខសង្គមជាសមាជិក នៃសមាគមសំណងគ្រោះថ្នាក់ការងារអាស៊ី (AWCA), តំណាងកម្មករ-និយោជិត តំណាងនិយោជក និងតំណាងរដ្ឋាភិបាល វាគ្មិនជំនាញ និងសិក្ខាកាម មកពីបណ្តាប្រទេសរួមមាន ៖ កម្ពុជា ឥណ្ឌូណេស៊ី ឡាវ ម៉ាឡេស៊ី ម៉ុងហ្គោលី ហ្វីលីពីន ថៃ វៀតណាម ចិន ឥណ្ឌា ជប៉ុន កូរ៉េ ស្រីលង្កា នេប៉ាល់ និងទីម័រខាងកើត សរុបប្រមាណ ១៥០ នាក់។

លោក គួច សុមាន រដ្ឋលេខាធិការ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលបានចូលរួមកិច្ចពិភាក្សាតុមូលរបស់ជំនាញការអាស៊ីស្ដីពី កិច្ចគាំពារផ្នែក និកម្មភាពការងារឆ្នាំ ២០២៤ បានលើកឡើងថា វេទិកានេះ ប្រារព្ធឡើងក្នុងគោលបំណងដើម្បីចែករំលែកបទពិសោធ និងចំណេះដឹងអំពីគោលនយោបាយ, ការគ្រប់គ្រង និងប្រតិបត្តិការរបបសន្តិសុខសង្គមផ្នែកនិកម្មភាពការងារ និងបង្កើនបរិយាកាសពិភាក្សាសម្រាប់ជំនាញការផ្នែកសន្តិសុខសង្គម និងប្រតិបត្តិករសន្តិសុខសង្គមនៅក្នុងតំបន់អាស៊ី-ប៉ាស៊ីហ្វិក អំពីរបបសន្តិសុខសង្គមផ្នែកនិកម្មភាពការងារ។

នាឱកាសនោះដែរ លោករដ្ឋលេខាធិការ បានចែករំលែកអំពីវឌ្ឍនភាព នៃការអនុវត្តរបបសន្តិសុខសង្គមផ្នែកហានិភ័យការងារ ថែទាំសុខភាព និងផ្នែកប្រាក់សោធន ព្រមទាំងលើកឡើងអំពីការសិក្សាសមិទ្ធិលទ្ធភាពក្នុងការអនុវត្តរបបសន្តិសុខសង្គមផ្នែកនិកម្មភាពការងារ នាពេលអនាគត ស្របតាមផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ ឆ្នាំ ២០២៤-២០២៨៕

អត្ថបទ ៖ សំអឿន