លោក សុខ ចិន្តាសោភា ផ្ទេរតំណែងរដ្ឋមន្ត្រីការបរទេសជូនលោក ប្រាក់ សុខុន ជាផ្លូវការ

នៅព្រឹកថ្ងៃទី២១ ខែវិច្ឆិកា ឆ្នាំ២០២៤នេះ ក្រសួងការបរទេស និងសហប្រតិបត្តិការអន្តរជាតិ បានរៀបចំពិធីផ្ទេរ និងប្រកាសចូលកាន់តំណែងជាផ្លូវការរបស់លោក ប្រាក់ សុខុន ជាឧបនាយករដ្ឋមន្ត្រី រដ្ឋមន្ត្រីក្រសួងការបរទេស ជំនួសលោកឧបនាយករដ្ឋមន្រ្តី សុខ ចិន្តាសោភា។

នៅក្នុងពិធីផ្ទេរតំណែងនេះ មានវត្តមានចូលរួមពីលោក អ៊ុច បូររិទ្ធ អនុប្រធានទី២ ព្រឹទ្ធសភា លោកបណ្ឌិត​ ចែម វីឌ្យ៉ា ប្រធានគណៈកម្មការទី៥ ព្រឹទ្ធសភា ថ្នាក់ដឹកនាំក្រសួងការបរទេស និងសហប្រតិបត្តិការអន្តរជាតិ ព្រមទាំងថ្នាក់ដឹកនាំអគ្គលេខាធិការដ្ឋានព្រឹទ្ធសភា។ ក្នុងពិធីនេះ ថ្នាក់ដឹកនាំទាំងពីរ បានថ្លែងចំណាប់អារម្មណ៍ និងសំណេះសំណាលជាមួយមន្រ្តីរាជការ នៅក្រសួងការបរទេស និងសហប្រតិបត្តិការអន្តរជាតិ។

សូមបញ្ជាក់ថា លោក ប្រាក់ សុខុន អនុប្រធានទី១ ព្រឹទ្ធសភា ត្រូវបានរដ្ឋសភាបោះឆ្នោតផ្ដល់សេចក្តីទុកចិត្តទាំងស្រុង ជាឧបនាយករដ្ឋមន្រ្តី រដ្ឋមន្រ្តីក្រសួងការបរទេស ជំនួសលោកឧបនាយករដ្ឋមន្រ្តី សុខ ចិន្តាសោភា កាលពីថ្ងៃទី២០ ខែវិច្ឆិកា ឆ្នាំ២០២៤ តាមសំណើរបស់ប្រមុខរាជរដ្ឋាភិបាល។

តាមការគូសបញ្ជាក់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ការដោះដូរតំណែងរដ្ឋមន្ត្រីក្រសួងការបរទេស នាពេលនេះ គឺដើម្បីប្រសិទ្ធភាពការងារកាន់តែខ្លាំងថែមទៀត សំដៅ​ឆ្លើយ​តប​នឹង​ការ​វិវត្ត​កាន់​តែ​ស្មុគ​ស្មាញ​នៃភាពតានតឹងផ្នែកភូមិសាស្ត្រនយោបាយ និងផ្នែកសេដ្ឋកិច្ចនៅលើពិភពលោក។

លោក ប្រាក់ សុខុន គឺជាអតីតរដ្ឋមន្រ្តីក្រសួងការបរទេស ពីឆ្នាំ២០១៦ ដល់ឆ្នាំ២០២៣ ក្នុងអាណត្តិសម្តេចតេជោ ហ៊ុន សែន កាន់តំណែងជានាយករដ្ឋមន្រ្តី។ ក្រោយការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ លោកត្រូវជាប់ឆ្នោតជាសមាជិកព្រឹទ្ធសភា មណ្ឌលភូមិភាគរាជធានីភ្នំពេញ ហើយត្រូវបានជ្រើសតាំងជាអនុប្រធានទី១ នៃព្រឹទ្ធសភា។ លោក ប្រាក់ សុខុន ក៏​ធ្លាប់បំពេញតួនាទី​ជា​ឯក​អគ្គរាជទូត​កម្ពុជា​ប្រចាំ​ប្រទេស​បារាំង រួមទាំងប្រទេសសមាជិកសហភាព​អឺរ៉ុបមួយចំនួនទៀត ខណៈក្នុងអាណត្តិកម្ពុជា ធ្វើជាប្រធានអាស៊ាន ឆ្នាំ២០២២ លោក ក៏ក្លាយជាប្រេសិតពិសេសរបស់ប្រធានអាស៊ានទទួលបន្ទុកបញ្ហានៅមីយ៉ាន់ម៉ាផងដែរ៕