សម្ដេចធិបតី លើកទឹកចិត្ដសិស្សដែលប្រឡងធ្លាក់ ៖សូមកុំគិតថា«ជីវិតចប់ត្រឹមនេះ» និងមិនត្រូវសម្លាប់ខ្លួនឡើយ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកទឹកចិត្តទៅដល់សិស្សានុសិស្សដែលប្រឡងធ្លាក់ កុំឱ្យគិតអវិជ្ជមានថា «ជីវិតចប់ត្រឹមនេះ» និងដាច់ខាតមិនត្រូវធ្វើសម្លាប់ខ្លួនឯងឡើយ។ សម្ដេចធិបតី ហ៊ុន ម៉ាណែត ថ្លែងដូច្នេះនៅក្នុងពិធីជួបសំណេះសំណាលជាមួយសិស្សនិទ្ទេស  នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេសវិជ្ជាជីវៈកម្រិត៣ នាព្រឹកថ្ងៃទី២៣ ខែធ្នូ ឆ្នាំ២០២៤។

សម្ដេចធិបតី ថ្លែងលើកទឹកចិត្តសិស្សប្រឡងធ្លាក់ដូច្នេះ៖« ខ្ញុំសូមឱ្យប្អូនៗ ក្មួយៗទាំងអស់ ទាំងអ្នកនិទ្ទេស​A អ្នកនិទ្ទេសB, C, D,E ឬមួយអ្នកមិនទាន់ជាប់ សូមប្រកាន់នូវផ្នត់ជីវិតវិជ្ជមានគ្រប់គ្នា។ សូមកុំគិតថាខ្ញុំប្រឡងមិនជាប់ ខ្ញុំអស់ហើយជីវិតនេះ មានតែស្ពានជ្រោយចង្វារ(ទៅសម្លាប់ខ្លួន)ទេ កុំ កុំឱ្យសោះ! ជីវិតការងារមានឡើង មានចុះ ថ្ងៃនេះយើងហេង មិនប្រាកដថាស្អែកយើងហេងទៀតទេ ត្រូវតែខំប្រឹង មូលដ្ឋានជាប់ដោយសារតែយើងខំប្រឹង»។

ជាមួយគ្នានេះ សម្ដេចធិបតី ហ៊ុន ម៉ាណែត បានណែនាំឱ្យសិស្សដែលប្រឡងជាប់បាននិទ្ទេសA ត្រូវតែបន្តខិតខំប្រឹងប្រែងរៀនសូត្របន្តទៀត មិនត្រូវភ្លេចខ្លួន​ មិនត្រូវមានមោទនភាពនឹងនិទ្ទេសA រហូតលែងប្រឹងរៀនសូត្របន្ថែមឡើយ។ សម្ដេចធិបតី អះអាងថា បើបាននិទ្ទេសA ហើយមិនខំរៀនបន្តទៀត នោះបេក្ខជនជ័យលាភីនិទ្ទេសA អាចនឹងមិនទទួលបានលទ្ធផលមិនល្អ ឬធ្លាក់ជាដើម។ សម្ដេចបានលើកយកហេតុការណ៍ដែលបានកើតឡើងជាក់ស្ដែងមកពន្យល់បេក្ខជននិទ្ទេសA ថា កន្លងមក គឺមានបេក្ខជនប្រឡងបាក់ឌុបជាប់និទ្ទេសA ប៉ុន្តែប្រឡងចូលសិក្សានៅសាលាតិចណូ បែជាធ្លាក់ ទទួលបានលទ្ធផលមិនល្អ ចាញ់បេក្ខជនដែលបាននិទ្ទេសB ឬC ជាដើម។

