តុលាការផ្ដន្ទាទោស លោក នី ណាក់ ដាក់ពន្ធនាគារ២ឆ្នាំ ពិន័យ៣លានរៀល សងជម្ងឺចិត្តដើមបណ្ដឹង២រយលានរៀល ក្រោយបរិហារកេរ្ដិ៍ លោក ហេង សួរ

តុលាការ បានសម្រេចផ្ដន្ទាទោស លោក នី ណាក់ ម្ចាស់ទំព័រហ្វេសប៊ុក​ Iman KH ដាក់ពន្ធនាគារ ២ឆ្នាំ ពិន័យ៣លានរៀល និងឱ្យសងជម្ងឺចិត្តដើមបណ្ដឹងចំនួន២រយលានរៀល ក្រោយលោក នី ណាក់ បរិហារកេរ្ដិ៍លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងស្ថាប័នរដ្ឋ នៅអំឡុងចុងឆ្នាំ២០២៣។

នៅព្រឹកថ្ងៃទី២១ ខែវិច្ឆិកា នេះ ចៅក្រមជំនុំជម្រះ លោក ទិត្យ សុទ្ធីបូរ៉ាឆាត អមដោយលោក សេង ហៀង ជាតំណាងអយ្យការ បានបើកសវនាការប្រកាសសាលក្រមលើសំណុំរឿងលោក នី ណាក់ពីបទ «បរិហារកេរ្តិ៍ជាសាធារណៈ និងញុះញង់ឲ្យមានការរើសអើង»។

សូមរម្លឹកថា លោក នី ណាក់ ធ្លាប់ជាប់ពន្ធនាគារ កាលពីឆ្នាំ២០២០ម្តងរួចមកហើយ  នៅក្រោមបទចោទ «ញុះញង់ឲ្យប្រព្រឹត្តបទឧក្រិដ្ឋ»។ កាលណោះ  តុលាការបានផ្តន្ទាទោស លោក នីណាក់ ដាក់ពន្ធនាគារចំនួនខែ១៨ខែ ។ កាលពីថ្ងៃទី១០ ខែមិថុនា ឆ្នាំ២០២១ លោក នី ណាក់ ត្រូវបានអនុញ្ញាតឱ្យចេញពីពន្ធនាគារ។

លុះមកដល់ចុងឆ្នាំ២០២៣ លោក ​នី ណាក់ ​បាន​ផ្សព្វ​ផ្សាយថា«​មានការ​កាត់ដី​ចំនួន​ ១០០ ​ហិកតា​នៅ​ខេត្ត​កំពត ​ផ្តល់​ទៅឱ្យ​លោក ​ហេង សួរ ដែល​ជា​រដ្ឋមន្រ្តី​ក្រសួង​ការងារ​នោះ​ទេ»។ ប៉ុន្តែ អ្នកនាំពាក្យក្រសួងការងារ បានចេញមកបំភ្លឺថា ឈ្មោះ ហេង សួរ ដែលទទួលបានដី១០០ហិកតា នៅខេត្តកំពតនោះ មិនមែនជាលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈឡើយ។

ទោះបីជាអ្នកនាំពាក្យក្រសួងការងារបំភ្លឺដូច្នេះ ក៏លោក​ នី ណាក់ នៅតែបន្តផ្សព្វផ្សាយបែបនេះបន្តទៀត ទើបលោក ហេង សួរ រដ្ឋមន្ត្រីក្រសួងការងារ សម្រេចដាក់ពាក្យបណ្ដឹងលើលោក នី នាក់ ពី ទៅកាន់សាលាដំបូងពីបទ«បរិហាកេរ្ដិ៍ និងញុះញង់»​។

លោក នី ណាក់ កើតឆ្នាំ១៩៧៩ ត្រូវបានសមត្ថកិច្ចឃាត់ខ្លួន និងបញ្ជូនទៅតុលាការ នៅថ្ងៃទី០៥ ខែមករា ឆ្នាំ២០២៤។

សាលាដំបូងរាជធានីភ្នំពេញ បានសម្រេចឃុំខ្លួនលោក នី ណាក់ ម្ចាស់ផេក «Iman KH» ដាក់ពន្ធនាគារជាបណ្តោះអាសន្ន នៅពន្ធនាគារព្រៃស ក្រោមការចោទប្រកាន់ពីបទ «បរិហារកេរ្តិ៍ជាសាធារណៈ និងញុះញង់ឲ្យមានការរើសអើង»៕