ពលរដ្ឋរស់នៅឃុំប៊ូស្រា ខេត្តមណ្ឌលគិរី នឹងទទួលបានផ្លូវបេតុង១ខ្សែឆាប់ៗនេះ ដើម្បីងាយស្រួលធ្វើដំណើរប្រចាំថ្ងៃ

មិនយូរនោះទេ ប្រជាពលរដ្ឋដែលរស់នៅឃុំប៊ូស្រា ស្រុកពេជ្រាដា ខេត្តមណ្ឌលគិរី នឹងទទួលបានផ្លូវបេតុង១ខ្សែបន្ថែមទៀតហើយ។ រដ្ឋបាលស្រុកពេជ្រាដា កំពុងតែស្ថាបនាសាងសង់ផ្លូវបេតុងអាមេបន្ថែមមួយខ្សែទៀត ដែលមានកម្រាស់០.១៥ម៉ែត្រ ហើយមានទទឹង៧ម៉ែត្រ និងបណ្ដោយ៥៣០ម៉ែត្រ ជាគម្រោងអភិវឌ្ឍន៍ក្នុងឆ្នាំ២០២៤របស់រដ្ឋបាលស្រុកពេជ្រាដា ខេត្តមណ្ឌលគិរី ដើម្បីតភ្ជាប់ពីណុចអូរអំប៊ក់ភូមិពូទឺត ភ្ជាប់មក ភូមិប៊ូស្រា ស្ថិតក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរី។

ផ្លូវបេតុងដែលមានប្រវែង៥៣០ម៉ែត្រនេះ រដ្ឋបាលស្រុកបានផ្តល់សិទ្ធិសាងសង់​ឱ្យទៅក្រុមហ៊ុន អេច ប៊ី អេស ឌី ខន់ស្រ្តាក់សិន ដែលបានជាប់ការដេញថ្លៃនាពេលកន្លងទៅ។ ផ្លូវបេតុង១ខ្សែនេះ គ្រោងនឹងចំណាយថវិការក្នុងការសាងសង់អស់ចំនួន ៧២៣.៨៣១.០០០រៀល ជាតម្លៃកិច្ចសន្យា។ នេះបើតាមការគូសបញ្ជាក់ឱ្យដឹងរបស់លោក វណ្ណា ម៉ាប់ អភិបាលស្រុកពេជ្រាដា និងជាគណៈបញ្ជាការឯកភាពស្រុក។ លោកបានបញ្ជាក់ទៀតថា ក្រុមហ៊ុនដេញថ្លៃសាងសង់ បានគោរពធ្វើទៅតាមកិច្ចសន្យាដោយបានសាងសង់ទៅតាមស្តង់ដារបច្ចេកទេស ហើយបើធ្វើផ្ទុយពីកិច្ចសន្យាព្រមព្រៀងនោះ រដ្ឋបាលស្រុកនឹងផ្អាកដំណើរការចាត់ទុកជាមោឃៈភ្លាម។

បន្ថែមលើនេះ អភិបាលស្រុករូបនេះ ក៏បានបង្ហើបប្រាប់ពីផែនការស្ថាបនាសាងសង់ផ្លូវបេតុងដំបូងនៅដើមឆ្នាំ២០២៥នេះផងដែរ ដោយថា រដ្ឋបាលស្រុកនឹងអាចជួសជុលសាងសង់ផ្លូវបេតុងមានប្រវែង២៩៥ម៉ែត្របន្ថែមទៀត ដើម្បីតភ្ជាប់ពីគម្រោងដែលកំពុងសាងសង់ផ្លូវប្រវែង៥៣០ម៉ែត្រក្នុងឆ្នាំ២០២៤ ហើយអាចតភ្ជាប់មកផ្លូវជាតិធំរបស់ស្រុកពេជ្រាដាតែម្តង។ លោកអភិបាលស្រុកបានអំពាវនាវទៅដល់ប្រជាពលរដ្ឋដែលបានទទួលសមិទ្ធផលផ្លូវបេតុងថ្មីនៅតាមមូលដ្ឋានរបស់ខ្លួន សូមជួយថែរក្សា និងសហការគ្នាថែទាំផ្លូវនេះ ដើម្បីជាប្រយោជន៍រួម និងជាសរសៃឈាមតែមួយគត់សម្រាប់ប្រជាពលរដ្ឋធ្វើដំណើរ និងអាចដឹកជញ្ជូនទំនិញកសិផលផ្សេងផ្សេងមកកាន់ទីប្រជុំជន បានយូអង្វែង ហើយអាចជាមុខមាត់សម្រាប់ប្រទេសជាតិផងដែរ៕

ដោយ ៖រៀម សុខហេង