រដ្ឋមន្ត្រីមហាផ្ទៃ ឱ្យមន្ត្រីក្បាលពោះធំខំហាត់ប្រាណ មិនដូច្នេះ មិនឱ្យចុះបំពេញការងារខាងក្រៅទេ

មន្រ្តីមានក្បាលពោះធំជ្រុល មិនអនុញ្ញាតឱ្យចេញធ្វើការខាងក្រៅទៀតទេ។ ផ្ទុយទៅវិញ បើចង់ចេញបំពេញការងារខាងក្រៅ ត្រូវតែហាត់ប្រាណឱ្យស្រកក្បាលពោះឱ្យបានសមរម្យ។ នេះជាបទបញ្ជារបស់រដ្ឋមន្ត្រីក្រសួងមហាផ្ទៃ លោក ស សុខា ទៅកាន់មន្ត្រីក្រោមឱវាទរបស់លោក។

លោក រ៉េន រតនៈ អ្នកនាំពាក្យផ្ទាល់របស់លោក ស សុខា បានបញ្ជាក់ឱ្យដឹងថា នៅក្នុងកិច្ចប្រជុំមួយកាលពីថ្ងៃទី១៤ ខែតុលា ឆ្នាំ២០២៤ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសង្កត់ធ្ងន់ថា «ចាប់ពីពេលនេះទៅ មន្រ្តីមានក្បាលពោះធំជ្រុល មិនឱ្យចេញធ្វើការខាងក្រៅទៀតទេ ជាពិសេសការងារចរាចរណ៍ និងប្រតិបត្តិការនានា។ អង្គភាព ត្រូវរៀបចំកម្លាំងមានក្បាលពោះធំ ឱ្យធ្វើការក្នុងការិយាល័យ»។

តែយ៉ាងណាមិញ លោកឧបនាយករដ្ឋមន្ត្រី ស សុខា ក៏មិនបានបិទផ្លូវសម្រាប់អ្នកចង់ចេញក្រៅ ឬបើមានតម្រូវការចេញប្រតិបត្តិការការងារខាងក្រៅនោះទេ គឺផ្ដល់ជម្រើសឱ្យហាត់ប្រាណ បន្ថយរបបអាហារមិនត្រឹមត្រូវ ជាដើម ដើម្បីឱ្យស្រកក្បាលពោះ ហើយមើលទៅសមរម្យ។ ដោយឡែក ពាក្យថា «ស្តង់ដា» លោកប្រមុខក្រសួងមហាផ្ទៃ បានតម្រូវពេលនេះ គឺយ៉ាងហោចណាស់ឱ្យបាន «សមរម្យ» គឺសមភ្នែកមហាជន និងអាចអនុវត្តការងារបាន ពោលគឺមិនមែនធំលើតូចក្រោម ឬធាត់ក្បាលពោះធំហួស ដែលចៀសមិនផុតពីការមិនអាចបំពេញការងារបានល្អ និងរហ័សរហួននោះឡើយ។

លោក រ៉េន រតនៈ បានលើកឡើងបន្ថែមនៅលើបណ្ដាញសង្គម ថា ករណីនេះ ទោះមានតិចតួច ធៀបនឹងកម្លាំងសរុប តែលោកឧបនាយករដ្ឋមន្ត្រី ស សុខា  បានយកចិត្តទុកដាក់ និងផ្ដល់ការរំលឹកណែនាំជារឿយៗ តាំងពីដើមនីតិកាលថ្មី៕