តាមរយៈជំនួបជាមួយបេក្ខជនជ័យលាភីនិទ្ទេសA នៅព្រឹកនេះ សម្ដេចប្រមុខរាជរដ្ឋាភិបាល ក៏បានណែនាំទៅកាន់សិស្សដែលប្រឡងបាក់ឌុបបាននិទ្ទេសB និទ្ទេសC  និទ្ទេសD និទ្ទេសE ក៏មិនត្រូវមានផ្នត់គំនិតអវិជ្ជមាន គិតថាប្រឡងបាននិទ្ទេសប៉ុណ្ណឹង មិនបាននិទ្ទេស A ដូចគេ ខ្លួនមិនជោគជ័យ ឬចាញ់គេ ហើយទៅសម្លាប់ខ្លួន។ សម្ដេចបានលើកទឹកចិត្តឱ្យសិស្សដែលប្រឡងបាក់ឌុបបាននិទ្ទេសB និទ្ទេសC  និទ្ទេសD និទ្ទេសE ត្រូវប​ន្តប្រឹងប្រែងរៀនសូត្របន្ថែមនៅថ្នាក់ឧត្ដមសិក្សាបន្តទៀត ដើម្បីទទួលបានជោគជ័យទៅថ្ងៃក្រោយ។

សម្ដេចធិបតី នាយករដ្ឋមន្ត្រី គូសបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ គ្រាន់តែជាការប្រឡងដើម្បីវាស់ស្ទង់សមត្ថភាពសិស្សានុសិស្សមួយជំហានប៉ុណ្ណោះ  មិនមែនជាការប្រឡងដើម្បីកំណត់ពីភាពជោគជ័យនៃជីវិតឡើយ។ សម្ដេចអះអាងថា ប្រឡងធ្លាក់ថ្ងៃនេះ ជីវិតមិនទាន់ចប់ត្រឹមហ្នឹងទេ​ ពោលគឺនៅមានជម្រើសជាច្រើនទៀត និងមានផ្លូវជាច្រើនទៀតត្រូវដើរឆ្ពោះទៅរកភាពជោគជ័យ។

សម្ដេច ហ៊ុ​ន ម៉ាណែត បន្តលើកទឹកចិត្តសិស្សដែលប្រឡងធ្លាក់ដូច្នេះ​៖« កុំយករឿង(ប្រឡង)មិនជាប់អីតិចតួច មិនបាននិទ្ទេស A ទៅជាអ្វីដែលទម្លាក់(បំបាក់ទឹកចិត្ត) ព្រោះគ្មានអ្នកណាទម្លាក់ផ្ដួលខ្លួនយើង ក្រៅពីខ្លួនយើងនោះទេ! ហើយក្មួយៗដែលមិនទាន់ជាប់ កុំអស់សង្ឃឹម នេះការវាស់ស្ទង់មួយទេ តែជីវិតយើងនៅវែងឆ្ងាយណាស់ មានជម្រើសផ្សេងៗទៀត យើងអាចទៅខិតខំប្រឹងប្រែង ដើម្បីប្រឡងតទៀត ក្មួយខ្លះត្រូវរៀនបរិញ្ញាបត្ររង ឬមួយទៅបណ្ដុះបណ្ដាលអីផ្សេងៗ ប៉ុន្តែជីវិតនៅមានច្រើនតទៅទៀត សូមកុំឱ្យលទ្ធផលមួយនេះ ក្លាយទៅជាឧបសគ្គរារាំងនូវការខិតខំប្រឹងប្រែងនៅខាងមុុខ។ នេះគឺជាអ្វីដែលពូសូមផ្ដាំក្មួយទាំងអស់»។

គួរជម្រាបជូនបន្តិចថា រាជរដ្ឋា​ភិបាល​កម្ពុជា តាមរយៈក្រសួងការងារ និងបណ្ដុះបណ្ដាលវិជ្ជាជីវៈបាន​ប្រកាសដាក់​ប្រើ​ប្រាស់​ជា​ផ្លូវ​ការនូវ​កម្ម​វិធី​បណ្តុះ​បណ្តាល​ជំនាញ​វិជ្ជា​ជីវៈ និង​បច្ចេក​ទេស​ដល់​យុវ​ជន​មក​ពី​គ្រួសារ​ក្រីក្រ ​និង​ងាយ​រង​ហានិ​ភ័យ ដែល​មាន​គោល​ដៅ​បណ្តុះ​បណ្តាល​ចំនួន​១​លាន​៥​សែន​នាក់។ កម្មវិធីនេះ បើកឱ្យយុវជនចូលរៀនជំនាញ ដោយមិនកំណត់ពីកម្រិតវប្បធម៌ ឬនិទ្ទេសឡើយ៕

ដោយ៖ ង៉ិល ណារ៉ាត់